ព័ត៌មានអន្ដរជាតិ

ហារីសបន្តនាំមុខត្រាំក្នុងលទ្ធផលស្ទង់មតិថ្មី

បានផុស

៨ ខែ មុន

នៅ

ថ្ងៃសុក្រ ៩ សីហា ២០២៤

ដោយ

ខណៈពេលដែលការបោះឆ្នោតប្រធានាធិបតីរបស់សហរដ្ឋអាមេរិកកាន់តែរំកិលជិតមកដល់ ស្ថាប័នស្រាវជ្រាវស្ទង់មតិបានចេញផ្សាយលទ្ធផលជាបន្តបន្ទាប់ ដើម្បីចង់ដឹងប្រជាប្រិយភាពរបស់បេក្ខជនទាំងពីរបក្ស ស្របពេលបេក្ខជនកំពូលនៃបក្សទាំងពីរត្រៀមឡើងជជែកដេញដោលនៅបណ្តាញផ្សព្វផ្សាយចាប់ពីដើមខែកញ្ញា។

លោក ដូណាល់ ត្រាំ និង លោកស្រី កាម៉ាឡា ហារីស អ្នកទាំងពីរជាបេក្ខភាពប្រកួតប្រជែងប្រធានាធិបតីនៅខែវិច្ឆិកា។

សូមចុច Subscribe Channel Telegram កម្ពុជាថ្មី ដើម្បីទទួលបានព័ត៌មានថ្មីៗទាន់ចិត្ត

លទ្ធផលស្ទង់មតិថ្មីមួយ របស់ស្ថាប័នស្រាវជ្រាវ Ipsos បានបង្ហាញថា បេក្ខនារីប្រធានាធិបតីមកពីគណបក្សប្រជាធិបតេយ្យ លោកស្រី កាម៉ាឡា ហារីស (Kamala Harris) បាននាំមុខលោក ដូណាល់ ត្រាំ (Donald Trump) ជាបេក្ខជនមកពីគណបក្សសាធារណរដ្ឋ។

លទ្ធផលស្ទង់មតិនោះ បានបង្ហា្ញញថា លោកស្រី កាម៉ាឡា ហារីស ទទួលបានការបោះឆ្នោតគាំទ្រចំនួន ៤២ភាគរយ ធៀបនឹងការគាំទ្រលោក ដូណាល់ ត្រាំ មានចំនួន៣៧ភាគរយ សម្រាប់ការបោះឆ្នោតប្រធានាធិបតីអាមេរិកថ្ងៃទី៥ខែវិច្ឆិកា។ នេះបើយោងតាមការស្ទង់មតិរបស់ Ipsos ដែលបានចេញផ្សាយនៅថ្ងៃទី៨ខែសីហា។

ប្រជាប្រិយភាពរបស់ លោកស្រី កាម៉ាឡា ហារីស ដែលបច្ចុប្បន្នជាអនុប្រធានាធិបតី និងទទួលបានការយល់ព្រមពីលោក ចូ បៃដិន សម្រាប់ការឈរឈ្មោះជាបេក្ខភាពប្រធានាធិបតីសហរដ្ឋអាមេរិកសម្រាប់ការបោះឆ្នោតអាណត្តិទី៤៧ នៅក្នុងខែវិច្ឆិកាខាងមុខនេះ។

លោក ចូ បៃដិន ហាក់ចាញ់ប្រៀបលោក ដូណាល់ ត្រាំ ក្នុងការជជែកដេញដោលលើកដំបូងកាលចុងខែមិថុនាឆ្នាំនេះផ្តោតលើទិដ្ឋភាពទូទៅរបស់សហរដ្ឋអាមេរិក ស្ថានភាពពិភពលោក បញ្ហាជនអន្តោរប្រវេសន៍ជាដើម ហើយលោកក៏សម្រេចចិត្តបោះបង់ការប្រកួតប្រជែងសម្រាប់ការបោះឆ្នោតប្រធានាធិបតីសម្រាប់អាណត្តិទី២របស់លោក ដោយប្រគល់កិច្ចការនេះទៅលោកស្រី កាម៉ាឡា ហារីស។

ក្រោយការយល់ព្រមពីប្រមុខគណបក្សប្រជាធិបតេយ្យមិនប្រហែល២សប្តាហ៍ ការស្ទង់មតិនោះ បានរកឃើញថា លោកស្រី ហារីស បានពង្រីកការនាំមុខចាប់តាំងពីការស្ទង់មតិ ២២-២៣ ខែកក្កដា ដែលរៀបចំឡើងដោយទីភ្នាក់ងារព័ត៌មាន Reuters និង Ipsos ដែលរកឃើញថា លោកស្រីហារីស មានចំនួន៣៧ភាគរយទល់នឹង៣៤ភាគរយលើលោកត្រាំ។

ការស្ទង់មតិទូទាំងប្រទេសលើមនុស្សពេញវ័យអាមេរិកចំនួន ២០៤៥នាក់ ដែលធ្វើឡើងនៅថ្ងៃទី ២ដល់៧ខែសីហា បានរកឃើញថា ៤ភាគរយនៃអ្នកដែលបានស្ទង់មតិគាំទ្របេក្ខជនឯករាជ្យ Robert Kennedy Jr ធ្លាក់ចុះពី១០ភាគរយនៅក្នុងខែកក្កដា។

នៅក្នុងការស្ទង់មតិដាច់ដោយឡែក Ipsos បានរកឃើញថា លោកស្រី ហារីស នាំមុខលោក ត្រាំ ពី៤២ភាគរយទៅ៤០ភាគរយនៅក្នុងរដ្ឋចំនួន៧ដែលលទ្ធផលបោះឆ្នោតគឺកៀកគ្នាបំផុតក្នុងឆ្នាំ២០២០ រួមមានរដ្ឋ Arizona, Georgia, Michigan, Nevada, North Carolina, Pennsylvania and Wisconsin៕