ព័ត៌មានអន្ដរជាតិ

ជនចំណាកស្រុក១០នាក់លង់ទឹកស្លាប់នៅប៉ាណាម៉ា ពេលព្យាយាមឆ្លងទន្លេព្រំដែន

បានផុស

៨ ខែ មុន

នៅ

ថ្ងៃព្រហស្បតិ៍ ២៥ កក្កដា ២០២៤

ដោយ

មនុស្ស១០នាក់បានលង់ទឹកស្លាប់ក្នុងទន្លេក្បែរព្រំដែនរវាងប្រទេសប៉ាណាម៉ានិងប្រទេសកូឡុំប៊ី ខណៈដែលរដូវវស្សាបង្កើនហានិភ័យដល់ជនចំណាកស្រុក និងអ្នកស្វែងរកសិទ្ធិជ្រកកោន ដែលពួកគេត្រូវឆ្លងកាត់ផ្លូវប្រកបដោយគ្រោះថ្នាក់ ។ យោងតាមការចេញផ្សាយរបស់សារព័ត៌មាន Al Jazeera នៅថ្ងៃទី២៥ខែកក្កដានេះ។

សូមចុច Subscribe Channel Telegram កម្ពុជាថ្មី ដើម្បីទទួលបានព័ត៌មានថ្មីៗទាន់ចិត្ត

ប៉ូលិសបានរកឃើញសាកសពអណ្តែតនៅដៃទន្លេក្បែរសហគមន៍ដាច់ស្រយាលក្នុងទីក្រុង Carreto ប៉ុន្តែទីភ្នាក់ងារព្រំដែនជាតិ SENAFRONT របស់ប្រទេសប៉ាណាម៉ា មិនបានបញ្ជាក់សញ្ជាតិរបស់អ្នកដែលបានលង់ទឹកស្លាប់ ហើយ ក៏មិនបានបញ្ជាក់ថាតើពួកគេបានឆ្លងចូលក្នុងប្រទេសប៉ាណាម៉ា តាមរយៈច្រកព្រៃ Darien Gap ឬតាមទូកនោះទេ។

ជាធម្មតា ជនចំណាកស្រុកតែងប្រើផ្លូវឆ្លងកាត់ខុសច្បាប់ដែលធ្វើឱ្យជីវិតរបស់ពួកគេប្រឈមនឹងហានិភ័យយ៉ាងធ្ងន់ធ្ងរ ខណៈផ្លូវតភ្ជាប់ទៅអាមេរិកខាងត្បូងនិងអាមេរិកកណ្តាល តាមច្រក Darien Gap គឺជាផ្លូវដ៏គ្រោះថ្នាក់បំផុត ព្រោះវាសម្បូរទៅដោយគ្រោះថ្នាក់ធម្មជាតិ រួមទាំងសត្វល្អិត ពស់ និងទីតាំងភូមិសាស្រ្តដីដ៏លំបាក។ លើសពីនេះ ផ្លូវនេះក៏មានក្រុមឧក្រិដ្ឋជនធ្វើសកម្មភាពដូចជា ការឆក់ប្លន់ ការជំរិតទារប្រាក់ និងទម្រង់នៃអំពើហិង្សាផ្សេងទៀតដែលកំពុងកើនឡើង។

ទោះបីជាមានគ្រោះថ្នាក់ទាំងនេះក៏ដោយ ផ្លូវនេះនៅតែជាផ្លូវដ៏ពេញនិយមសម្រាប់ជនចំណាកស្រុក និងអ្នកស្វែងរកសិទ្ធិជ្រកកោនដែលភៀសខ្លួនចេញពីអំពើហិង្សា វិបត្តិសេដ្ឋកិច្ចសង្គម និងការលំបាកផ្សេងទៀតនៅក្នុងប្រទេសកំណើតរបស់ពួកគេ។ មនុស្សជាច្រើនសង្ឃឹមថានឹងធ្វើដំណើរទៅភាគខាងជើងដើម្បីទៅដល់សហរដ្ឋអាមេរិក។

យោងតួលេខពីរដ្ឋាភិបាលរបស់ប្រទេសប៉ាណាម៉ា ជនចំណាកស្រុកនិងអ្នកស្វែងរកសិទ្ធិជ្រកកោនជាង ៥២ម៉ឺននាក់បានឆ្លងកាត់ច្រក Darien Gap កាលពីឆ្នាំមុន ដែលជាចំនួនច្រើនជាងទ្វេដងនៃចំនួនសរុបកាលពីឆ្នាំ២០២២។ ក្នុងចំណោមអ្នកដែលបានឆ្លងកាត់ច្រកនេះនៅឆ្នាំ២០២៣ច្រើនជាង៦០ភាគរយមកពីប្រទេសវេណេហ្ស៊ុយអេឡា។ ប្រទេសនេះព្យាយាមចាកចេញពីវិបត្តិសេដ្ឋកិច្ចសង្គម និងនយោបាយជាច្រើនឆ្នាំដែលខ្លួនបានជួបប្រទះ។ ចំណែកអ្នកផ្សេងទៀតមកពីប្រទេសនៅទូទាំងអាមេរិកខាងត្បូង ការាបៀន អាស៊ី និងអាហ្វ្រិក។

ជាមួយគ្នានេះកាលពីខែមេសា អង្គការឃ្លាំមើលសិទ្ធិមនុស្ស បាននិយាយថា ប្រទេសកូឡុំប៊ី និងប៉ាណាម៉ា បានបរាជ័យក្នុងការការពារមនុស្សដែលឆ្លងកាត់ច្រក Darien Gap និងមិនមានការស៊ើបអង្កេតឱ្យបានគ្រប់គ្រាន់នូវការរំលោភបំពានដែលបានកើតឡើងនៅទីនោះ រួមទាំងអំពើហិង្សាផ្លូវភេទផងដែរ។ ទោះយ៉ាងណា ប្រទេសនេះក៏បានឆ្លើយតបតាមរយៈការសហការជាមួយប្រទេស កូឡុំប៊ី ក្នុងការរារាំងជនចំណាកស្រុកពីការឆ្លងកាត់ផ្លូវដ៏គ្រោះថ្នាក់ និងបញ្ចួនត្រឡប់ទៅប្រទេសដើមកំណើតវិញ៕