ព័ត៌មានអន្ដរជាតិ

បារាំង ស៊ើបអង្កេតលើសារគំរាមសម្លាប់អត្តពលិកអ៊ីស្រាអែលនៅប៉ារីស

បានផុស

៧ ខែ មុន

នៅ

ថ្ងៃចន្ទ ២៩ កក្កដា ២០២៤

ដោយ

រដ្ឋអាជ្ញាបារាំងបានបើកការស៊ើបអង្កេតលើការគំរាមសម្លាប់អត្តពលិកអ៊ីស្រាអែល៣នាក់ដែលចូលរួមប្រកួតកីឡាអូឡាំពិកក្រុងក្នុងទីក្រុងប៉ារីស។ នេះបើយោងតាមការចេញផ្សាយរបស់ទូរទស្សន៍ជាតិជប៉ុន NHK នៅថ្ងៃទី២៩ខែកក្កដានេះ។

សូមចុច Subscribe Channel Telegram កម្ពុជាថ្មី ដើម្បីទទួលបានព័ត៌មានថ្មីៗទាន់ចិត្ត

ការិយាល័យរដ្ឋអាជ្ញាទីក្រុងប៉ារីសបានឲ្យដឹងថា អ៊ីមែលគំរាមសម្លាប់ត្រូវបានផ្ញើទៅកាន់អត្តពលិកអ៊ីស្រាអែលបីនាក់ដែលចូលរួមប្រកួតកីឡាអូឡាំពិក ខណៈខ្លឹមសារនៃការគំរាមកំហែងនៅក្នុងអ៊ីមែលមិនត្រូវបានបង្ហាញនោះទេ។
ក្រុមអ្នកស៊ើបអង្កេតកំពុងស៊ើបអង្កេតលើឧប្បត្តិហេតុនេះ ដោយសង្ស័យថាវាអាចជាការគំរាមកំហែងសម្លាប់ដោយមូលហេតុរើសអើងប្រឆាំងនឹងអ៊ីស្រាអែល។

ចំណែកយោងតាមទីភ្នាក់ងារព័ត៌មាន AFP បានរាយការណ៍ថា ព័ត៌មានផ្ទាល់ខ្លួនរបស់អត្តពលិកអ៊ីស្រាអែលដែលចូលរួមក្នុងការប្រកួតកីឡាត្រូវបានចេញផ្សាយដោយខុសច្បាប់នៅលើ Telegram កាលពីថ្ងៃសុក្រ អំឡុងពេលពិធីបើកកីឡាអូឡាំពិកបានកើតឡើង។ព័ត៌មានទាំងនោះមានដូចជាព័ត៌មានលម្អិតផ្ទាល់ខ្លួនរបស់អត្តពលិកជនជាតិអ៊ីស្រាអែលរួមទាំងលទ្ធផលតេស្តឈាម និងលិខិតបញ្ជាក់ការចូល ប៉ុន្តែទិន្នន័យទាំងនេះត្រូវបានលុបចេញតាមសំណើរបស់អាជ្ញាធរបារាំង។

សុវត្ថិភាពរបស់អត្តពលិកអ៊ីស្រាអែល គឺជាបញ្ហាប្រឈមមួយសម្រាប់អាជ្ញាធរបារាំង ខណៈដែលការប្រយុទ្ធនៅតែបន្តនៅក្នុងតំបន់ហ្គាហ្សា រវាងកងកម្លាំងអ៊ីស្រាអែល និងក្រុមអ៊ីស្លាមហាម៉ាស។ដើម្បីរឹតបន្តឹងការការពារអត្តពលិកអ៊ីស្រាអែលត្រូវបានយកចិត្តទុកការពារសុវត្តិភាព២៤ម៉ោងលើ២៤ម៉ោងជាងអត្តពលិកផ្សេងទៀត។

ទាក់ទងនឹងបញ្ហានេះកាលពីសប្តាហ៍មុន រដ្ឋមន្ត្រីការបរទេសរបស់អ៊ីស្រាអែលបានព្រមានសមភាគីបារាំងអំពីផែនការដែលគាំទ្រដោយអ៊ីរ៉ង់ ដើម្បីកំណត់គោលដៅអត្តពលិក និងអ្នកទេសចរអ៊ីស្រាអែល ក្នុងអំឡុងការប្រកួតកីឡាអូឡាំពិកក្នុងទីក្រុងប៉ារីស។ជាមួយគ្នានេះអ៊ីស្រាអែលក៏បានព្រមានប្រទេសបារាំងអំពីការយាយីតាមអ៊ីនធឺណិតលើអត្តពលិករបស់ខ្លួន និងការលេចធ្លាយទិន្នន័យផ្ទាល់ខ្លួនដែលអ៊ីស្រាអែលបានចោទប្រកាន់អ៊ីរ៉ង់ជាអ្នកនៅពីក្រោយ។

លើសពីនេះនៅក្នុងព្រឹត្តិការកីឡាដ៏ធំនេះក៏មានអ្នកគាំទ្រប្រហែល ៥០នាក់នៅក្នុងហ្វូងមនុស្សបានស្រែកច្រៀងជាភាសាបារាំងប្រឆាំងនឹងអ៊ីស្រាអែល និងអំពីសង្គ្រាមហ្គាហ្សា ដោយស្រែកថា «Israel Killer» និង «srael is killing the children’s Palestine»។ចំណែកអ្នកគាំទ្រអ៊ីស្រាអែលមួយចំនួននៅក្នុងកីឡដ្ឋានបានស្រែកតបវិញថា «ដោះលែងចំណាប់ខ្មាំង»។ បើយោងតាមសេចក្តីថ្លែងការណ៍ពីការិយាល័យរដ្ឋអាជ្ញាបារាំង អ្នកគាំទ្រទាំងនោះអាចត្រូវបានចោទប្រកាន់ពីបទញុះញង់ឲ្យមានការរើសអើងពូជសាសន៍៕