ព័ត៌មានអន្ដរជាតិ

អាមេរិកប្រកាសអាសន្នធ្វើដំណើរកម្រិតខ្ពស់បំផុត និងឲ្យពលរដ្ឋខ្លួនចាកចេញពីលីបង់ភ្លាមៗ

បានផុស

៧ ខែ មុន

នៅ

ថ្ងៃព្រហស្បតិ៍ ១ សីហា ២០២៤

ដោយ

Chheang

បន្ទាប់ពីមានការសម្លាប់មេទ័ពក្រុមហេសបូឡា និងមេដឹកកំពូលក្រុមហាម៉ាស សហរដ្ឋអាមេរិកបានអំពាវនាវឲ្យពលរដ្ឋរបស់ខ្លួនចាកចេញពីប្រទេសលីបង់ ដោយហេតុថាភាពតានតឹងអាចនឹងកើនឡើងខ្លាំងថែមទៀតនៅមជ្ឈិមបូព៌ា។

សូមចុច Subscribe Channel Telegram កម្ពុជាថ្មី ដើម្បីទទួលបានព័ត៌មានថ្មីៗទាន់ចិត្ត

ក្រុមអាកាសចរណ៍អាមេរិក បានលុបចោលការហោះហើរទៅកាន់ទីក្រុង Tel Aviv ប្រទេសអ៊ីស្រាអែល ហើយរដ្ឋាភិបាលក្រុងវ៉ាស៊ីតោនបានព្រមានប្រជាជនខ្លួននៅក្នុងតំបន់ភាគខាងត្បូងប្រទេសលីបង់ឲ្យចាកចេញពីទីនោះ និងដាក់ការប្រកាសអាសន្នកម្រិត៤ក្នុងការធ្វើដំណើរ ដែលជាកម្រិតអាសន្នធ្ងន់ធ្ងរបំផុត។ ក្រសួងការបរទេសអាមេរិក បានប្រកាសកាលពីថ្ងៃពុធថា៖ «សូមកុំធ្វើដំណើរទៅលីបង់ ដោយសារតែការកើនឡើងភាពតានតឹងរវាងក្រុមហេសបូឡា និងអ៊ីស្រាអែល។ បើអ្នកនៅក្នុងប្រទេសលីបង់ ត្រូវត្រៀមខ្លួនជ្រកកោននៅនឹងកន្លែងពេលស្ថានការណ៍កាន់តែអាក្រក់។ ស្ថានទូតអាមេរិកជំរុញយ៉ាងខ្លាំងឲ្យប្រជាជនអាមេរិកដែលស្ថិតនៅភាគខាងត្បូងលីបង់ក្បែរព្រំដែនស៊ីរី និងជុំរុំភៀសខ្លួន ត្រូវចាកចេញ»។

ក្នុងរយៈពេលត្រឹម២៤ម៉ោងប៉ុណ្ណោះ មានការធ្វើឃាតចំនួន២លើមេបញ្ជាការជាន់ខ្ពស់ក្រុមហេសបូឡា លោក Fuad Shukr និងមេដឹកនាំកំពូលក្រុមហាម៉ាស លោក Ismail Haniyeh ដែលបណ្ដាលឲ្យកម្ដៅជម្លោះរវាងអ៊ីស្រាអែលនិងក្រុមសកម្មប្រយុទ្ធដែលមានការគាំទ្រដោយអ៊ីរ៉ង់ទាំង២ កាន់តែយ៉ាប់យ៉ឺនឡើងៗ ខណៈពិភពលោកកំពុងបារម្ភខ្លាចផ្ទុះសង្គ្រាមទ្រង់ទ្រាយធំនៅមជ្ឈិមបូព៌ា។

លោក Benjamin Netanyahu នាយករដ្ឋមន្ត្រីអ៊ីស្រាអែល ដែលទើបត្រឡប់ទៅទីក្រុង Tel Aviv ក្រោយទស្សនកិច្ចនៅអាមេរិក បានព្រមានកាលពីថ្ងៃទី៣១ខែកក្កដាថា អ៊ីស្រាអែលបានត្រៀមខ្លួនសម្រាប់សេណារីយ៉ូគ្រប់បែបយ៉ាង ហើយរួមគ្នាប្ដេជ្ញាប្រឈមមុខនឹងការគំរាមកំហែង។ យ៉ាងណា លោក Netanyahu បានប្រកាសមិនជាប់ពាក់ព័ន្ធនឹងការធ្វើឃាតលោក Haniyeh នោះឡើយ៕

ដោយ៖ ឈាង

ចុចអាន៖ អាមេរិកប្រកាសថា ការស្លាប់មេក្រុមហាម៉ាសមិនជាប់ពាក់ព័ន្ធនឹងខ្លួនទេ