ព័ត៌មានអន្ដរជាតិ

វៀតណាមចង់បន្ថយប្រាក់ពិន័យចរាចរណ៍តិចជាងមុន១០ដងសម្រាប់ការបើកបរក្នុងស្ថានភាពស្រវឹង

បានផុស

៦ ខែ មុន

នៅ

ថ្ងៃព្រហស្បតិ៍ ៨ សីហា ២០២៤

ដោយ

Chheang

ក្រសួងសន្តិសុខសាធារណៈវៀតណាម មានបំណងចង់កាត់បន្ថយប្រាក់ពិន័យនៅក្នុងក្រឹត្យស្ដីពីការអនុវត្តច្បាប់ចរាចរណ៍ផ្លូវគោក ឲ្យបានតិចជាងមុន១០ដង សម្រាប់អ្នកបើកបរយានយន្តដែលមានកម្រិតជាតិអាល់កុលក្នុងខ្លួនមិនលើសពី០,២៥មិល្លីក្រាមក្នុង១លីត្រខ្យល់។

សូមចុច Subscribe Channel Telegram កម្ពុជាថ្មី ដើម្បីទទួលបានព័ត៌មានថ្មីៗទាន់ចិត្ត

ប្រាក់ពិន័យបច្ចុប្បន្នសម្រាប់អ្នកបើករថយន្តដែលមានកម្រិតជាតិអាល់កុលក្នុងខ្លួនមិនលើសពី០,២៥មិល្លីក្រាមក្នុង១លីត្រខ្យល់ ស្ថិតនៅចន្លោះពី ២៣៨ដុល្លារ ទៅ ៣១៨ដុល្លារ ហើយក្រសួងសន្តិសុខសាធារណៈវៀតណាមចង់កាត់បន្ថយឲ្យចុះមកសល់ត្រឹម ៣១,៧៨ដុល្លារ ទៅ ៤០ដុល្លារប៉ុណ្ណោះ។ ចំពោះអ្នកបើកបរម៉ូតូ ការផាកពិន័យនឹងចុះពីជាង៧៩ដុល្លារ មកនៅត្រឹម ១៥ដុល្លារ ទៅ ២៣ដុល្លារ។ ដោយឡែកសម្រាប់អ្នកជិះកង់ និងអ្នកដែលប្រើប្រាស់យានជំនិះអត់ប្រើម៉ាស៊ីនផ្សេងទៀតដែលមានកម្រិតជាតិអាល់កុលក្នុងខ្លួនចាប់ពី ០,២៥ ទៅ ០,៤មិល្លីក្រាមក្នុង១លីត្រខ្យល់ នឹងត្រូវកាត់បន្ថយការផាកពិន័យពី ៨ដុល្លារមកសល់ត្រឹម៤ដុល្លារ។

ក្រសួងសន្តិសុខសាធារណៈវៀតណាម មិនបានបង្ហាញពីមូលហេតុនៃសំណើរបស់ខ្លួនក្នុងការកាត់បន្ថយប្រាក់ផាកពិន័យចំពោះការបើកបរក្នុងស្ថានភាពស្រវឹងនោះទេ។

សូមបញ្ជាក់ថា សមាជិកសភាវៀតណាមបានអនុម័តច្បាប់ថ្មីស្តីពីសណ្តាប់ធ្នាប់ និងសុវត្ថិភាពចរាចរណ៍ផ្លូវគោកកាលពីថ្ងៃទី២៧ខែមិថុនា ដោយការផាកពិន័យជាអតិបរមាចំពោះកម្រិតជាតិអាល់កុលលើសពី ០,៤មិល្លីក្រាមក្នុង១លីត្រខ្យល់ គឺស្ថិតនៅចន្លោះពី ២៣៨ដុល្លារ ទៅ ៣១៨ដុល្លារសម្រាប់អ្នកបើកបរម៉ូតូ និងពី ១១៩២ដុល្លារ ដល់ ១៥៩០ដុល្លារសម្រាប់អ្នកបើកបររថយន្ត។

នៅឯកិច្ចប្រជុំសភាជាតិកាលពីចុងឆ្នាំ២០២៣ សមាជិកសភាជាច្រើនរូប ធ្លាប់បាននិយាយថា ការហាមប្រាមដាច់ខាតនូវគ្រឿងស្រវឹងចំពោះអ្នកបើកបរគឺតឹងរ៉ឹងពេក និងមិនអាចអនុវត្តជាក់ស្តែងបាននោះឡើយ៕

ដោយ៖ ឈាង

Related Topics:ប្រទេសវៀតណាម