ព័ត៌មានអន្ដរជាតិ

សិស្ស១ម៉ឺននាក់ និងគ្រូបង្រៀន៤០០នាក់ ត្រូវបានសម្លាប់នៅតំបន់ហ្គាហ្សា

បានផុស

២ ខែ មុន

នៅ

ថ្ងៃចន្ទ ២៩ កក្កដា ២០២៤

ដោយ

Chheang

ក្រសួងអប់រំប៉ាឡេស្ទីន បានប្រកាសថា សិស្សសាលាចំនួន១ម៉ឺននាក់ និងគ្រូបង្រៀន៤០០នាក់ ត្រូវបានសម្លាប់នៅក្នុងតំបន់ហ្គាហ្សាស្ទ្រីប ដោយសារភ្លើងសង្គ្រាមរវាងអ៊ីស្រាអែល និងក្រុមសកម្មប្រយុទ្ធហាម៉ាសក្នុងរយៈពេលជាង៩ខែកន្លងទៅនេះ។

សូមចុច Subscribe Channel Telegram កម្ពុជាថ្មី ដើម្បីទទួលបានព័ត៌មានថ្មីៗទាន់ចិត្ត

បើតាមទិន្នន័យពីអង្គការសហប្រជាជាតិ សាលារៀនច្រើនជាង៧៦ភាគរយនៅក្នុងតំបន់ហ្គាហ្សា បានរងការបំផ្លិចបំផ្លាញទាំងស្រុង ដែលតម្រូវឲ្យមានការជួសជុល ឬសាងសង់ឡើងវិញទើបអាចដំណើរការបន្តបាន ខណៈសិស្សប្រមាណ ៦២ម៉ឺននាក់នៅទីនោះមិនអាចទទួលបានការអប់រំ ហើយពួកគេភាគច្រើនរងការឈឺចាប់ផ្នែកផ្លូវអារម្មណ៍ និងប្រឈមនឹងកត្តាប៉ះពាល់ផ្នែកសុខភាពរាងកាយ។

ប្រជាជនប្រមាណជាង២លាននាក់ កំពុងរស់នៅក្នុងតំបន់ហ្គាហ្សា ហើយត្រូវបានអ៊ីស្រាអែលកាត់ផ្ដាច់អគ្គិសនី ប្រេងឥន្ធនៈ ស្បៀងអាហារ និងទឹកស្អាត។

ជម្លោះចុងក្រោយរវាងអ៊ីស្រាអែល និងហាម៉ាស បានឆាបឆេះឡើងនៅថ្ងៃទី៧ខែតុលាឆ្នាំ២០២៣ នៅពេលដែលក្រុមសកម្មប្រយុទ្ធហាម៉ាសបានវាយប្រហារភាគខាងត្បូងអ៊ីស្រាអែលពីតំបន់ហ្គាហ្សា ដោយបានសម្លាប់មនុស្ស ១២០០នាក់ និងចាប់យកចំណាប់ខ្មាំងជាង២៥០នាក់។

ចាប់ពីពេលនោះមក ការវាយប្រហារសងសឹករបស់អ៊ីស្រាអែលនៅតំបន់ហ្គាហ្សា បានសម្លាប់មនុស្សជាង ៣៩០០០នាក់និងបណ្តាលឲ្យមានគ្រោះមហន្តរាយមនុស្សធម៌យ៉ាងធ្ងន់ធ្ងរលើជនស៊ីវិលប៉ាឡេស្ទីន៕

ដោយ៖ ឈាង