ប៉េងប៉ោងកូរ៉េខាងជើងរំខានជើងហោះហើរ ឆេះ​ផ្ទះ​ពលរដ្ឋ​ និង​មានធ្លាក់​នៅ​វិមាន​ប្រធានាធិបតី​កូរ៉េខាងត្បូង​

ប្រទេសកូរ៉េខាងជើង បានបង្ហោះប៉េងប៉ោងប្រហែល​៥០០​ផ្ទុកដោយ​សំរាមចូលដីកូរ៉េខាងត្បូង ត្រឹមរយៈពេល២៤ម៉ោងចុងក្រោយ ដែល​ជាហេតុ​បង្កការ​រំខានដល់ជើង​ហោះហើរ ថែមទាំងបង្កអគ្គិភ័យឆាបឆេះលើដំបូលផ្ទះរបស់ប្រជាជន​កូរ៉េខា​ង​ត្បូង​។ យោង​ការ​ផ្សាយ​ CNA​។

សូមចុច Subscribe Channel Telegram កម្ពុជាថ្មី ដើម្បីទទួលបានព័ត៌មានថ្មីៗទាន់ចិត្ត

ប៉េងប៉ោងមួយបានបង្ខំ​អាកាសយានដ្ឋាន Gimpo ក្នុងទីក្រុងសេអ៊ូល ឲ្យ​ផ្អាកការហោះហើរនិងការ​ចុះចតប្រមាណ​២​ម៉ោង កាលពីល្ងាចថ្ងៃពុធ ហើយក្នុងរយៈពេលប៉ុន្មានថ្ងៃមកនេះ ប៉េងប៉ោង​របស់​កូរ៉េ​ខាងជើង​​ក៏រំខានដល់ការធ្វើចរាចរណ៍ជាច្រើនលើកនៅព្រលានយន្តហោះអន្តរជាតិ Incheon ដ៏ធំរបស់កូរ៉េខាងត្បូង។

ស្របពេលជាមួយគ្នានោះ ប៉េងប៉ោងក៏​បង្ក​ការ​ឆាបឆេះដំបូលផ្ទះប្រជាជនក្នុងខេត្តGyeonggi ក្បែរទីក្រុងសេអ៊ូល ប៉ុន្តែក្រុមពន្លត់អគ្គិភ័យបាន​ជួយពន្លត់ទាន់ពេលវេលា។

មុននេះប៉េងប៉ោងកូរ៉េខាងជើង​បង្ក​ការ​ភ្ញាក់ផ្អើល​​យ៉ាង​ខ្លាំង​ដោយ​ធ្លាក់ចូលក្នុងបរិវេណវិមានប្រធានាធិបតី Yoon Suk Yeol នៅទីក្រុងសេអ៊ូល ទោះ​បី​​ទីនោះ​ត្រូវបានដាក់ជាតំបន់គ្មានការហោះហើរក៏ដោយ ហើយនោះជាលើកទីមួយ ដែលការិយាល័យមេដឹកនាំកូរ៉េខាងត្បូង ត្រូវយាយីដោយប៉េងប៉ោងបង្ហោះចេញពីដីកូរ៉េខាងជើង។

ឧប្បត្តិហេតុនេះ កើតឡើងត្រឹមប៉ុន្មានថ្ងៃប៉ុណ្ណោះ បន្ទាប់ពីយោធាកូរ៉េខាងត្បូង ប្រតិកម្មទៅកូរ៉េខាងជើងដែលចាប់ផ្តើមដាក់គ្រឿងបំពងសំឡេងហើយបើកឮៗ នៅតាមព្រំដែនឡើងវិញ។

​បងប្អូន​គូសត្រូវកូរ៉េខាងត្បូង​​និង​កូរ៉េ​ខាងជើង​​​​សុទ្ធតែបានជ្រើសយកវិធីសាស្រ្តបង្ហោះ​ប៉េងប៉ោង ​ក្នុង​យុទ្ធនាការ​ឃោសនា​របស់​ខ្លួន ​ចាប់​តាំង​ពី​សង្គ្រាម​កូរ៉េ​អំឡុង​ទសវត្សរ៍​ឆ្នាំ១៩៥០ ហើយនេះគឺជាការបង្ហោះលើកទីដប់របស់កូរ៉េខាងជើងនៅឆ្នាំ២០២៤ ក្នុងអ្វីដែលខ្លួនអះអាងថា ដើម្បីសងសឹកចំពោះសកម្មជនកូរ៉េខាងត្បូង ដែលក៏បង្ហោះប៉េងប៉ោងដូចគ្នានេះដែរ៕

អត្ថបទ៖ សុខ សុវណ្ណ

ចុចអាន៖ លើកនេះ ប៉េងប៉ោងផ្ទុកសំរាមរបស់កូរ៉េខាងជើង ធ្លាក់ចូលបរិវេណវិមានប្រធានាធិបតី កូរ៉េខាងត្បូង តែម្តង