ព័ត៌មានអន្ដរជាតិ

មន្ត្រីយោធាចិនចោទអង្គការណាតូកំពុងចំណេញពីសង្គ្រាម រុស្ស៊ី-អ៊ុយក្រែន

បានផុស

៨ ខែ មុន

នៅ

ថ្ងៃសុក្រ ២៦ កក្កដា ២០២៤

ដោយ

ពេលស្នើឲ្យធ្វើអត្ថាធិប្បាយ លើសេចក្តីប្រកាសរបស់អង្គការណាតូ នៅឯកិច្ចប្រជុំកំពូល ក្នុងទីក្រុងវ៉ាស៊ីនតោនឌីស៊ីកាលពីដើមខែនេះ ដែលចង្អុលចំៗថា ទីក្រុងប៉េកាំងគឺជា អ្នកជួយរៀបចំសង្គ្រាមរបស់រុស្ស៊ីប្រឆាំងអ៊ុយក្រែន, អ្នកនាំពាក្យក្រសួងការពារជាតិចិន លោក ចាង ស៊ែវកាង បានច្រានចោលការចោទប្រកាន់គ្មានមូលដ្ឋានខាងលើ ហើយប្រាប់ទៅអ្នកយកព័ត៌មានថា បណ្តាប្រទេសជាសមាជិកសម្ព័ន្ធភាពយោធាណាតូ ដែលដឹកនាំដោយអាមេរិកទៅវិញទេ ដែលកំពុងទទួលបានផលចំណេញពីជម្លោះនៅអ៊ុយក្រែន។

លោក ចាង ស៊ែវកាង (រូបថត៖ ក្រសួងការពារជាតិចិន)

សូមចុច Subscribe Channel Telegram កម្ពុជាថ្មី ដើម្បីទទួលបានព័ត៌មានថ្មីៗទាន់ចិត្ត

តាមការចុះផ្សាយរបស់ RT កាលពីថ្ងៃព្រហស្បតិ៍ ទី២៥ខែកក្កដា ឆ្នាំ២០២៤ លោក ចាង និយាយថា៖«សម្ព័ន្ធភាពយោធាដឹកនាំដោយអាមេរិកនៅតែបន្តដុតភ្លើងនិងទទួលបានផលចំណេញពីសង្គ្រាមនេះ។ អង្គការណាតូត្រូវឆ្លុះកញ្ចក់មើលខ្លួនឯងសិន មុនទម្លាក់កំហុសលើចិន»។

ស្របពេលជាមួយគ្នានោះ លោកថែមទាំងចោទសម្ព័ន្ធលោកខាងលិចមួយនេះថា ចេះតែដើរបង្កជម្លោះជុំវិញពិភពលោក ជាក់ស្តែងដូចជានៅអ៊ុយក្រែន ដល់អាហ្វហ្គានីស្ថាន អ៊ីរ៉ាក់ និងលីប៊ីជាដើម ដែលណាតូបាននាំមកនូវសង្គ្រាម ព្រមទាំងគ្រោះមហន្តរាយដល់តំបន់ទាំងនេះ និងប្រជាជនរបស់ពួកគេ។

ទីក្រុងប៉េកាំងបានច្រានចោលម្តងហើយម្តងទៀតនូវការចោទប្រកាន់ដែលថា ខ្លួនជួយទីក្រុងមូស្គូគេចវេសពីការដាក់ទណ្ឌកម្ម និងជំរុញដល់ឧស្សាហកម្មការពារជាតិរបស់រុស្ស៊ី។ តួយ៉ាង ក្នុងខែកុម្ភៈ ឆ្នាំ២០២៣ ប្រទេសចិន បានដាក់ចេញគោលការណ៍សន្តិភាព១២ចំណុច ហើយចាប់តាំងពីពេលនោះមក ក្នុងអំឡុងកិច្ចប្រជុំជាបន្តបន្ទាប់ជាមួយមន្ត្រីរុស្ស៊ី និងអ៊ុយក្រែន មហាអំណាចចិនបានខិតខំខ្លាំងណាស់ដើម្បីសម្របសម្រួលជម្លោះនេះ។

ជុំវិញជម្លោះរុស្ស៊ីនេះដែរ ទីក្រុងមូស្គូ បានបញ្ជាក់ថា ដើមចមគឺដោយសារតែការពង្រីកខ្លួនរបស់ណាតូទៅទិសខាងកើត និងកិច្ចសហប្រតិបត្តិការយោធាជាមួយក្រុងកៀវ ហើយលោកប្រធានាធិបតី វ្ល៉ាឌីមៀ ពូទីន តែងសង្កត់ធ្ងន់ថា អ៊ុយក្រែនត្រូវតែក្លាយជាប្រទេសអព្យាក្រឹត បោះបង់ចោលគំនិតចូលរួមជាមួយអង្គការណាតូ៕

អត្ថបទ៖ សុខ សុវណ្ណ

ចុចអាន៖ ចិន រិះគន់ការចោទប្រកាន់របស់ណាតូ ដែលថាខ្លួនជាអ្នកចាក់ឲ្យមានសង្គ្រាមនៅអ៊ុយក្រែន