ព័ត៌មានអន្ដរជាតិ

ប្រជាជនអាហ្វហ្គានីស្ថានខ្វះខាតខ្លាំង ខណៈទឹកជំន់បន្តវាយប្រហារ

បានផុស

៤ ខែ មុន

នៅ

ថ្ងៃសៅរ៍ ១០ សីហា ២០២៤

ដោយ

ប្រជាពលរដ្ឋជាច្រើនក្នុងប្រទេសអាហ្វហ្គានីស្ថានជាពិសេសកុមារជាច្រើនកំពុងប្រឈមនឹងស្ថានភាពដ៏លំបាកយ៉ាប់យ៉ឺនក្រោយផ្លាស់ទីលំនៅដោយសារតែទឹកជំនន់ដ៏មហន្តរាយបានវាយប្រហារខេត្តមួយចំនួនក្នុងប្រទេសដែលរឹតត្បិតខ្លាំងដោយការកាន់អំណាចរបស់ក្រុមតាលីបង់។

សូមចុច Subscribe Channel Telegram កម្ពុជាថ្មី ដើម្បីទទួលបានព័ត៌មានថ្មីៗទាន់ចិត្ត

លោក Mohammad Hassan មកពីខេត្ត Ghor បានរៀបរាប់ថា លោកបានចំណាយពេលបីថ្ងៃយ៉ាងលំបាក ដើម្បីទៅដល់កន្លែងផ្លាស់ប្តូរទីលំនៅ បន្ទាប់ពីទឹកជំនន់ដ៏មហន្តរាយបានបំផ្លាញភូមិរបស់គាត់។ លោក បានរៀបរាប់ប្រាប់ទីភ្នាក់ងារព័ត៌មានXinhuaថា៖«ទឹកជំនន់ដែលបង្កឡើងដោយភ្លៀងធ្លាក់ខ្លាំងបានហូរកួចបំផ្លាញអ្វីៗទាំងអស់ ផ្ទះសម្បែង និងដីស្រែចម្ការ គ្មានកន្លែងសម្រាប់យើងរស់នៅឡើយ គ្រួសារចំនួន៦០០ រស់នៅក្នុងភូមិរបស់យើង ក្នុងចំណោមនោះ ៥០០គ្រួសារបានរងផលប៉ះពាល់យ៉ាងធ្ងន់ធ្ងរ។ យើងត្រូវបានគេបង្ខំឱ្យចាកចេញពីភូមិរបស់យើងហើយផ្លាស់ប្តូរទីលំនៅនៅទីនេះ»។

គួរបញ្ជាក់ថាខេត្តនេះត្រូវបានវាយប្រហារដោយទឹកជំនន់ភ្លាមៗនៅពាក់កណ្តាលខែឧសភា ដែលបណ្តាលឱ្យមានអ្នកស្លាប់យ៉ាងតិច៥០នាក់ និងបំផ្លាញផ្ទះជាង២០០០ខ្នង។ នេះបើយោងតាមអាជ្ញាធរគ្រប់គ្រងគ្រោះមហន្តរាយក្នុងតំបន់។

តង់មួយចំនួនដែលមានទំហំខុសៗគ្នាត្រូវបានចែកចាយដោយរដ្ឋាភិបាលក្នុងតំបន់ ខណៈខ្លះទៀតត្រូវបានទិញដោយអ្នករស់រានមានជីវិតដោយទឹកជំនន់ជាមួយនឹងប្រាក់កម្ចី ដើម្បីជាជម្រកបណ្ដោះអាសន្ន។

ជាងពីរខែចាប់តាំងពីគ្រោះមហន្តរាយមក ប្រជាពលរដ្ឋប្រហែល ៦០០ គ្រួសារមកពីភូមិចំនួន១០ ដែលត្រូវបានបំផ្លាញ ឬខូចខាតយ៉ាងធ្ងន់ធ្ងរដោយទឹកជំនន់ កំពុងខិតខំកសាងជីវិតរបស់ពួកគេឡើងវិញ ដោយរស់នៅក្នុងផ្នែកដាច់ស្រយាលបំផុតមួយនៃប្រទេស។ ពួកគេប្រឈមមុខនឹងបញ្ហាប្រឈមជាបន្ទាន់ក្នុងការស្វែងរកផ្ទះថ្មី មុនពេលរដូវរងាដ៏អាក្រក់ចូលមកដល់ ពួកគចង់ទទួលបានទឹកស្អាត និងធានាឱ្យកូនរបស់ពួកគេត្រឡប់ទៅសាលារៀនវិញ ខណៈពេលនេះក្មេងៗបានបាត់បង់ការសិក្សាជាបណ្ដោះអាសន្ននៅពេលនេះ។

ចាប់តាំងពីខែឧសភាមក អាហ្វហ្គានីស្ថានបានស៊ូទ្រាំនឹងទឹកជំនន់ដ៏សាហាវជាច្រើន ដែលបណ្តាលឱ្យមនុស្សស្លាប់ជាង ៤០០ នាក់នៅទូទាំងប្រទេស ដោយខេត្ត Baghlan ភាគខាងជើងត្រូវបានគេចាប់អារម្មណ៍បំផុតដោយសារតែចំនួនអ្នកស្លាប់ និងរបួសខ្ពស់បំផុត ខណៈដែលទាំងមន្ត្រីមូលដ្ឋាន និងប្រជាពលរដ្ឋដែលរងគ្រោះដោយទឹកជំនន់ ខេត្តភ្នំ Ghor ត្រូវបានគេមើលរំលង។

ទោះជាយ៉ាងណាក៏ដោយ របាយការណ៍ស្ថានភាពរបស់អង្គការសហប្រជាជាតិដែលបានចេញផ្សាយបន្ទាប់ពីទឹកជំនន់នៅខេត្ត Ghor កាលពីថ្ងៃទី ២០ ខែឧសភាថាបានកត់សម្គាល់ថាអង្គការសុខភាពពិភពលោកបានដឹកជញ្ជូនថ្នាំសំខាន់ៗ ឧបករណ៍វេជ្ជសាស្ត្រ តង់ និងអំពូលសូឡាចំនួន ៣០០ ទៅកាន់ខេត្ត Ghorហើយបានបញ្ជូនក្រុមគ្រូពេទ្យទៅកាន់ខេត្ត នេះផងដែរ៕