ជំនន់​ទឹកភ្លៀង​ប៉ះពាល់​មនុស្ស​​ជាង​១លាននាក់​នៅខេត្ត Hunan ប្រទេសចិន

ភ្លៀងធ្លាក់ខ្លាំងបានប៉ះពាល់ដល់ប្រជាជនចំនួន ១,១៥ លាននាក់នៅក្នុងខេត្ត Hunan ភាគកណ្តាលប្រទេសចិន ចាប់តាំងពីថ្ងៃទី២៦ខែកក្កដានាំឲ្យខាតបង់សេដ្ឋកិច្ចប្រហែល ៦,១៣ពាន់លានយ័ន (ប្រហែល ៨៤៧លានដុល្លារ)។ នេះបើយោងតាមការចេញផ្សាយរបស់សារព័ត៌មាន CGTN​របស់​ប្រទេស​ចិន​​នៅថ្ងៃទី៣១ខែកក្កដានេះ។

ព្យុះភ្លៀង​ដែល​ទទួល​រងឥទ្ធិពល​ពីព្យុះទីហ្វុង Gaemi បានបង្ខំឱ្យមានការជម្លៀសមនុស្ស​ជិត​១០​ម៉ឺន​​នាក់នៅក្នុងខេត្ត Hunan ដោយ៤៩,៨០០នាក់​ ត្រូវការជំនួយសង្គ្រោះបន្ទាន់ ខណៈភ្លៀងធ្លាក់ខ្លាំងនេះ ក៏បានបំផ្លាញដំណាំចំនួន​១០៧,៥០០ ហិកតា ដែលក្នុងនោះ ១៧,១០០ ហិកតាបានខូតខាតទាំងស្រុង។

បច្ចុប្បន្ននេះ ខេត្ត Hunan កំពុង​ត្រៀម​វិធានការ​​ឆ្លើយតប​​​ចំពោះ​ទឹកជំនន់​ដែល​កើន​ឡើង​ខ្ពស់បំផុតទីពីរនៅក្នុងប្រព័ន្ធព្រមានបួនកម្រិត ខណៈតំបន់និងស្រុកសរុបចំនួន ៧៨ ក្នុងខេត្តបានរក្សាកម្រិតផ្សេងគ្នានៃការឆ្លើយតបគ្រាអាសន្ន ដែលក្នុងនោះទីក្រុង Zixing និង Huarong បានឆ្លើយតបសង្គ្រោះបន្ទាន់កម្រិត I។ គិតត្រឹមថ្ងៃទី ៣០ ខែកក្កដា ឧទ្ធម្ភាគចក្របានហោះហើរចំនួន ១៨១គ្រឿង បាន​ដឹក​សម្ភារៈផ្គត់ផ្គង់ចំនួន៤៨,៤ តោន និងបានផ្ទេរអ្នករងរបួសចំនួន ៦១នាក់ ក្នុងរយៈពេលហោះហើរសរុបចំនួន ៧០ម៉ោង។

ក្រៅពីទឹកស្អាត អង្ករ និងសម្ភារៈប្រើប្រាស់ប្រចាំថ្ងៃផ្សេងទៀត ម៉ាស៊ីនភ្លើងចំនួន២៥ នឹងត្រូវដឹកជញ្ជូនទៅកាន់ភូមិនានាដែលកំពុងដាច់ចរន្តអគ្គិស ខណនាយកដ្ឋានឧតុនិយមខេត្តបានព្យាករណ៍ថានឹងមានភ្លៀងធ្លាក់ខ្លាំងនៅភាគពាយ័ព្យខេត្តនេះរយៈពេលពីមួយទៅពីរថ្ងៃបន្ទាប់ថែមទៀត ។

យោងតាមលោក Fu Jinling អគ្គនាយកនៃនាយកដ្ឋានសំណង់សេដ្ឋកិច្ចនៃក្រសួងហិរញ្ញវត្ថុបាននិយាយនៅក្នុងសន្និសីទសារព័ត៌មាននៅថ្ងៃពុធនេះថាប្រទេសចិនបានបែងចែកប្រាក់សរុបចំនួន១១,៥ ពាន់លានយ័ន (ប្រហែល ១,៥៦ ពាន់លានដុល្លារ) ដើម្បីជួយដល់ការសង្គ្រោះគ្រោះមហន្តរាយនៅឆ្នាំនេះ។

គួរបញ្ជាក់ថាប្រទេសចិនមានប្រព័ន្ធឆ្លើយតបបន្ទាន់ចំនួនបួនសម្រាប់ការគ្រប់គ្រងទឹកជំនន់ ដោយកម្រិត I ជាការឆ្លើយតបបន្ទាន់បំផុត និងប្រព័ន្ធព្រមានអាកាសធាតុដែលមានកូដពណ៌ចំនួន ៤ កម្រិត ជាមួយនឹងពណ៌ក្រហមតំណាងឱ្យការព្រមានធ្ងន់ធ្ងរបំផុត បន្ទាប់មកគឺពណ៌ទឹកក្រូច លឿង និងខៀវ៕

អត្ថបទ៖ ប៊ុន សុភាព