ព័ត៌មានអន្ដរជាតិ

ធ្លាក់ឧទ្ធម្ភាគចក្រនៅនេប៉ាល់សម្លាប់ទេសចរចិន៤នាក់និងពីឡុតម្នាក់

បានផុស

២ ខែ មុន

នៅ

ថ្ងៃព្រហស្បតិ៍ ៨ សីហា ២០២៤

ដោយ

មនុស្សប្រាំនាក់រួមទាំងពីឡុតផងដែលធ្វើដំណើរតាមឧទ្ធម្ភាគចក្រមួយគ្រឿងបានបាត់បង់ជីវិតទាំងអស់នៅពេលដែលឧទ្ធម្ភាគចក្រនេះបានធ្លាក់កាលពីថ្ងៃពុធនៅលើភ្នំនៅភាគពាយព្យរដ្ឋធានីនៃប្រទេសនេប៉ាល់។ នេះបើយោងតាមការចេញផ្សាយរបស់ទីភ្នាក់ងារព័ត៌មានAP នៅថ្ងៃទី៨ខែសីហានេះ។

សូមចុច Subscribe Channel Telegram កម្ពុជាថ្មី ដើម្បីទទួលបានព័ត៌មានថ្មីៗទាន់ចិត្ត

លោក Krishna Prasad Humagai អ្នកគ្រប់គ្រងស្រុក Nuwakot បាននិយាយថា៖«សាកសពបុរស៤នាក់ និងស្ត្រីម្នាក់ត្រូវបានទាញចេញពីបំណែកយន្តហោះ»។ ក្រុមអ្នកជួយសង្គ្រោះ ប៉ូលិសនិងកងទ័ពបានទៅដល់តំបន់នោះ ហើយ ឧទ្ធម្ភាគចក្រជួយសង្គ្រោះពីរគ្រឿងក៏ត្រូវបានបញ្ជូនមកជួយក្នុងប្រតិបត្តិការនេះដែរ។ កន្លែងធ្លាក់យន្តហោះស្ថិតនៅតំបន់ Suryachaur នៅភាគពាយ័ព្យនៃរដ្ឋធានី Kathmandu ហើយស្ថិតនៅលើភ្នំដែលគ្របដណ្តប់ដោយព្រៃឈើ។ ក្នុងចំណោមអ្នកស្លាប់ទាំង៥នេះ មានអ្នកដំណើរទាំង៤នាក់ជាជនជាតិចិន ហើយអ្នកបើកយន្តហោះជាបុរសជនជាតិនេប៉ាល់។

ឧទ្ធម្ភាគចក្រនេះបានហោះចេញពីអាកាសយានដ្ឋានអន្តរជាតិ Kathmandu ធ្វើដំណើរឆ្ពោះទៅទីក្រុង Syaprubeshi។ បើយោងតាមសេចក្តីថ្លែងការណ៍របស់អាជ្ញាធរអាកាសចរណ៍ស៊ីវិលនៃប្រទេសនេប៉ាល់ឧទ្ធម្ភាគចក្រប្រភេទ Eurocopter AS350 ជាកម្មសិទ្ធិរបស់ក្រុមហ៊ុន Air Dynasty ដែលមានមូលដ្ឋាននៅប្រទេសនេប៉ាល់ វាបានបាត់ការទាក់ទងត្រឹមតែបីនាទីបន្ទាប់ពីការហោះឡើង។

គួរបញ្ជាក់ថា ការធ្លាក់នេះបានកើតឡើងពីរសប្តាហ៍ បន្ទាប់ពីយន្តហោះដឹកអ្នកដំណើរមួយគ្រឿងបានធ្លាក់ បន្ទាប់ពីហោះចេញពីអាកាសយានដ្ឋាន Kathmandu ដោយបណ្តាលឱ្យមនុស្ស១៨នាក់ស្លាប់និងពីឡុតម្នាក់រងរបួស និងក៏មានតែម្នាក់គត់ដែលនៅរស់រានមានជីវិត៕