ព័ត៌មានអន្ដរជាតិ

កូរ៉េខាងត្បូងស្នើផ្តល់ជំនួយដល់កូរ៉េខាងជើងដែលរងគ្រោះដោយទឹកជំនន់ដ៏ខ្លាំង

បានផុស

៧ ខែ មុន

នៅ

ថ្ងៃសុក្រ ២ សីហា ២០២៤

ដោយ

ខណៈប្រទេសកូរ៉េខាងជើងកំពុងទទួលរងគ្រោះដោយសារទឹកជំនន់យ៉ាងធ្ងន់ធ្ងរមិនធ្លាប់មាន រដ្ឋាភិបាលកូរ៉េខាងត្បូងអំពាវនាវផ្តល់ជំនួយដល់ប្រទេសបងប្អូនសត្រូវនេះ ដើម្បីទប់ទល់និងអាចងើបឡើងវិញពីស្ថានភាពដ៏អាក្រក់នេះ ដែលបានបណ្តាលឱ្យលិចលង់ផ្ទះរាប់ពាន់ខ្នង និងដីស្រែចម្ការយ៉ាងច្រើន។ នេះបើយោងតាមការចេញផ្សាយរបស់ទីភ្នាក់ងារព័ត៌មានAPនៅថ្ងៃទី០២ខែសីហានេះ។

សូមចុច Subscribe Channel Telegram កម្ពុជាថ្មី ដើម្បីទទួលបានព័ត៌មានថ្មីៗទាន់ចិត្ត

ក្រសួងបង្រួបបង្រួមកូរ៉េខាងត្បូងដែលគ្រប់គ្រងកិច្ចការអន្តរកូរ៉េ បានឲ្យដឹងថា កូរ៉េខាងត្បូងមានឆន្ទៈក្នុងការផ្គត់ផ្គង់ជំនួយយ៉ាងឆាប់រហ័ស ដើម្បីដោះស្រាយ «ការលំបាកផ្នែកមនុស្សធម៌» របស់ប្រជាជនកូរ៉េខាងជើង បន្ទាប់ពីមានការវាយប្រហារដោយព្យុះនាពេលថ្មីៗនេះ។ ក្រសួងនេះបានជំរុញឱ្យកាកបាទក្រហមកូរ៉េខាងជើងឆ្លើយតបភ្លាមៗចំពោះការអំពាវនាវរបស់ខ្លួន និងពន្លឿនឱ្យមានការពិភាក្សាដើម្បីកំណត់ប្រភេទ និងបរិមាណផ្គត់ផ្គង់របស់កូរ៉េខាងត្បូង និងរបៀបចែកចាយ។

ទោះបីយ៉ាងណា នៅមិនទាន់មានភាពច្បាស់លាស់នៅឡើយថាតើ កូរ៉េខាងជើងនឹងទទួលយកសំណើជំនួយរបស់កូរ៉េខាងត្បូង ព្រោះថាភាពច្របូកច្របល់រវាងប្រទេសទាំងពីរដែលបែងចែកដោយសង្រ្គាមកាន់តែអាក្រក់ទៅក្នុងរយៈពេលជាច្រើនឆ្នាំជុំវិញមហិច្ឆតានុយក្លេអ៊ែរដែលកំពុងកើនឡើងរបស់កូរ៉េខាងជើង និងការពង្រីកសមយុទ្ធយោធារួមគ្នាជាមួយសហរដ្ឋអាមេរិក និងជប៉ុន ដើម្បីទប់ទល់នឹងការគំរាមកំហែងរបស់កូរ៉េខាងជើង។

ប្រព័ន្ធផ្សព្វផ្សាយរដ្ឋកូរ៉េខាងជើង បានផ្សាយថា ភ្លៀងធ្លាក់ខ្លាំងនាពេលថ្មីៗនេះ បានធ្វើឱ្យផ្ទះចំនួន ៤១០០ខ្នង ផ្ទៃដីកសិកម្មចំនួន ៧៤១០ហិចតា និងអគារសាធារណៈជាច្រើនផ្សេងទៀត ផ្លូវគោក និងផ្លូវដែកបានជន់លិចនៅក្នុងទីក្រុង Sinuiju និងទីក្រុង Uiju ។ ទោះជាបែបនេះក្តី កូរ៉េខាងជើងមិនបានរាយការណ៍លម្អិតអំពីការស្លាប់និងរបួសនោះទេ។

ពាក់ព័ន្ធនឹងបញ្ហាទឹកជំនន់នេះ ប្រធានាធិបតីកូរ៉េខាងជើង លោក គីម ជុងអ៊ុន បានស្នើឱ្យអាជ្ញាធរ«ដាក់ទណ្ឌកម្មយ៉ាងតឹងរ៉ឹង» ចំពោះមន្ត្រីណាដែលមិនយកចិត្តទុកដាក់ទទួលខុសត្រូវឆ្លើយតបឲ្យបានល្អក្នុងការជួយប្រជាជនេរងគ្រោះ ខណៈដែលរដ្ឋាភិបាលបានប្រកាសឲ្យមានការត្រៀមខ្លួនឆ្លើយតបនឹងគ្រោះមហន្តរាយនេះ។

គួរបញ្ជាក់ថា កូរ៉េខាងជើងបានផ្អាកស្ទើរតែទាំងស្រុងនូវកិច្ចសហប្រតិបត្តិការ និងការទូតជាមួយកូរ៉េខាងត្បូង បន្ទាប់ពីការចរចានុយក្លេអ៊ែរដ៏ធំរបស់ខ្លួនជាមួយសហរដ្ឋអាមេរិកបានធ្លាក់ចុះក្នុងឆ្នាំ២០១៩ ជុំវិញការមិនចុះសម្រុងគ្នាលើការដាក់ទណ្ឌកម្មរបស់សហរដ្ឋអាមេរិក។ កូរ៉េខាងជើងក៏ធ្លាប់ច្រានចោលការស្នើផ្តល់ជំនួយរបស់កូរ៉េខាងត្បូង ក្នុងពេលនៃការផ្ទុះឡើងកូវីដ១៩ក្នុងឆ្នាំ២០២២ផងដែរ៕