ព័ត៌មានអន្ដរជាតិ

ជាង១១០ថ្ងៃ ជីវិតរបស់លោក Haniyeh ត្រូវបញ្ចប់ដូចជីវិតកូនៗនិងចៅៗ

បានផុស

៤ ខែ មុន

នៅ

ថ្ងៃពុធ ៣១ កក្កដា ២០២៤

ដោយ

បន្ទាប់ពីបាត់បង់ជីវិតកូនៗនិងចៅៗ រយៈពេល៣ខែនិង២០ថ្ងៃ មេដឹកនាំនយោបាយដ៏សំខាន់របស់ក្រុមហាម៉ាស លោក Ismail Haniyeh បានបាត់បង់ជីវិតក្រោមគ្រាប់អាវុធអ៊ីស្រាអែលក្រោមការបញ្ជាបាញ់ពីចម្ងាយបង្កការភ្ញាក់ផ្អើលទូទាំងសកលលោក ហើយ ក្តីសង្ឃឹមក្នុងការចរចាបទឈប់បាញ់ដើម្បីបញ្ចប់សង្គ្រាមត្រូវរលាយសាបសូន្យ។

លោក Ismail Haniyeh មេដឹកនាំនយោបាយរបស់ក្រុមហាម៉ាស។ Anadolu

សូមចុច Subscribe Channel Telegram កម្ពុជាថ្មី ដើម្បីទទួលបានព័ត៌មានថ្មីៗទាន់ចិត្ត

កាលពីថ្ងៃទី១០ខែមេសាឆ្នាំ២០២៤ មេដឹកនាំនយោបាយដ៏លេចធ្លោក្នុងទំនាក់ទំនងការទូតរបស់ក្រុមហាម៉ាសរូបនេះ បានបាត់បង់ជីវិតកូនប្រុស៣នាក់និងចៅៗ៤នាក់ក្នុងសង្គ្រាមនៅតំបន់ហ្គាហ្សាដោយសារការបាញ់ផ្លោងតាមផ្លូវអាកាសរបស់យោធាអ៊ីស្រាអែល ដែលសងសឹកចំពោះក្រុមហាម៉ាសឆ្មក់ចូលទឹកដីអ៊ីស្រាអែលសម្លាប់មនុស្សយ៉ាងហោច១២០០នាក់ ព្រមទាំងចាប់ជាចំណាប់ខ្មាំង២៤០នាក់។

មរណៈភាពរបស់ លោក Ismail Haniyeh នៅថ្ងៃទី៣០ខែកក្កដាក្នុងការបញ្ជាបាញ់ប្រហារពីចម្ងាយនៅម៉ោងប្រហែល២រំលងអាធ្រាត្រ ចំពេលដែលប្រជាជនប៉ាឡេស្ទីន យ៉ាងហោចណាស់៣៩៤០០នាក់បាត់បង់ជីវិត និងរងរបួសចំនួន៩០៩៩៦នាក់ ក្នុងសង្គ្រាមនៅតំបន់ហ្គាហ្សាចាប់តាំងពីសង្គ្រាមបានផ្ទុះឡើងកាពីថ្ងៃទី៧ខែតុលាឆ្នាំ២០២៣។

លោក Ismail Haniyeh ត្រូវបានគេដឹងថា បានកាន់កាប់តួនាទីកំពូលរបស់ក្រុមហាម៉ាសក្នុងឆ្នាំ២០១៧ ហើយ លោកតែងតែធ្វើដំណើរចុះឡើងរវាងប្រទេសតួកគីនិងប្រទេសកាតា ដែលធ្វើឱ្យលោកក្លាយជាអ្នកចរចាដ៏សំខាន់ជាមួយប្រទេសសម្របសម្រួលឱ្យមានបទឈប់បាញ់កន្លងមក។

កូនប្រុសទាំង៣របស់លោកដែលបាត់បង់ជីវិតកាលពីថ្ងៃទី១០ខែមេសា មានឈ្មោះ Hazem Amir និង Mohammad ពេលដែលពួកគេបើកបររថយន្តហើយយោធាអ៊ីស្រាអែលបានបញ្ជាបាញ់តាមផ្លូវអាកាស។

ក្រៅពីការបាត់បង់កូនប្រុស លោក Ismail Haniyeh ក៏បានបាត់បង់ចៅៗចំនួន៧នាក់ ដោយក្នុងនោះ ចៅប្រុសម្នាក់ និង ចៅស្រីចំនួន៤នាក់ក្នុងហេតុការណ៍បាញ់តាមផ្លូវអាកាសកាលពីខែមេសានោះ។ នេះបើយោងតាមទីភ្នាក់ងាររ៉យទ័រដែលដកស្រង់សេចក្តីប្រកាសរបស់ក្រុមហាម៉ាស។

ទោះបីយ៉ាងណាក៏ដោយ ការបាញ់ប្រហារលើលោក Ismail Haniyeh បានបង្កឱ្យមានការឈឺចាប់យ៉ាងខ្លាំងក្នុងចំណោមក្រុមចលនាតស៊ូប្រឆាំងអ៊ីស្រាអែលនិងសហរដ្ឋអាមេរិក ប៉ុន្តែមេដឹកនាំពិភពលោកសំខាន់ៗហាក់រក្សាភាពស្ងាត់ស្ងៀម ដោយចេញសេចក្តីថ្លែងការណ៍ថ្កោលទោសត្រឹមមន្ត្រីការទូតថ្នាក់ក្រោម។

ប្រទេសរុស្ស៊ីចេញប្រតិកម្មត្រឹមកម្រិតអនុរដ្ឋមន្ត្រីការបរទេសប៉ុណ្ណោះ ខណៈក្រសួងការបរទេសចិនក៏បានចេញសេចក្តីថ្លែងការណ៍ថ្កោលទោសដែរ។ ក្រៅពីនោះមានតែប្រទេសនៅអារ៉ាប់មួយចំនួនដែលមានប្រវត្តិមិនចុះសម្រុងជាមួយអ៊ីស្រាអែល ទើបបង្ហាញប្រតិកម្មចំពោះមរណៈភាពរបស់លោក Haniyeh៕