ព័ត៌មានអន្ដរជាតិ

គ្រោះទឹកជំនន់ និងបាក់ដីនៅវៀតណាម សម្លាប់មនុស្ស១០នាក់ និង៩នាក់បាត់ខ្លួន

បានផុស

៨ ខែ មុន

នៅ

ថ្ងៃសុក្រ ២៦ កក្កដា ២០២៤

ដោយ

Chheang

យ៉ាងហោចណាស់ មនុស្សចំនួន១០នាក់ត្រូវបានសម្លាប់និង៩នាក់ផ្សេងទៀតបានបាត់ខ្លួន បន្ទាប់ពីភាគខាងជើងប្រទេសវៀតណាមទទួលរងគ្រោះដោយសារទឹកជំនន់ និងការបាក់ដី ដែលបង្កឡើងដោយព្យុះព្រះពិរុណនៅក្នុងសប្ដាហ៍នេះ។ នេះបើយោងតាមការប្រកាសរបស់ទីភ្នាក់ងារគ្រប់គ្រងគ្រោះមហន្តរាយវៀតណាមនៅថ្ងៃសុក្រទី២៦ខែកក្កដាឆ្នាំ២០២៤។

សូមចុច Subscribe Channel Telegram កម្ពុជាថ្មី ដើម្បីទទួលបានព័ត៌មានថ្មីៗទាន់ចិត្ត

ព្យុះបានវាយប្រហារខេត្ត Quang Ninh កាលពីថ្ងៃអង្គារ បណ្ដាលឲ្យបាក់ដី និងមានភ្លៀងធ្លាក់ខ្លាំងស្ទើរតែពាសពេញភាគខាងជើងប្រទេសក្នុងរយៈពេលប៉ុន្មានថ្ងៃជាប់ៗគ្នា ដែលធ្វើឲ្យកម្រិតទឹកភ្លៀងមានកម្ពស់លើសពី ៣០សង់ទីម៉ែត្រនៅតាមតំបន់មួយចំនួន។ ក្នុងចំណោមអ្នកស្លាប់ មាន៧នាក់ស្ថិតនៅក្នុងខេត្ត Son La ២នាក់នៅខេត្ត Dien Bien និងម្នាក់នៅរដ្ឋធានីហាណូយ។

ផ្ទះជាច្រើនរយខ្នងនៅខេត្ត Dien Bien បានលិចដល់ដំបូល ខណៈផ្លូវថ្នល់កំពុងស្ថិតនៅក្រោមផ្ទៃទឹក។ បន្ថែមពីនេះ ទឹកជំនន់ និងករណីបាក់ដី បានបំផ្លិចបំផ្លាញស្រូវនិងផលដំណាំជិត៣ម៉ឺនហិកតា ព្រមទាំងសម្លាប់សត្វពាហនៈអស់ជិត២ម៉ឺនក្បាលផងដែរ។

ទីភ្នាក់ងារឧតុនិយមជាតិបានព្យាករថា បន្ទាប់ពីឥទ្ធិពលព្យុះព្រះពិរុណ តំបន់ភាគខាងជើងប្រទេសវៀតណាមនេះនឹងរងការវាយប្រហារសាជាថ្មីម្ដងទៀតដោយសាររលកកម្ដៅនារយៈពេលប៉ុន្មានថ្ងៃឆាប់ៗខាងមុខ៕

ដោយ៖ ឈាង