ជំងឺមហារីក ផ្តាច់ជីវិតប្រជាជនវៀតណាម ជាង ​១២ម៉ឺននាក់ ក្នុងមួយឆ្នាំ

យោងតាមស្ថិតិចុងក្រោយបង្អស់ពីគេហទំព័រតាមដានជំងឺមហារីកពិភពលោក Globocan, ជារៀងរាល់ឆ្នាំ ប្រទេសវៀតណាមមានមនុស្សកើតជំងឺមហារីកថ្មីចំនួន ១៨០ ៤៨០នាក់និងស្លាប់ចំនួន ១២០ ១៨៤នាក់។ នេះបើតាមការចុះផ្សាយរបស់ VN Express កាលពីថ្ងៃសុក្រទី២ខែសីហាឆ្នាំ២០២៤។

សូមចុច Subscribe Channel Telegram កម្ពុជាថ្មី ដើម្បីទទួលបានព័ត៌មានថ្មីៗទាន់ចិត្ត

វេជ្ជបណ្ឌិត Nguyen Thi Xuyen ប្រធានសមាគមគ្រូពេទ្យវៀតណាម បាននិយាយថា កត្តាចម្បងដែលបណ្តាលឲ្យមានមនុស្សស្លាប់ច្រើនបែបនេះ គឺដោយសារតែអ្នកជំងឺមិនបានទៅពិនិត្យរោគទាន់ពេល ទុកយូរពេក។ លើសពីនេះ រយៈពេលនៃការរស់រានមានជីវិតរបស់អ្នកជំងឺ ក៏អាស្រ័យលើសុខភាពរបស់ពួកគេផងដែរ។

ស្របពេលជាមួយគ្នានោះ អ្នកជំនាញនិយាយថា ទម្រង់ជំងឺផ្សេងៗគ្នាក្នុងប្រទេសនីមួយៗ នាំឲ្យអត្រាមរណភាពនៃជំងឺមហារីក ក៏ខុសគ្នាទៅតាមនោះដែរ។ ជាឧទាហរណ៍ នៅប្រទេសអូស្ត្រាលី អត្រាជំងឺមហារីកសុដន់និងក្រពេញប្រូស្តាតមានខ្ពស់បំផុត ខណៈនៅកូរ៉េខាងត្បូង អត្រាមហារីកក្រពះ ទីរ៉ូអ៊ីត និងពោះវៀនធំគឺខ្ពស់ជាង។ ជំងឺមហារីកទាំងនេះ មានអត្រារស់ខ្ពស់ ជាពិសេសមហារីកក្រពេញទីរ៉ូអ៊ីត ដែលស្ទើរតែអាចព្យាបាលបានទាំងស្រុង។

ដោយឡែក នៅប្រទេសវៀតណាម ជំងឺមហារីក៣ប្រភេទដែលកើតមានទូទៅបំផុតដូចជា សួត ថ្លើម និងក្រពះ គឺសុទ្ធតែជាប្រភេទមហារីកដែលមានអត្រាស្លាប់ខ្ពស់ បូករួមទាំងអ្នកជំងឺទៅរកគ្រូពេទ្យនៅដំណាក់កាលចុងក្រោយថែមទៀត នោះធ្វើឲ្យសភាពអ្នកជំងឺកាន់តែយ៉ាប់យ៉ឺន ជួយលែងបាន៕

អត្ថបទ៖ សុខ សុវណ្ណ

ចុចអាន៖ វៀតណាម ជោគជ័យ វះកាត់ប្តូរបេះដូង កុមារម្នាក់ទៀត