ព័ត៌មានអន្ដរជាតិ

ស្លូវ៉ាគី គំរាមផ្អាកផ្គត់ផ្គង់ប្រេងឲ្យអ៊ុយក្រែន បើនៅតែដាក់ទណ្ឌកម្មក្រុមហ៊ុនរុស្ស៊ី

បានផុស

៧ ខែ មុន

នៅ

ថ្ងៃអង្គារ ៣០ កក្កដា ២០២៤

ដោយ

Chheang

លោក Robert Fico នាយករដ្ឋមន្ត្រីស្លូវ៉ាគី បាននិយាយកាលពីថ្ងៃទី២៩ខែកក្កដាថា រោងចក្រចម្រាញ់ប្រេង Slovnaft នឹងផ្អាកការផ្គត់ផ្គង់ប្រេងម៉ាស៊ូតទៅឲ្យប្រទេសអ៊ុយក្រែន ប្រសិនបើក្រុងកៀវនៅតែបន្តទណ្ឌកម្មលើក្រុមហ៊ុនប្រេងរុស្ស៊ី។

លោក Robert Fico នាយករដ្ឋមន្ត្រីស្លូវ៉ាគី (រូបភាព៖ AP)

សូមចុច Subscribe Channel Telegram កម្ពុជាថ្មី ដើម្បីទទួលបានព័ត៌មានថ្មីៗទាន់ចិត្ត

កាលពីខែមិថុនា អ៊ុយក្រែនបានដាក់ទណ្ឌកម្ម និងបញ្ឈប់ការដឹកជញ្ជូនប្រេងតាមរយៈបំពង់បង្ហូររបស់ក្រុមហ៊ុនរុស្ស៊ី Lukoil ដែលត្រូវឆ្លងកាត់អ៊ុយក្រែន មុនទៅដល់សាធារណរដ្ឋស្លូវ៉ាគី និងហុងគ្រី។ រដ្ឋមន្ត្រីសេដ្ឋកិច្ចស្លូវ៉ាគី ធ្លាប់បាននិយាយកាលពីដើមខែកក្កដាថា ការដឹកប្រេងពីក្រុមហ៊ុន Lukoil ចូលទៅប្រទេសរបស់លោកបានរីងស្ងួតអស់ហើយ។

នាយករដ្ឋមន្ត្រីស្លូវ៉ាគី បានរៀបរាប់ថា ការបន្តការអនុវត្តទណ្ឌកម្មដ៏មិនសមហេតុផលនេះ នឹងផ្ដល់ផលអាក្រក់ចំពោះតែអ៊ុយក្រែន ស្លូវ៉ាគី និងហុងគ្រី ប៉ុណ្ណោះ។ លោក Fico ថា៖ «បើការដឹកជញ្ជូនប្រេងរុស្ស៊ីឆ្លងកាត់អ៊ុយក្រែនមិនត្រូវបានបើកឡើងវិញក្នុងរយៈពេលខ្លីទេ រោងចក្រ Slovnaft ដែលមានចំណែកមួយភាគដប់នៃការប្រើប្រាស់របស់អ៊ុយក្រែន នឹងឈប់ផ្គត់ផ្គង់ប្រេងម៉ាស៊ូតទៅអ៊ុយក្រែន»។ លោក Fico ក៏បានឲ្យដឹងទៀតដែរថា កាលពីថ្ងៃសុក្រសប្ដាហ៍មុន លោកបានលើកយកសំណើបច្ចេកទេសដើម្បីដោះស្រាយបញ្ហានេះឲ្យបានឆាប់រហ័សជាទីបំផុតជាមួយនាយករដ្ឋមន្ត្រីអ៊ុយក្រែន លោក Denys Shmyhal។

បញ្ហាប្រឈមដែលកំពុងកើតមាននេះ បានបង្ហាញឲ្យឃើញថា បណ្ដាប្រទេសសហភាពអឺរ៉ុបមួយចំនួននៅតែពឹងផ្អែកលើការផ្គត់ផ្គង់ថាមពលរបស់រុស្ស៊ីក្នុងរយៈពេលជាង២ឆ្នាំកន្លងទៅ ក្រោយពីប្លុកនេះបានសម្រេចបញ្ឈប់ការនាំចូលប្រេងពីក្រុងមូស្គូ បន្ទាប់ពីផ្ទះមានសង្គ្រាមឈ្លានពាននៅអ៊ុយក្រែន។

ខុសពីសម្ព័ន្ធមិត្តរបស់ខ្លួន សាធារណរដ្ឋស្លូវ៉ាគី ហុងគ្រី និងសាធារណរដ្ឋឆែក នៅតែមិនទាន់មានការហាមឃាត់ការនាំចូលប្រេងពីរុស្ស៊ីនៅឡើយទេ ខណៈប្រទេសទាំងនោះត្រូវការពេលមួយរយៈបន្ថែមទៀតដើម្បីរកជម្រើសនាំចូលប្រេងផ្សេងជាមុនសិន៕

ដោយ៖ ឈាង