អាជ្ញាធរ​ កោះ​បាលី ​រឹបអូស​សាច់​ឆ្កែ​រាប់​រយ​ក្បាល ពីអ្នកជួញដូរខុស​ច្បាប់​

ក្រុមមន្ត្រីបាននិយាយថា មន្ត្រីសណ្តាប់ធ្នាប់សាធារណៈនៅកោះបាលីបានរឹបអូសយកដុំសាច់ឆ្កែរាប់រយក្បាល និងសាច់ឆ្កែឆៅរាប់សិបគីឡូក្រាមនៅលើកោះរមណីយដ្ឋានឥណ្ឌូណេស៊ី ដែលជាកន្លែងជួញដូរខុសច្បាប់។ នេះបើយោងតាមការចុះផ្សាយពី Thestar កាលពីថ្ងៃទី២៧ ខែកក្កដា។

កន្លែងទេសចរណ៍បានហាមឃាត់ការជួញដូរសាច់ឆ្កែកាលពីឆ្នាំមុន ដោយជនល្មើសអាចប្រឈមនឹងការជាប់ពន្ធនាគាររហូតដល់ ៣ ខែ ឬពិន័យជាប្រាក់រហូតដល់៣,០៦៤ ដុល្លារ ប្រសិនបើត្រូវបានរកឃើញថាមានកំហុស ប៉ុន្តែការជួញដូរនៅតែមាននៅក្នុងផ្នែកផ្សេងទៀតនៃប្រទេស។

ប្រធានទីភ្នាក់ងារសណ្តាប់ធ្នាប់សាធារណៈកោះបាលីលោក Dewa Nyoman Rai Dharmadi បាននិយាយថា ក្នុងអំឡុងពេលត្រួតពិនិត្យនៅសប្តាហ៍នេះ អាជ្ញាធរបានរកឃើញអ្នកលក់សាច់ឆ្កែបីនាក់ដែលនៅតែធ្វើសកម្មភាពរបស់ពួកគេ ដោយបំពានលើបទប្បញ្ញត្តិក្នុងតំបន់។ ពួកគេបានរឹបអូសសាច់ឆ្កែចំនួន ៥០០ក្បាលពីអ្នកលក់នៅស្រុក Jembrana និងសាច់ឆ្កែឆៅ ៥៦ គីឡូក្រាម ពីអ្នកលក់ម្នាក់ទៀតនៅក្នុងស្រុកដូចគ្នា។

លោកបានប្រាប់ AFP កាលពីថ្ងៃព្រហស្បតិ៍​ថាដែរថា អ្នកលក់ឆ្កែបានទទួលការព្រមានតែប៉ុណ្ណោះ ដោយសារតែគាត់មិនត្រូវបានគេចាប់បានជួញដូរពីមុនមក ខណៈពេលដែលអ្នកលក់ពីរនាក់ទៀតត្រូវបានចាត់ទុកថាជាជនល្មើសដដែលៗ និងមានបទល្មើសព្រហ្មទណ្ឌតិចតួចហើយប្តឹងពួកគេនៅតុលាការក្នុងតំបន់ ​ ខណៈដែលអ្នក​ទាំង​ពីរ​នឹង​ត្រូវ​កាត់​ទោស​នៅ​ខែ​ក្រោយនេះ។

លោក Dewa បាននិយាយទៀតថា អាជ្ញាធរកំពុងបន្តស៊ើបអង្កេតករណីឧក្រិដ្ឋកម្មតូចតាចសម្រាប់ជនល្មើសដដែលៗ ពីព្រោះតែចង់ផ្តល់ឱកាសឲ្យអ្នកលក់សាច់ឆ្កែ ផ្លាស់ប្តូរអាជីវកម្មរបស់ពួកគេឡើងវិញ និងមូលហេតុដែលវាត្រូវបានហាមឃាត់។

ទោះបីយ៉ាងណាក៏ដោយ ឥណ្ឌូណេស៊ី គឺជាប្រទេសមួយក្តាប់តូច ដែលនៅតែអនុញ្ញាតឲ្យលក់សាច់ឆ្កែនិងឆ្មា ប៉ុន្តែយុទ្ធនាការប្រឆាំងនឹងការអនុវត្តនេះ បាននិងកំពុងកើនឡើង ដោយទីក្រុងមួយចំនួន រួមទាំងទីក្រុង Semarang ក្នុងកោះជ្វា បានដាក់បម្រាមក្នុងស្រុកលើការធ្វើពាណិជ្ជកម្មក្នុងប៉ុន្មានឆ្នាំថ្មីៗ៕

សូមចុច Subscribe Channel Telegram កម្ពុជាថ្មី ដើម្បីទទួលបានព័ត៌មានថ្មីៗទាន់ចិត្ត

អត្ថបទ៖ សាង ស្រីល័ក្ខ

ចុចអាន៖FDA ថៃ ព្រមានថ្នាំលាបសក់ល្បីមួយ ក្រោយរកឃើញផ្សិត និងបាក់តេរីខ្ពស់ជាងស្តង់ដារ ៥០០ ដង