ស្រ្តី​​ម្នាក់ស្លាប់​និង១៤០នាក់ធ្លាក់ខ្លួនឈឺ​ ដោយសារ​​ពុល​អន្ទង់អាំង​ដ៏​ពេញនិយមនៅជប៉ុន​

ឧប្បត្តិហេតុពុលអាហារដែលមានអន្ទង់អាំងនៅក្នុងហាង Keikyu ក្នុងទីក្រុង Yokohama បានបណ្តាលឲ្យមនុស្សជាង១៤០នាក់ធ្លាក់ខ្លួនឈឺ និងម្នាក់បានស្លាប់។ យោងតាមការចេញផ្សាយរបស់សារព័ត៌មាន CNA នៅថ្ងៃទី​៣០ខែកក្កដានេះ។

លោក Shinji Kaneko ប្រធានផ្នែកក្នុង​ហាង Keikyu ក្នុងទីក្រុង Yokohama បានចេញមុខសុំទោស បន្ទាប់ពីអតិថិជនដែលកាលពីសប្តាហ៍មុនបានទិញប្រអប់អាហារថ្ងៃត្រង់ដាក់អន្ទង់អាំងបានធ្លាក់ខ្លួនឈឺដោយមានអាការៈដូចជាក្អួត និងរាគ ខណៈអតិថិជនស្ត្រី​ចំណាស់​ម្នាក់​វ័យ៩០ឆ្នាំ​បានទទួលមរណភាព។

នៅក្នុងអាហារដែលពុលនោះរួមមានអន្ទង់ដែលចម្អិនតាមបែបប្រពៃណីហៅថា «kabayaki»​ ដោយចៀន ដុត និងដាក់ក្នុងល្បាយដែលមាន ទឹកស៊ីអ៊ីវ និងស្រាអង្ករមីរិន ខណៈការស៊ើបអង្កេតរបស់មន្ត្រីសុខាភិបាលបានរកឃើញបាក់តេរីមួយប្រភេទហៅថា Staphylococcus aureus នៅក្នុងអាហារនោះ។ ទាក់ទងបញ្ហានេះដែរ ភោជនីយដ្ឋាន Isesada ដែលមានមូលដ្ឋាននៅទីក្រុងតូក្យូ ដែលដំណើរការផ្នែកខាងក្នុងហាង Keikyu ទទួលខុសត្រូវក្នុងការចម្អិនអាហារ និងលក់ផលិតផលអន្ទង់ដោយផ្ទាល់។

យ៉ាងណាមិញ លោក Kaneko ដែលជាប្រធានផ្នែក ក៏បានសុំទោសនិងចូលរួមរំលែកទុក្ខយ៉ាងក្រៀមក្រំ​និង​ជ្រាលជ្រៅដល់គ្រួសារជនរងគ្រោះ និងសហការយ៉ាងពេញលេញជាមួយនឹងការស៊ើបអង្កេតដោយអាជ្ញាធរសុខភាពសាធារណៈ។

គួរបញ្ជាក់ថា អន្ទង់អាំង ឬ unagi ដែលជាអាហារដ៍ឆ្ងាញ់​និង​ពេញ​និយម​នៅរដូវក្តៅនៅក្នុងប្រទេសជប៉ុន ត្រូវបានបរិភោគទូទាំងពិភពលោកជាពិសេសនៅអាស៊ី ខណៈប្រវត្តិសាស្រ្តរបស់ជប៉ុន បង្ហាញថា វាត្រូវបានបរិភោគនៅប្រជុំកោះរបស់ជប៉ុនរាប់ពាន់ឆ្នាំមកហើយ៕

អត្ថបទ៖ ប៊ុន សុភាព