លោកស្រី Hasina៖ មានប្រវត្តិខ្លោចផ្សា មួយយប់ត្រូវគេសម្លាប់មួយគ្រួសារ ចុងក្រោយរត់ចោលប្រទេស

ជានាយករដ្ឋមន្ត្រីកាន់អំណាចយូរបំផុតក្នុងប្រវត្តិសាស្ត្រប្រទេសបង់ក្លាដែស ទីបំផុតលោកស្រី Sheikh Hasina ត្រូវចុះចេញពីតំណែង ហើយរត់ភៀសខ្លួនទៅឥណ្ឌា ខណៈស្ថានការណ៍ក្នុងប្រទេសកំពុងវឹកវរខ្លាំង ដោយសារបាតុកម្មពុះកញ្ជ្រោលទាមទារឲ្យផ្តួលរំលំរដ្ឋាភិបាល។

សូមចុច Subscribe Channel Telegram កម្ពុជាថ្មី ដើម្បីទទួលបានព័ត៌មានថ្មីៗទាន់ចិត្ត

ដូចនេះយើងមកស្គាល់លោកស្រី Sheikh Hasina ទាំងអស់គ្នា

កើតនៅថ្ងៃទី២៨ខែកញ្ញាឆ្នាំ១៩៤៧ នៅទីក្រុង Tungipara នៃតំបន់ East Bengal (បច្ចុប្បន្នជាប្រទេសបង់ក្លាដែស), លោកស្រី Sheikh Hasina គឺជាកូនស្រីច្បងរបស់លោក Sheikh Mujibur Rahman ដែលជាស្ថាបនិក និងជាប្រធានាធិបតីទីមួយនៃប្រទេសបង់ក្លាដែស។

អាជីពនយោបាយរបស់លោកស្រី ចាប់ផ្តើមក្នុងទសវត្សរ៍ឆ្នាំ១៩៨០ ក្រោយពេលប្រទេសកើតចលាចលរាប់ឆ្នាំ បន្ទាប់ពីលោកឪពុកត្រូវគេធ្វើឃាតក្នុងឆ្នាំ១៩៧៥។

ក្នុងយប់ដ៏ខ្លោចផ្សានោះ ខណៈពេលលោកស្រី Hasina (កាលនោះមានអាយុ២៨ឆ្នាំ) កំពុងស្ថិតនៅប្រទេសអាល្លឺម៉ង់ជាមួយប្អូនស្រី, យោធាមួយក្រុម បានសម្រុកចូលផ្ទះគ្រួសារក្នុងទីក្រុង ដាកា ហើយសម្លាប់ឪពុកម្តាយនិងបងប្អូនបីនាក់ផ្សេងទៀត ព្រមទាំងបុគ្គលិកក្នុងផ្ទះ សរុប១៨នាក់។

បន្ទាប់ពីការធ្វើឃាត, លោកស្រីបានរស់នៅនិរទេសខ្លួនអស់រយៈពេលជាច្រើនឆ្នាំ ក្នុងប្រទេសឥណ្ឌា រួចក៏វិលត្រឡប់ចូលមាតុភូមិវិញដើម្បីដឹកនាំគណបក្ស Awami League ប៉ុន្តែមេដឹកនាំយោធាបានឃុំខ្លួនលោកស្រីទាំងក្នុងនិងក្រៅផ្ទះពេញមួយទសវត្សរ៍ឆ្នាំ១៩៨០។

នៅឆ្នាំ១៩៨២ អ្នកស្នងតំណែង Rahman គឺលោក Abdus Sattar ត្រូវបានទម្លាក់ចេញពីរដ្ឋប្រហារយោធាមិនបង្ហូរឈាម ដឹកនាំដោយលោក Hussein Muhammad Ershad ដែលក៏ចូលកាន់តំណែងជាប្រធានគ្រប់គ្រងច្បាប់អាជ្ញាសឹក រួចក៏ឡើងកាន់តំណែងជាប្រធានាធិបតីតែម្តង។

លោកស្រី Hasina បានក្លាយជានាយករដ្ឋមន្ត្រីលើកដំបូងក្នុងឆ្នាំ១៩៩៦ ក្រោយការបោះឆ្នោតសកល ហើយបន្ទាប់មក ក៏កាន់តំណែងនេះម្តងទៀតនៅឆ្នាំ២០០៨ រហូតមកដល់ថ្ងៃចន្ទទី៥ខែសីហាឆ្នាំ២០២៤។

អាណត្តិរបស់លោកស្រី Sheikh Hasina ជានាយករដ្ឋមន្ត្រី, ត្រូវបានគេសាទរចំពោះកិច្ចខិតខំប្រឹងប្រែងដើម្បីធ្វើទំនើបកម្មហេដ្ឋារចនាសម្ព័ន្ធ និងសេដ្ឋកិច្ចរបស់ប្រទេសបង់ក្លាដែស ពោលគឺរដ្ឋាភិបាល​របស់​លោកស្រី​ បាន​ផ្តោតសំខាន់​លើ​គម្រោង​អភិវឌ្ឍ​ផ្សេងៗ រួម​ទាំង​ការ​កែលម្អ​វិស័យ​អប់រំ ការថែទាំ​សុខភាព និង​សុខុមាលភាព​សង្គមជាដើម។ លោកស្រីក៏បានដើរតួយ៉ាងសំខាន់ក្នុងការលើកកម្ពស់សិទ្ធិនារី និងលើកកម្ពស់គំនិតផ្តួចផ្តើមក្នុងគោលបំណងកាត់បន្ថយភាពក្រីក្រផងដែរ។

ទោះជាយ៉ាងណាក៏ដោយ រដ្ឋបាលរបស់លោកស្រី ក៏ប្រឈមការចោទប្រកាន់ថាជារបបផ្តាច់ការ និងរំលោភសិទ្ធិមនុស្សផងដែរ រួមទាំងក្តីបារម្ភអំពីសេរីភាពសារព័ត៌មាន និងការគាបសង្កត់ផ្នែកនយោបាយទៀតផង។ លើសពីនេះ ការកាន់តំណែងរបស់លោកស្រីត្រូវបានកត់សម្គាល់ដោយបរិយាកាសនយោបាយដែលមានភាពលម្អៀង បក្សពួក ខ្សែ រហូតឈានដល់ការផ្ទុះបាតុកម្មរបស់គណបក្សប្រឆាំង និងការអះអាងពីភាពមិនប្រក្រតីនៃការបោះឆ្នោត៕

អត្ថបទ៖ សុខ សុវណ្ណ

ចុចអាន៖ ​ជាង​៩០នាក់​ស្លាប់ក្នុង​១ថ្ងៃ​​ក្នុងការតវ៉ាដ៏​ហិង្សា​នៅទូទាំងប្រទេសបង់ក្លាដែស