ព័ត៌មានអន្ដរជាតិ

បំណាក់ដី និងទឹកជំនន់នៅចិន សម្លាប់មនុស្សអស់ជាង១៥០នាក់ក្នុងរយៈពេល២ខែ

បានផុស

៥ ខែ មុន

នៅ

ថ្ងៃចន្ទ ៥ សីហា ២០២៤

ដោយ

Chheang

បំណាក់ដី និងគ្រោះទឹកជំនន់ បានឆក់យកជីវិតមនុស្សជាង១៥០នាក់ បន្ទាប់ពីព្យុះភ្លៀងបានវាយប្រហារនៅទូទាំងភាគខាងត្បូងប្រទេសចិន ក្នុងរយៈពេល២ខែចុងក្រោយនេះ។

សូមចុច Subscribe Channel Telegram កម្ពុជាថ្មី ដើម្បីទទួលបានព័ត៌មានថ្មីៗទាន់ចិត្ត

ប្រព័ន្ធផ្សព្វផ្សាយរដ្ឋចិន Xinhua បានប្រកាសថា គ្រោះមហន្តរាយចុងក្រោយ បានកើតឡើងនៅតំបន់ភ្នំទីបេ ក្នុងខេត្តស៊ីឈួន កាលពីព្រឹកថ្ងៃសៅរ៍ ដោយទឹកជំនន់ និងបំណាក់ដី បានបណ្តាលឲ្យមនុស្ស ៨នាក់ស្លាប់ និង ១៩នាក់ផ្សេងទៀតបាត់ខ្លួន ព្រមទាំងមានការបំផ្លិចបំផ្លាញផ្ទះសម្បែងជាច្រើនខ្នង និងបាក់ស្ពានមួយកន្លែងនៅភូមិ Ridi។

ប្រមាណជា១០ថ្ងៃកន្លងមកនេះ ព្យុះទីហ្វុង Gaemi បានវាយប្រហារលើប្រទេសចិន ហើយធ្វើឲ្យមានមនុស្សស្លាប់ហោចណាស់៤៨នាក់ និងបាត់ខ្លួន៣៥នាក់នៅខេត្ត Hunan។

ចិនកំពុងស្ថិតនៅក្នុងរដូវកាលគ្រោះទឹកជំនន់ខ្លាំងបំផុត ដែលជាទូទៅចាប់ផ្ដើមចន្លោះពីពាក់កណ្ដាលខែកក្កដា ដល់ពាក់កណ្ដាលខែសីហា ហើយទាមទារឲ្យរដ្ឋាភិបាលចាំបាច់ត្រូវបង្កើនការត្រៀមខ្លួន ខណៈគ្រោះមហន្តរាយធម្មជាតិរួមមាន រលកកម្ដៅខ្លាំង និងព្យុះភ្លៀង កាន់តែកើតឡើងជាញឹកញាប់នៅក្នុងប្រទេសមួយនេះ។

សូមបញ្ជាក់ថា ក្រៅតែពីចិន បំណាក់ដី និងគ្រោះទឹកជំនន់ក៏បានឆក់យកជីវិតមនុស្សអស់រាប់រយនាក់ផងដែរនៅកន្លែងផ្សេងទៀតក្នុងទ្វីបអាស៊ីនារដូវក្តៅនេះ។ កាលពីសប្ដាហ៍មុន ព្យុះភ្លៀងនៅភាគខាងត្បូងប្រទេសឥណ្ឌា បានបណ្ដាលឲ្យមនុស្សស្លាប់ជាង២០០នាក់៕

ដោយ៖ ឈាង