ព័ត៌មានអន្ដរជាតិ

អ៊ុយក្រែន ស្នើឲ្យម៉ិកស៊ិកចាប់ខ្លួនលោក ពូទីន

បានផុស

៨ ខែ មុន

នៅ

ថ្ងៃព្រហស្បតិ៍ ៨ សីហា ២០២៤

ដោយ

Chheang

ស្ថានទូតអ៊ុយក្រែន បានស្នើសុំជាផ្លូវការឱ្យរដ្ឋាភិបាលម៉ិកស៊ិកចាប់ខ្លួនលោក វ្ល៉ាឌីមៀរ ពូទីន ប្រសិនបើគាត់ចូលរួមក្នុងពិធីស្បថចូលកាន់តំណែងរបស់ប្រធានាធិបតីទើបជាប់ឆ្នោត លោកស្រី Claudia Sheinbaum នាពេលខាងមុខ។ ស្ថានទូតអ៊ុយក្រែនប្រចាំម៉ិកស៊ិកបានចេញសេចក្តីអំពាវនាវនេះកាលពីថ្ងៃទី៧ខែសីហា។

លោក វ៉្លាឌឺមៀរ ពូទីន និងលោក Volodymyr Zelensky (រូបភាព៖ AP, Getty)

សូមចុច Subscribe Channel Telegram កម្ពុជាថ្មី ដើម្បីទទួលបានព័ត៌មានថ្មីៗទាន់ចិត្ត

យោងតាមសារព័ត៌មាន Kyiv Independent ស្ថានទូតអ៊ុយក្រែនបានចាត់ទុកមេដឹកនាំរុស្ស៊ីលោក ពូទីន ជាឧក្រិដ្ឋជនសង្រ្គាម ហើយបានជំរុញម៉ិកស៊ិកឱ្យគោរពតាមដីកាចាប់ខ្លួនរបស់តុលាការឧក្រិដ្ឋកម្មអន្តរជាតិ (ICC) ដែលបានចេញកាលពីខែមីនាឆ្នាំ២០២៣។

ស្ថានទូតអ៊ុយក្រែន បានប្រាប់ Kyiv Independent ថា៖ «យើងជឿជាក់ថា រដ្ឋាភិបាលម៉ិកស៊ិកនឹងអនុវត្តតាមដីកាចាប់ខ្លួនអន្តរជាតិ ហើយប្រគល់ (ពូទីន) ទៅស្ថាប័នតុលាការរបស់អង្គការសហប្រជាជាតិនៅទីក្រុងឡាអេ»។

ទន្ទឹមនោះ ស្ថានទូតអ៊ុយក្រែន ក៏បានថ្លែងអំណរគុណដល់ម៉ិកស៊ិក ដែលបានអញ្ជើញប្រធានាធិបតីអ៊ុយក្រែនលោក Volodymyr Zelensky ទៅចូលរួមពិធីស្បថឡើងកាន់តំណែងដែលគ្រោងធ្វើនៅថ្ងៃទី១ខែតុលាខាងមុខ។

គួរបញ្ជាក់ថា ដីកា ICC បានចោទប្រកាន់លោក ពូទីន ពីបទឧក្រិដ្ឋកម្មសង្គ្រាម ជាពិសេសពាក់ព័ន្ធនឹងការបង្ខំឱ្យបញ្ជូនកុមារអ៊ុយក្រែនទៅប្រទេសរុស្ស៊ី បន្ទាប់ពីផ្ទះសង្គ្រាមឈ្លានពានឆ្នាំ២០២២។ រុស្ស៊ីមិនមែនជាសមាជិកនៃ ICC នោះទេ តែម៉ិកស៊ិកគឺជាសមាជិក អ៊ីចឹងមានន័យថា ម៉ិកស៊ិកមានកាតព្វកិច្ចគោរពតាមបញ្ជារបស់តុលាការ។

យ៉ាងណាមិញ ទោះបីជាមានដីការបស់ ICC និងសង្រ្គាមដែលកំពុងបន្តមាននៅអ៊ុយក្រែនក៏ដោយ ក៏ម៉ិកស៊ិក និងរុស្ស៊ីបាននិងកំពុងពង្រឹងទំនាក់ទំនងការទូតរបស់ពួកគេដដែល។ បន្ទាប់ពីជ័យជំនះរបស់លោកស្រី Claudia Sheinbaum នៅក្នុងការបោះឆ្នោតនៅម៉ិកស៊ិក លោកពូទីនបានអបអរសាទរលោកស្រីដោយផ្ទាល់ជាមួយនឹងការបញ្ជាក់ទៅកាន់ម៉ិកស៊ិកថាជា «ដៃគូមិត្តភាពជាប្រវត្តិសាស្ត្រ» របស់រុស្ស៊ីនៅអាមេរិកឡាទីន។