អ៊ីស្រាអែល ប្រកាសវាយបកទៅវិញ បើអ៊ីរ៉ង់ សងសឹក

តាមការចុះផ្សាយរបស់ NHK នៅថ្ងៃចន្ទទី៥ខែសីហាឆ្នាំ២០២៤ លោក Benjamin Netanyahu បានប្រកាសត្រៀមខ្លួនរួចជាស្រេចអស់ហើយ ដើម្បីឆ្លើយតបវិញ ប្រសិនភាគីអ៊ីរ៉ង់ ពិតជាសងសឹកចំពោះការធ្វើឃាត មេដឹកនាំកំពូលក្រុមហាម៉ាស កាលពីសប្តាហ៍មុនមែន។

សូមចុច Subscribe Channel Telegram កម្ពុជាថ្មី ដើម្បីទទួលបានព័ត៌មានថ្មីៗទាន់ចិត្ត

លោក Netanyahu បានប្រាប់កិច្ចប្រជុំគណៈរដ្ឋមន្ត្រីកាលពីថ្ងៃអាទិត្យថា អ៊ីស្រាអែល ត្រៀមខ្លួនរួចជាស្រេចសម្រាប់សេណារីយ៉ូទាំងឡាយ ហើយនឹងឆ្លើយតបពេញទំហឹងចំពោះទង្វើហួសហេតុពីសំណាក់ចលនាប្រដាប់អាវុធទាំងអស់។

ពាក់ព័ន្ធបញ្ហានេះដែរ រដ្ឋមន្ត្រីការបរទេសអាមេរិក លោក Anthony Blinken បានជូនដំណឹងដល់ក្រុមប្រទេស G7 ថា អ៊ីរ៉ង់និងក្រុមហេសបូឡា អាចបើកការវាយប្រហារលើអ៊ីស្រាអែល ក្នុងរយៈពេល២៤ម៉ោងទៀត។

ទន្ទឹមនោះ លោក Blinken បានកោះប្រជុំតាមទូរស័ព្ទជាមួយបណ្តាសម្ព័ន្ធមិត្តជិតស្និទ្ធរបស់សហរដ្ឋអាមេរិក ហើយព្យាយាមដាក់សម្ពាធផ្នែកការទូតទៅលើប្រទេសអ៊ីរ៉ង់ និងក្រុមហេសបូឡា កុំឲ្យបើកការសងសឹកខ្លាំងដៃពេក ខ្លាចតំបន់មជ្ឈិមបូព៌ា ផ្ទុះសង្គ្រាមទ្រង់ទ្រាយធំ។

សូមបញ្ជាក់ជាថ្មី មេក្រុមហាម៉ាសលោក Ismail Haniyeh ត្រូវបានសម្លាប់កាលពីថ្ងៃទី៣១ខែកក្កដា ក្នុងការវាយប្រហាររបស់អ៊ីស្រាអែលទៅលើគេហដ្ឋានរបស់គាត់ក្នុងទីក្រុង តេហេរ៉ង់ ពេលគាត់ចូលរួមពិធីសម្ពោធឡើងកាន់តំណែងរបស់ប្រធានាធិបតីអ៊ីរ៉ង់ Masoud Pezeshkian៕

អត្ថបទ៖ សុខ សុវណ្ណ

ចុចអាន៖ អាមេរិក ចក្រ​ភព​អង់គ្លេស ឲ្យ​ប្រជាជន​ខ្លួន​ចាក​ចេញ​ពី​លីបង់ ខ្លាច​ផ្ទុះ​សង្គ្រាម​ធំ