ព័ត៌មានអន្ដរជាតិ

កូរ៉េខាងជើងចង់បើកកិច្ចចរចានុយក្លេអ៊ែរឡើងវិញ បើលោក ត្រាំ ឈ្នះឆ្នោតនៅអាមេរិក

បានផុស

២ ខែ មុន

នៅ

ថ្ងៃព្រហស្បតិ៍ ១ សីហា ២០២៤

ដោយ

Chheang

ប្រទេសកូរ៉េខាងជើងចង់បើកកិច្ចចរចានុយក្លេអ៊ែរឡើងវិញជាមួយសហរដ្ឋអាមេរិក ប្រសិនបើលោក ដូណាល់ ត្រាំ ជាប់ឆ្នោតជាប្រធានាធិបតីសាជាថ្មីម្ដងទៀត។ នេះបើយោងតាមការចុះផ្សាយរបស់ទីភ្នាក់ងារព័ត៌មាន Reuters នៅថ្ងៃទី១ខែសីហាឆ្នាំ២០២៤ ដែលបានធ្វើបទសម្ភាសន៍ជាមួយអតីតមន្ត្រីការទូតជាន់ខ្ពស់កូរ៉េខាងជើងម្នាក់ ដែលទើបតែបានរត់គេចខ្លួនពីគុយបាទៅកូរ៉េខាងត្បូងកាលពីពេលថ្មីៗ។

លោក គីម ជុងអ៊ុន និងលោក ដូណាល់ ត្រាំ (រូបថត៖ AP)

សូមចុច Subscribe Channel Telegram កម្ពុជាថ្មី ដើម្បីទទួលបានព័ត៌មានថ្មីៗទាន់ចិត្ត

ការរត់គេចខ្លួនរបស់លោក Ri Il Gyu បានធ្វើឲ្យមានការចាប់អារម្មណ៍ទូទាំងពិភពលោកកាលពីខែកក្កដា ព្រោះតែលោកគឺជាមន្ត្រីការទូតកូរ៉េខាងជើងមានឋានៈខ្ពស់បំផុត ដែលរត់ចោលស្រុកគិតចាប់តាំងពីឆ្នាំ២០១៦។

លោក Ri បាននិយាយថា កូរ៉េខាងជើងបានកំណត់យករុស្ស៊ី អាមេរិក និងជប៉ុន ជាអាទិភាពគោលនយោបាយការបរទេសរបស់ខ្លួនសម្រាប់ឆ្នាំ២០២៤នេះ និងឆ្នាំទៅមុខទៀត។ អតីតមន្ត្រីកូរ៉េខាងជើងរូបនេះ បានបញ្ជាក់ទៀតថា ខណៈពេលដែលកំពុងពង្រឹងទំនាក់ទំនងជាមួយរុស្ស៊ី ទីក្រុងព្យុងយ៉ាងក៏ចង់បើកកិច្ចចរចានុយក្លេអ៊ែរឡើងវិញផងដែរ ប្រសិនបើលោក ត្រាំ ដែលជាបេក្ខភាពប្រធានាធិបតីនៅអាមេរិកអាចឈ្នះឆ្នោតម្ដងទៀតនាខែវិច្ឆិកាខាងមុខ ដោយហេតុថាលោក ត្រាំ ធ្លាប់បានចូលរួមការទូតដ៏ខ្លាំងក្លា និងការទូតដែលមិនធ្លាប់មានពីមុនមកជាមួយប្រទេសកូរ៉េខាងជើងក្នុងអាណត្តិមុនរបស់លោក។

បន្ថែមពីនេះ លោក Ri បានប្រាប់ថា មន្ត្រីការទូតទីក្រុងព្យុងយ៉ាងកំពុងរៀបចំផែនការយុទ្ធសាស្ត្រសម្រាប់សេណារីយ៉ូនោះ ដោយមានគោលដៅចង់ឲ្យមានការដកទណ្ឌកម្មលើកម្មវិធីអាវុធរបស់ខ្លួន និងដកការចាត់ទុកកូរ៉េខាងជើងជាអ្នកឧបត្ថម្ភរដ្ឋនៃអំពើភេរវកម្មនិងជំនួយសេដ្ឋកិច្ច។

ការលើកឡើងរបស់លោក Ri ហាក់មានភាពផ្ទុយពីអ្វីដែលកូរ៉េខាងជើងធ្លាប់ធ្វើសេចក្ដីថ្លែងការណ៍កាលពីពេលថ្មីៗដែលថានឹងគ្មានកិច្ចសន្ទនាទៀតឡើយជាមួយអាមេរិក ហើយព្រមានថានឹងអាចមានការប្រឈមមុខគ្នាដោយប្រដាប់អាវុធថែមទៀតផង។

សូមបញ្ជាក់ថា លោក Ri Il Kyu វ័យ៥២ឆ្នាំ បានចូលបម្រើការងារនៅក្រសួងការបរទេសកូរ៉េខាងជើងក្នុងឆ្នាំ១៩៩៩ ហើយបានទទួលការសរសើរពីមេដឹកនាំកូរ៉េខាងជើងលោក គីម ជុងអ៊ុន សម្រាប់ការចរចាដោយជោគជ័យជាមួយប៉ាណាម៉ា ដើម្បីដោះលែងកប៉ាល់កូរ៉េខាងជើងមួយគ្រឿងដែលត្រូវបានឃាត់ទុក ពាក់ព័ន្ធនឹងការលួចដឹកអាវុធចេញពីគុយបា កាលពីឆ្នាំ២០១៣។

អតីតមន្ត្រីកូរ៉េខាងជើងរូបនេះ បានបញ្ជាក់ថា មូលហេតុដែលលោកលួចរត់ ព្រោះតែការមិនពេញចិត្តនឹងរបបដឹកនាំកូរ៉េខាងជើង និងការវាយតម្លៃអយុត្តិធម៌ចំពោះការងាររបស់លោក៕

ដោយ៖ ឈាង