ព័ត៌មានអន្ដរជាតិ

ក្រុមកុបកម្មហិង្សានៅអង់គ្លេសវាយប្រហារទីតាំងផ្តល់ជំរកដល់អ្នកសុំសិទ្ធិជ្រកកោន

បានផុស

៦ ខែ មុន

នៅ

ថ្ងៃចន្ទ ៥ សីហា ២០២៤

ដោយ

ក្រុមកុប្បកម្មបានដុតបំផ្លាញនិងវាយលុកចូលសណ្ឋាគារដែលប្រើសម្រាប់ផ្តល់ជាទីស្នាក់អាស្រ័យដល់អ្នកស្វែងរកសិទ្ធិជ្រកកោននៅភាគខាងជើងប្រទេសអង់គ្លេសកាលពីថ្ងៃអាទិត្យ ខណៈដែលប្រទេសនេះកំពុងប្រឈមមុខនឹងភាពចលាចលក្នុងសង្គមដ៏អាក្រក់បំផុត ក្នុងប៉ុន្មានឆ្នាំមកនេះ។ នេះបើយោងតាមការចេញផ្សាយរបស់សារព័ត៌មាន CNN នៅថ្ងៃទី៥ខែកក្កដានេះ។

សមត្ថកិច្ចប៉ះទង្គិចនឹងក្រុមកុប្បកម្មហិង្សាដែលវាយសណ្ឋាគារផ្តល់កន្លែងស្នាក់នៅដល់អ្នកសុំសិទ្ធិជ្រកកោន។ AP

សូមចុច Subscribe Channel Telegram កម្ពុជាថ្មី ដើម្បីទទួលបានព័ត៌មានថ្មីៗទាន់ចិត្ត

អំពើហិង្សានេះត្រូវបានបង្កឡើងបន្ទាប់ពីមានការចាក់សម្លាប់ក្មេងស្រីបីនាក់នៅទីក្រុង Southport ភាគពាយព្យនៃប្រទេសអង់គ្លេសកាលពីដើមសប្តាហ៍។ ជាមួយគ្នានេះក៏មានការសន្និដ្ឋានជាច្រើនជុំវិញស្ថានភាពរបស់បុរសអាយុ១៧ឆ្នាំម្នាក់ជាឃាតករ ដែលបច្ចុប្បន្នកំពុងស្ថិតក្នុងការឃុំឃាំងរបស់ប៉ូលិស ហើយមនុស្សមួយចំនួនកំពុងប្រើប្រាស់វាដើម្បីជាការតវ៉ាដោយហិង្សា និងគ្មានសណ្តាប់ធ្នាប់។

ក្រុមបាតុករជាអ្នកក្រុមស្តាំនិយមជ្រុលបានចាប់យក និងផ្សព្វផ្សាយរលកនៃព័ត៌មានមិនពិត រួមទាំងការអះអាងមិនពិតថាអ្នកឃាតករគឺជាជនអន្តោប្រវេសន៍ ដើម្បីប្រមូលផ្តុំការតវ៉ាប្រឆាំងជនមូស្លីម និងប្រឆាំងជនអន្តោប្រវេសន៍ ខណៈប៉ូលិសថា ជនសង្ស័យមានស្រុកកំណើតនៅប្រទេសអង់គ្លេសនោះទេ។

នៅទីក្រុង Tamworth ក្រុមបាតុករបានគប់គ្រាប់ផ្លោង វាយកម្ទេចបង្អួច និងបាញ់ប្រហារ បណ្តាលឲ្យប៉ូលិសម្នាក់រងរបួស ។ ប៉ូលិសបាននិយាយថា ក្នុងពេលជាមួយគ្នានោះនៅទីក្រុង Rotherham ក្រុមអ្នកតវ៉ាបានគប់បន្ទះឈើ ប្រើបំពង់ពន្លត់អគ្គីភ័យប្រឆាំងនឹងមន្រ្តី ដុតបំផ្លាញវត្ថុនៅជិតសណ្ឋាគារ និងវាយកម្ទេចបង្អួចដើម្បីចូលអគារដែលប្រើសម្រាប់ជនភៀសខ្លួន។

នាយករដ្ឋមន្ត្រីអង់គ្លេស លោក Keir Starmer ក៏បានថ្កោលទោសការតវ៉ាដ៏ហិង្សានេះដែរ ដែលបណ្ដាលឲ្យមនុស្សយ៉ាងតិច ១៤៧ នាក់ត្រូវបានចាប់ខ្លួនចាប់តាំងពីយប់ថ្ងៃសៅរ៍។ លោកបានព្រមានថា «អ្នកពាក់ព័ន្ធនឹងអំពើហិង្សានឹងត្រូវប្រឈមមុខនឹងច្បាប់មិនអាចលើកលែង»។

គួរបញ្ជាក់ថាភាពចលាចលដោយហិង្សាគឺជាបញ្ហាប្រឈមដ៏អាក្រក់បំផុតចាប់តាំងពីកុប្បកម្មឆ្នាំ ២០១១ ហើយផ្តល់នូវបញ្ហាប្រឈមដ៏ធំដល់រដ្ឋាភិបាលរបស់លោក Keir Starmer ត្រឹមតែប៉ុន្មានសប្តាហ៍បន្ទាប់ពីលោកបានឡើងកាន់អំណាច៕