ព័ត៌មានអន្ដរជាតិ

ខណៈកម្ដៅហក់ឡើង អាជ្ញាធរជប៉ុនព្រមានពីហានិភ័យនៃជំងឺដាច់សរសៃឈាមខួរក្បាល

បានផុស

៦ ខែ មុន

នៅ

ថ្ងៃសុក្រ ២៦ កក្កដា ២០២៤

ដោយ

អាជ្ញាធរជប៉ុនជំរុញប្រជាជនតរបស់ខ្លួនចាត់វិធានការការពារជំងឺដាច់សរសៃឈាមខួរក្បាល ស្របពេលកម្ដៅអាចនឹងកើនឡើងខ្លាំងជាថ្មីម្ដងទៀតនៅតាមតំបន់នានាក្នុងប្រទេសជប៉ុននៅថ្ងៃសុក្រនេះ។ យោងការចេញផ្សាយរបស់ទូរទស្សន៍ជាតិជប៉ុន NHK នៅថ្ងៃទី២៦ខែកក្កដានេះ។

សូមចុច Subscribe Channel Telegram កម្ពុជាថ្មី ដើម្បីទទួលបានព័ត៌មានថ្មីៗទាន់ចិត្ត

ទីភ្នាក់ងារឧតុនិយមជប៉ុនបានឲ្យដឹងថា សីតុណ្ហភាពខ្ពស់បានបន្តអូសបន្លាយអស់រយៈពេលជាច្រើនថ្ងៃនៅក្នុងតំបន់ Kanto-Koshin ភាគកណ្តាលនៃប្រទេសជប៉ុន ខណៈកាលពីថ្ងៃព្រហស្បតិ៍ ទីក្រុង Kiryu ក្នុងខេត្ត Gunma ស្ថិតនៅភាគកណ្តាលដូចគ្នា សីតុណ្ណភាពបានកើនឡើងដល់៣៨,៣អង្សាសេ។ ទីភ្នាក់ងារនេះកំពុងព្យាករពីកម្ដៅកើនឡើងខ្លាំងម្តងទៀតនៅតំបន់មួយចំនួននៅថ្ងៃសុក្រនេះ ដោយកម្ដៅនឹងឡើងខ្ពស់នៅពេលថ្ងៃដល់ទៅ៣៧អង្សាសេនៅទីក្រុងMaebashi និង៣៦អង្សាសេនៅទីក្រុងMito។

ចំណែកកម្តៅ៣៥អង្សាសេកើតមាននៅកណ្តាលទីក្រុងតូក្យូ ទីក្រុងYokohama និងទីក្រុងUtsunomiya និងសីតុណ្ហភាព៣១អង្សាសេកើតមាននៅទីក្រុងNiigata។ លើសពីនេះទីភ្នាក់ងារឧតុនិយម និងក្រសួងបរិស្ថានក៏បានចេញសេចក្តីជូនដំណឹងអំពីការឡើងកម្តៅក្នុងខេត្ត Ibaraki កោះ Izu និងខេត្ត Chiba ផងដែរ។

ក្នុងប៉ុន្មានថ្ងៃថ្មីៗនេះ មនុស្សជាច្រើនបានធ្លាក់ខ្លួនឈឺនឹងត្រូវបានគេបញ្ជូនទៅមន្ទីរពេទ្យដោយមានរោគសញ្ញាជំងឺដាច់សរសៃឈាមខួរក្បាល។ ប្រជាជនត្រូវបានដាស់តឿនកុំឲ្យហាត់ប្រាណ និងចៀសវាងការចេញទៅខាងក្រៅតាមដែលអាចធ្វើទៅបាន ហើយជំនួសមកវិញដោយការប្រើម៉ាស៊ីនត្រជាក់ក្នុងផ្ទះឱ្យបានគ្រប់គ្រាន់ និងទទួលទានទឹកនិងអំបិលឱ្យបានទៀងទាត់ ជាពិសេសមនុស្សចាស់និងទារក ព្រោះពួកគេងាយរងគ្រោះដោយជំងឺដាច់សរសៃឈាមខួរក្បាល។

ស្របពេលកម្ដៅហក់ឡើងខ្លាំងស្ទើរពេញប្រទេស ក្រសួងឧតុនិយមក៏បានប្រកាសថា ផ្នែកខ្លះនៃខេត្ត Niigata អាចនឹងមានភ្លៀងធ្លាក់ខ្លាំងនៅថ្ងៃសុក្រនេះ ដោយសារឥទ្ធិពលនៃប្រព័ន្ធសម្ពាធទាប និងភ្លៀងធ្លាក់ខ្លាំង ដោយនៅក្នុងតំបន់ Kanto-Koshin នៅពេលរសៀលអាចបណ្តាលឱ្យមានភ្លៀងធ្លាក់យ៉ាងខ្លាំងជាមួយនឹងផ្លេកបន្ទោរ។ ក្រសួងក៏អំពាវនាវដល់សាធារណជនឲ្យមានការប្រុងប្រយ័ត្នចំពោះទឹកជំនន់ ទឹកទន្លេហក់ឡើង បំណាក់ដី រួមទាំង ផ្គរ រន្ទះ ខ្យល់កន្ត្រាក់ និងការធ្លាក់ព្រឹលជាដើម៕