លើកនេះ ប៉េងប៉ោងផ្ទុកសំរាមរបស់កូរ៉េខាងជើង ធ្លាក់ចូលបរិវេណវិមានប្រធានាធិបតី កូរ៉េខាងត្បូង តែម្តង

ប្រទេសកូរ៉េខាងជើង នៅតែបន្តធ្វើយុទ្ធនាការបង្ហោះប៉េងប៉ោងផ្ទុកសំរាមចូលដីកូរ៉េខាងត្បូង ដោយលើកនេះ វាធ្លាក់ចូលដល់ក្នុងបរិវេណវិមានប្រធានាធិបតី Yoon Suk Yeol នៅទីក្រុងសេអ៊ូលតែម្តង ទោះទីនោះ ត្រូវបានដាក់ជាតំបន់គ្មានការហោះហើរក៏ដោយ។

សូមចុច Subscribe Channel Telegram កម្ពុជាថ្មី ដើម្បីទទួលបានព័ត៌មានថ្មីៗទាន់ចិត្ត

តាមសេចក្តីរាយការណ៍របស់ BBC នៅថ្ងៃពុធ ទី២៤ ខែកក្កដា ឆ្នាំ២០២៤, នេះជាលើកទីមួយហើយ ដែលការិយាល័យមេដឹកនាំកូរ៉េខាងត្បូង ត្រូវយាយីដោយប៉េងប៉ោង បង្ហោះចេញពីដីកូរ៉េខាងជើង។

ពាក់ព័ន្ធបញ្ហានេះ សារព័ត៌មាន Yonhap រាយការណ៍ថា យោធា មិនបានបាញ់បំផ្ទុះប៉េងប៉ោងនោះឡើយ ព្រោះបារម្ភថា វាអាចមានផ្ទុកសារធាតុ ដែលអាចរីកសាយភាយបាន។

ស្របពេលជាមួយគ្នានោះ ក្រុមឆ្លើយតបអាវុធគីមី ជីវសាស្ត្រ និងវិទ្យុសកម្ម ក៏ត្រូវបានបញ្ជូនទៅពិនិត្យមើលប៉េងប៉ោងដែរ ប៉ុន្តែពួកគេ មិនបានរកឃើញសារធាតុបង្កការចម្លងរោគ ឬហានិភ័យសុវត្ថិភាពអ្វីឡើយ។

មិនមែនត្រឹមសេអ៊ូលទេ ប៉េងប៉ោង ក៏ធ្លាក់នៅតំបន់មួយចំនួនទៀតក្នុងរដ្ឋធានីនេះដែរ ខណៈក្រុមមន្ត្រីបានជូនដំណឹងដល់ប្រជាពលរដ្ឋទាំងឡាយ កុំឲ្យប៉ះពាល់ប៉េងប៉ោងឲ្យសោះ ហើយត្រូវរាយការណ៍ជាបន្ទាន់ទៅកាន់មូលដ្ឋានយោធាឬប៉ុស្តិប៉ូលិស ដែលស្ថិតនៅជិតបំផុត។

គួរបញ្ជាក់ថា ឧប្បត្តិហេតុចុងក្រោយនេះ កើតឡើងត្រឹមប៉ុន្មានថ្ងៃប៉ុណ្ណោះ បន្ទាប់ពីយោធាកូរ៉េខាងត្បូង ប្រតិកម្មទៅកូរ៉េខាងជើង ដែលបានចាប់ផ្តើមដាក់គ្រឿងបំពងសំឡេងហើយបើកឮៗ នៅតាមព្រំដែនឡើងវិញ។

សូមជម្រាបជាថ្មី បងប្អូនកូរ៉េទាំងពីរ ​សុទ្ធតែបានជ្រើសយកវិធីសាស្រ្តបង្ហោះ​ប៉េងប៉ោង ​ក្នុង​យុទ្ធនាការ​ឃោសនា​របស់​ខ្លួន ​ចាប់​តាំង​ពី​សង្គ្រាម​កូរ៉េ​អំឡុង​ទសវត្សរ៍​ឆ្នាំ១៩៥០មក ហើយរឿងហេតុថ្ងៃពុធ គឺជាការបង្ហោះលើកទីដប់របស់កូរ៉េខាងជើងនៅឆ្នាំនេះ ក្នុងអ្វីដែលខ្លួនអះអាងថា ដើម្បីសងសឹកចំពោះសកម្មជនកូរ៉េខាងត្បូង ដែលក៏បង្ហោះប៉េងប៉ោងដូចគ្នានេះដែរ៕

អត្ថបទ៖ សុខ សុវណ្ណ

ចុចអាន៖ កូរ៉េ​ខាង​ត្បូង​ចាប់​ផ្ដើមបំពង​​សំឡេង​ឃោសនា​ឆ្លងព្រំដែន​ជាថ្មី ឆ្លើយតបចំពោះ​​ការ​បាញ់​បង្ហោះ​ប៉េងប៉ោង​យោងសំរាមរបស់​កូរ៉េ​ខាង​ជើង