ព័ត៌មានអន្ដរជាតិ

វៀតណាម បញ្ជូននាវាផ្ទុកមីស៊ីល១គ្រឿងទៅរុស្ស៊ី

បានផុស

២ ខែ មុន

នៅ

ថ្ងៃពុធ ២៤ កក្កដា ២០២៤

ដោយ

Chheang

ទីភ្នាក់ងារព័ត៌មានរដ្ឋ TASS របស់រុស្ស៊ី បានរាយការណ៍នៅថ្ងៃពុធទី២៤ ខែកក្កដា ឆ្នាំ២០២៤នេះថា នាវាចម្បាំងផ្ទុកមីស៊ីលវៀតណាមចំនួន១គ្រឿង បានទៅដល់កំពង់ផែទីក្រុង Vladivostok របស់រុស្ស៊ី។ កងនាវាប៉ាស៊ីហ្វិករុស្ស៊ី បានហៅការទៅដល់នេះថាជា “ដំណើរទស្សនកិច្ចពាណិជ្ជកម្ម” រវាងសម្ព័ន្ធមិត្តទាំង២។

សូមចុច Subscribe Channel Telegram កម្ពុជាថ្មី ដើម្បីទទួលបានព័ត៌មានថ្មីៗទាន់ចិត្ត

ទីភ្នាក់ងារសារព័ត៌មាននៃកងនាវាប៉ាស៊ីហ្វិករុស្ស៊ី បានចុះផ្សាយថា៖ «ថ្ងៃនេះនាវាចម្បាំង Hung Dao នៃកងទ័ពជើងទឹកនៃសាធារណរដ្ឋសង្គមនិយមវៀតណាម បានមកដល់ទីក្រុង Vladivostok សម្រាប់ដំណើរទស្សនកិច្ចពាណិជ្ជកម្ម»។ នាវានេះ នឹងត្រូវស្ថិតនៅក្នុងប្រទេសរុស្ស៊ីរហូតដល់ចុងខែកក្កដា។

នាវាចម្បាំងរបស់វៀតណាម Hung Dao ត្រូវបានសាងសង់ឡើងដោយរុស្ស៊ី ហើយវាត្រូវបានប្រើប្រាស់ដោយកងទ័ពជើងទឹកវៀតណាមក្នុងឆ្នាំ២០១៨។ យោងតាមក្រុមហ៊ុននាំចេញផ្នែកការពារជាតិរបស់រុស្ស៊ី Rosoboronoexport នាវានេះត្រូវបានបង្កើតឡើងដើម្បីស្វែងរក តាមដាន និងប្រឆាំងសត្រូវ ទាំងគោលដៅនៅលើផ្ទៃទឹក ក្រោមទឹក និងលើអាកាស។ វាជានាវាចម្បាំងប្រភេទធុនស្រាល ដែលអាចបម្លាស់ទី និងដឹកទម្ងន់អតិបរមា ២៥០០តោន។

ការបញ្ជូន និងចតនាវាចម្បាំងនៅទីក្រុង Vladivostok នៅចុងបូព៌ាប្រទេសរុស្ស៊ីលើកនេះ ធ្វើឡើងប៉ុន្មានសប្តាហ៍បន្ទាប់ពីដំណើរទស្សនកិច្ចរបស់លោក វ្ល៉ាឌីមៀរ ពូទីន ទៅកាន់វៀតណាម ដែលកាលណោះប្រធានាធិបតីរុស្ស៊ី បាននិយាយថា លោកចង់កសាង “ស្ថាបត្យកម្មសន្តិសុខដែលអាចទុកចិត្តបាន” នៅក្នុងតំបន់អាស៊ីប៉ាស៊ីហ្វិក៕

ដោយ៖ ឈាង