ព័ត៌មានអន្ដរជាតិ

ថៃ បើកការស៊ើបអង្កេតសមាជិកសភា នៃអតីតបក្សចលនាឆ្ពោះទៅមុខ ៤៤រូប

បានផុស

៨ ខែ មុន

នៅ

ថ្ងៃសុក្រ ៩ សីហា ២០២៤

ដោយ

តាមការចុះផ្សាយរបស់ Bangkok Post, គណៈកម្មាធិការជាតិប្រឆាំងអំពើពុករលួយ (NACC) នៃប្រទេសថៃ បានប្រកាសកាលពីថ្ងៃព្រហស្បតិ៍ទី៨ខែសីហាថា អ្នកនយោបាយចំនួន៤៤រូបនៃអតីតបក្សចលនាឆ្ពោះទៅមុខ (MFP) កំពុងស្ថិតក្រោមការស៊ើបអង្កេត ជុំវិញការប្រព្រឹត្តិក្រមសីលធម៌ ដែលពួកគេគាំទ្រដល់ការកែប្រែច្បាប់ប្រមាថព្រះមហាក្សត្រ។

សូមចុច Subscribe Channel Telegram កម្ពុជាថ្មី ដើម្បីទទួលបានព័ត៌មានថ្មីៗទាន់ចិត្ត

អគ្គលេខាធិការ NACC លោក Niwatchai Kasemongkol និយាយថា គណៈកម្មាធិការ បានរកឃើញហេតុផលសមរម្យ ដើម្បីចេញបញ្ជាឲ្យបើកការស៊ើបអង្កេត ប្រឆាំងសមាជិកសភា MFP ចំនួន៤៤រូប ដែលគាំទ្រច្បាប់នេះ។

ការស៊ើបអង្កេតធ្វើឡើង បន្ទាប់ពីមេធាវីឈ្មោះ Theerayut Suwankesorn ដាក់ញត្តិកាលពីខែកុម្ភៈឆ្នាំ២០២៤ ស្នើដល់តុលាការធម្មនុញ្ញ ចេញបញ្ជាឲ្យ MFP បញ្ឈប់សកម្មភាពយុទ្ធនាការទាំងអស់ទាក់ទិននឹងការប៉ុនប៉ងកែប្រែមាត្រា ១១២នៃក្រមព្រហ្មទណ្ឌ។

ញត្តិនេះទៀតសោត គឺផ្អែកលើសេចក្តីសម្រេចរបស់តុលាការធម្មនុញ្ញកាលពីថ្ងៃទី៣១ខែមករា ដែលបញ្ជាក់ច្បាស់ថា កិច្ចខិតខំរបស់ MFP ក្នុងការកែប្រែច្បាប់ប្រមាថព្រះមហាក្សត្រ បានក្លាយជាការប៉ុនប៉ងដែលធ្វើឲ្យខូចដល់របបរាជានិយមអាស្រ័យរដ្ឋធម្មនុញ្ញ។

លោក Niwatchai សង្កត់ធ្ងន់ថា បច្ចុប្បន្នក្រុមអ្នកស៊ើបអង្កេតរបស់ NACC កំពុងប្រមូលសេចក្តីថ្លែងការណ៍ និងព័ស្តុតាងនានាសម្រាប់ការស៊ើបអង្កេតនេះ ហើយនៅពេលបញ្ចប់សព្វគ្រប់ សមាជិកសភាទាំង៤៤រូប នឹងត្រូវកោះហៅឲ្យមកបំភ្លឺជុំវិញការចោទប្រកាន់នេះ ប៉ុន្តែមិនប្រញាប់ប្រញាល់ពេកទេ ដូច្នេះពួកគេ អាចទទួលបានឱកាសដើម្បីការពារខ្លួនបាន។

ប្រសិនបើអ្នកទាំង៤៤ ត្រូវបានរកឃើញថាមានកំហុសមែន ពួកគេអាចនឹងត្រូវហាមឃាត់មិនឲ្យឈរឈ្មោះក្នុងការបោះឆ្នោត។

សូមបញ្ជាក់ជាថ្មី គណបក្សចលនាឆ្ពោះទៅមុខ ដែលជាបក្សឈ្នះឆ្នោត ត្រូវបានតុលាការធម្មនុញ្ញរបស់ប្រទេសថៃ ចេញសាលក្រមឲ្យរំលាយចោលកាលពីថ្ងៃពុធទី៧ខែសីហា ជុំវិញការប៉ុនប៉ងកែប្រែច្បាប់ប្រមាថព្រះមហាក្សត្រ។ ក្រោពីការរំលាយ តុលាការក៏ហាមឃាត់សមាជិកប្រតិបត្តិរបស់គណបក្សនេះ មិនឲ្យធ្វើនយោបាយរយៈពេល១០ឆ្នាំផងដែរ។

យ៉ាងណា ភ្លាមៗក្រោយតុលាការសម្រេច អតីតសមាជិកសំខាន់ៗរបស់ខ្លួនបានប្រកាសថា ពួកគេនឹងបង្កើតគណបក្សថ្មី ហើយនៅតែបញ្ចេញសំឡេងតស៊ូផ្នែកនយោបាយបន្តទៅទៀត ជាពិសេសតស៊ូមតិឲ្យកែច្បាប់ប្រមាថព្រះមហាក្សត្រតែម្តង៕

អត្ថបទ៖ សុខ សុវណ្ណ

ចុចអាន៖ អតីតសមាជិកបក្សចលនាឆ្ពោះទៅមុខ ប្រកាសបង្កើតគណបក្សថ្មី បន្តតស៊ូកែច្បាប់ប្រមាថព្រះមហាក្សត្រ