ព័ត៌មានអន្ដរជាតិ

សាលារៀនមួយនៅអាមេរិកហាមសិស្សប្រើសម្លៀកបំពាក់ពណ៌ខ្មៅ

បានផុស

៦ ខែ មុន

នៅ

ថ្ងៃព្រហស្បតិ៍ ៨ សីហា ២០២៤

ដោយ

សាលាបឋមសិក្សា Charles ដែលជាសមាជិកមួយនៃបណ្តាញសាលារៀន El Paso ក្នុងរដ្ឋតិចសាស់ របស់សហរដ្ឋអាមេរិក បានចេញសេចក្តីណែនាំមួយដោយអនុវត្តគោលការណ៍សំលៀកបំពាក់ថ្មី ដោយហាមសិស្សស្លៀកសម្លៀកបំពាក់ពណ៌ខ្មៅដែលថ្នាក់ដឹកនាំសាលាយល់ថា បង្ហាញពីការបាក់ទឹកចិត្តនិងស្ត្រេស។

សូមចុច Subscribe Channel Telegram កម្ពុជាថ្មី ដើម្បីទទួលបានព័ត៌មានថ្មីៗទាន់ចិត្ត

យោងការផ្សាយរបស់ BBC លោក Nick DeSantis នាយកសាលា Charles បានជូនដំណឹងដល់ឪពុកម្តាយនិងអាណាព្យាបាលរបស់សិស្ស ថា និន្នាការនៃការពាក់សម្លៀកបំពាក់ខ្មៅបានជាប់ទាក់ទងនឹងជំងឺបាក់ទឹកចិត្ត បញ្ហាសុខភាពផ្លូវចិត្ត និងឧក្រិដ្ឋកម្ម ជាជាងការលើកកម្ពស់ដល់បរិយាកាសសិក្សាវិជ្ជមានរបស់សិស្ស។ ដូច្នេះសាលាបានសម្រេចបង្កើតបទបញ្ជាថ្មីដោយហាមសិស្សពាក់សម្លៀកបំពាក់ពណ៌ខ្មៅពេញមួយដងខ្លួន។

សេចក្តីណែនាំថ្មីនេះអនុញ្ញាតឱ្យសិស្សស្លៀកសម្លៀកបំពាក់ខ្មៅខ្លះ ឬសម្លៀកបំពាក់ពណ៌ខ្មៅពេញលេញតែនៅថ្ងៃជាក់លាក់ណាមួយប៉ុណ្ណោះ។ លោក Norma De La Rosa ប្រធានសមាគមគ្រូបង្រៀន El Paso បានលើកឡើងថា គ្រូបង្រៀនបានសង្កេតឃើញពីការប្តូរសម្លៀកបំពាក់របស់សិស្ស នៅពេលដែលពួកគេស្ត្រេស ឬបាក់ទឹកចិត្ត។ កត្តានេះបានជំរុញឱ្យមានការកែប្រែរបៀបស្លៀកពាក់នេះ។

យ៉ាងណាក៏ដោយ គោលនយោបាយនេះបានជំរុញឲ្យមានការជជែកដេញដោលគ្នាក្នុងចំណោមមាតាបិតា និងសមាជិកសហគមន៍ ដោយអ្នកខ្លះប្រកែកថា ការហាមឃាត់ការស្លៀកសម្លៀកបំពាក់ពណ៌ខ្មៅនេះមិនអាចដោះស្រាយបញ្ហាសុខភាពផ្លូវចិត្តជាមូលដ្ឋានបានឡើយ ហើយសិស្សអាចប្រឈមមុខនឹងភាពអយុត្តិធម៌ចំពោះការសម្រេចលើការស្លៀកពាក់របស់ពួកគេ។

ចំណែកអ្នករិះគន់ណែនាំថា ការផ្តោតលើការណែនាំនិងការផ្តល់ការប្រឹក្សាដល់សិស្សអាចមានប្រសិទ្ធភាពជាងការរឹតបន្តឹងលើការស្លៀកពាក់បែបនេះ៕