ព័ត៌មានអន្ដរជាតិ

គ្រោះទឹកជំនន់នៅប៉ាគីស្ថាន ប្រល័យជីវិតមនុស្ស៣០នាក់

បានផុស

៥ ខែ មុន

នៅ

ថ្ងៃសុក្រ ២ សីហា ២០២៤

ដោយ

Chheang

គ្រោះទឹកជំនន់ ដែលបង្កឡើងដោយភ្លៀងធ្លាក់ជាប់ៗគ្នាមិនឈប់នៅក្នុងប្រទេសប៉ាគីស្ថាន បានបណ្ដាលឲ្យមានការខូចខាតជាច្រើន និងប្រល័យជីវិតមនុស្សយ៉ាងហោចណាស់ចំនួន ៣០នាក់នៅក្នុងសប្ដាហ៍នេះ។ នេះបើយោងតាមការប្រកាសរបស់ទីភ្នាក់ងារគ្រប់គ្រងគ្រោះមហន្តរាយប៉ាគីស្ថាន នៅថ្ងៃទី២ខែសីហាឆ្នាំ២០២៤។

សូមចុច Subscribe Channel Telegram កម្ពុជាថ្មី ដើម្បីទទួលបានព័ត៌មានថ្មីៗទាន់ចិត្ត

ទីក្រុង Lahore ដែលជាទីក្រុងធំបំផុតលំដាប់ទី២នៅប៉ាគីស្ថាន បានទទួលរងគ្រោះទឹកជំនន់ខ្លាំងជាងគេមិនធ្លាប់មានក្នុងរយៈពេលច្រើនជាង៤ទសវត្សរ៍កន្លងទៅ។ ភ្លៀងបានបន្តធ្លាក់និងបក់បោកខ្លាំងនៅភាគខាងជើងប្រទេស បង្កឲ្យមានទឹកជំនន់ អគារដួលរលំ និងហានិភ័យនៃការឆ្លក់អគ្គិសនីស្លាប់។ អាជ្ញាធរប៉ាគីស្ថាន បានព្រមានថា ជំនន់ទឹកភ្លៀងភ្លាមៗអាចកើតមាននៅក្នុងសប្ដាហ៍នេះបន្តទៀតនៅភាគខាងត្បូងប្រទេស បន្ទាប់ពីបានសម្លាប់មនុស្សចំនួន៦នាក់រួចមកហើយនៅទីនោះ។ ចំណែកនៅក្នុងខេត្ត Khyber Pakhtunkhwa ដែលនៅភាគពាយ័ព្យ ក្នុងរយៈពេល៣ថ្ងៃចុងក្រោយ មានករណីស្លាប់ចំនួន២៤នាក់ ក្នុងនោះមានកុមារចំនួន១២នាក់។

ការមកដល់នៃរដូវធ្លាក់ខ្យល់មូសុង បានបង្កើតឲ្យមានទឹកជំនន់ និងបំណាក់ដីជាច្រើននៅក្នុងតំបន់អាស៊ីខាងត្បូងកាលពីសប្ដាហ៍មុន ហើយក្នុងនោះនៅឥណ្ឌាដែលជាប្រទេសក្បែរខាងប៉ាគីស្ថាន មានមនុស្សស្លាប់យ៉ាងហោចណាស់ចំនួន ១៩៥នាក់ និងបាត់ខ្លួនជិត២០០នាក់។

អង្គការធំៗជាច្រើននៅលើពិភពលោក រួមមានទាំងអង្គការសហប្រជាជាតិផងដែរនោះ បានចាត់ទុកប៉ាគីស្ថានក្នុងចំណោមប្រទេសដែលងាយរងគ្រោះបំផុតនឹងបម្រែបម្រួលអាកាសធាតុ ដោយនៅក្នុងឆ្នាំ២០២២ គ្រោះទឹកជំនន់បានឆក់យកជីវិតមនុស្សអស់ជាង ១៧០០នាក់ និងមានការជម្លៀសប្រជាជនរាប់លាននាក់ឯណោះ៕

ដោយ៖ ឈាង