វៀតណាម ជួបគ្រោះផ្ទួនៗ រញ្ជួយដីផង ទឹកជំនន់ផង ឥឡូវបាក់អណ្តូងរ៉ែ ស្លាប់កម្មករទៀត

ប៉ុន្មានថ្ងៃមកនេះ ប្រទេសវៀតណាម បានជួបគ្រោះអាក្រក់ជាបន្តបន្ទាប់ ពោលគឺកើតមានទឹកជំនន់ផង រញ្ជួយដីផង ហើយចុងក្រោយបំផុត វៀតណាម ជួបហេតុការណ៍បាក់អណ្តូងរ៉ែទៀត។

សូមចុច Subscribe Channel Telegram កម្ពុជាថ្មី ដើម្បីទទួលបានព័ត៌មានថ្មីៗទាន់ចិត្ត

តាមការចុះផ្សាយរបស់​ VN Express នៅថ្ងៃអង្គារទី៣០ខែកក្កដាឆ្នាំ២០២៤, អណ្តូងរ៉ែធ្យូងថ្ម Suoi Lai របស់ក្រុមហ៊ុន Hon Gai Coal ស្ថិតក្នុងទីក្រុង Ha Long បានបាក់ពេលមេឃភ្លៀងខ្លាំងនាម៉ោង១០:១០នាទីយប់ ថ្ងៃចន្ទ ដោយសង្កត់ស្លាប់កម្មករចំនួន៥នាក់។

អាជ្ញាធរខេត្ត Quang Ninh បញ្ជាក់ថា ក្រុមជួយសង្គ្រោះត្រូវរង់ចាំរហូតដល់ម៉ោង៥:២៨នាទីព្រឹកថ្ងៃអង្គារទើបអាចយកសាកសពកម្មករទាំង៥ ចេញមកក្រៅបាន។ 

ហេតុការណ៍នេះកើតឡើងក្រោយពេលមានសេចក្តីរាយការណ៍ថា ​​ក្នុង​ខែ​កក្កដា​នេះ គ្រោះ​ទឹក​ជំនន់​និងបំណាក់​ដី បាន​បណ្ដាល​ឲ្យ​មាន​មនុស្ស​ស្លាប់​ចំនួន​១៨​នាក់ហើយ ​​នៅ​តាម​​តំបន់​ភាគ​ខាង​​ជើង​​ប្រទេស​វៀតណាម ខណៈតាមការព្យាករ ប៉ុន្មានថ្ងៃខាងមុខ ភ្លៀងនឹងបន្តធ្លាក់មកខ្លាំងបន្ថែមទៀត។

ទឹក​ជំនន់​ពី​តំបន់​ភ្នំ​​ភាគ​ខាង​ជើង​ប្រទេស​វៀតណាម បាន​ហូរ​ចាក់​​មក​ដល់​​ច្រាំង​ទន្លេ​តំបន់​ជាយ​ក្រុង​ហាណូយ បណ្ដាល​ឲ្យ​ជន់​លិច​​ផ្ទះ​សម្បែង​ប្រជាជនអស់​ជា​ច្រើន​ខ្នង។

មិនត្រឹមប៉ុណ្ណឹង ខេត្ត Kon Tum នៃប្រទេសវៀតណាម ក៏ទើបជួបគ្រោះរញ្ជួយដីដែរ ពោលគឺត្រឹម២ថ្ងៃប៉ុណ្ណោះ ខេត្តនេះកើតរញ្ជួយដីរហូតដល់ទៅ៣៤លើក។

តាមការចុះផ្សាយរបស់ Tuoi Tre, គ្រោះរញ្ជួយដីដំបូង បានកើតឡើងនៅរសៀលថ្ងៃអាទិត្យ រួចក៏បន្តឈានចូលដល់ព្រឹកថ្ងៃចន្ទ ជាមួយកម្លាំងខ្លាំងបំផុតគឺ ៥.០ រ៉ិចទ័រ ដែលបង្កជាការខូចខាតតិចតួចដល់ខេត្ត Kon Tum។

ត្បិតតែខេត្ត​ Kon Tum ធ្លាប់ជួបគ្រោះរញ្ជួយដីក៏ពិតមែន ប៉ុន្តែបើយោងតាមវិទ្យាស្ថានភូគព្ភសាស្ត្រវៀតណាម, ការរញ្ជួយញឹកញាប់បែបនេះ គឺមិនធ្លាប់មានកើតមានឡើយ។

សូមបញ្ជាក់ថា ចាប់ពីឆ្នាំ១៩០៣ ដល់ឆ្នាំ២០២០ ការរញ្ជួយដីត្រឹមជាង៣០លើកប៉ុណ្ណោះ ត្រូវបានកត់ត្រានៅក្នុងខេត្ត Kon Tum ជាមួយកម្លាំងខ្លាំងបំផុត ៣.៩រ៉ិចទ័រ។ យ៉ាងណា ចាប់តាំងពីខែមេសាឆ្នាំ២០២១មក ការរញ្ជួយដីរាប់រយលើក បានកើតឡើងនៅក្នុងខេត្តនេះ រួមទាំងការរញ្ជួយកម្រិតខ្លាំងមួយចំនួន កាលពីថ្ងៃអាទិត្យផងដែរ៕

អត្ថបទ៖ សុខ សុវណ្ណ

ចុចអាន៖ វៀតណាម រញ្ជួយដី២ថ្ងៃជាប់គ្នា សរុប ៣៤លើក