ព័ត៌មានអន្ដរជាតិ

ការសម្រេចចិត្តខុស បានធ្វើឲ្យមហាសេដ្ឋី ចិន ម្នាក់ ធ្លាក់ខ្លួនដេកតាមផ្លូវ ដើររើសអេតចាយចិញ្ចឹមជីវិត

បានផុស

១ ខែ មុន

នៅ

ថ្ងៃសៅរ៍ ១០ សីហា ២០២៤

ដោយ

យោងតាមសារព័ត៌មានពី Toutiao បានបញ្ចាក់ថា កាលពីខែមុន បុរសម្នាក់ត្រូវបានគេឃើញដើររើសសំរាមក្នុងសួនឧទ្យានក្នុងទីក្រុងសៀងហៃ ប្រទេសចិន។ នោះគឺលោក Chen អាយុជាង ៧០ឆ្នាំ ជាជនអនាថា ប្រកបរបរចិញ្ចឹមជីវិតដោយរើសសំរាម និងលក់អេតចាយ។ វាពិបាកនឹងជឿថា ពីមុនគាត់ធ្លាប់ជាចៅហ្វាយដ៏ល្បីម្នាក់ទទួលបានប្រាក់ចំណេញរហូតដល់ ៤០០,០០០ Yuan (៥៥ម៉ឺន៨ពាន់ដុល្លារ) ក្នុងរយៈពេល ២៥ ថ្ងៃ។ ប៉ុន្តែអ្វីៗបានផ្លាស់ប្តូរបន្ទាប់ពីការសម្រេចចិត្តមួយ។ តើបណ្ដាលមកពីមូលហេតុអ្វីឲ្យពិតប្រាកដ?

សូមចុច Subscribe Channel Telegram កម្ពុជាថ្មី ដើម្បីទទួលបានព័ត៌មានថ្មីៗទាន់ចិត្ត

គ្រួសារអ្នកមាន

នៅដើមឆ្នាំ ២០០២ លោក Chen បានធ្វើឲ្យអ្នកជិតខាងរបស់គាត់មានការភ្ញាក់ផ្អើលយ៉ាងខ្លាំង នៅពេលដែលគាត់ចង់លក់ផ្ទះពីរនៅទីក្រុងសៀងហៃ ដើម្បីនាំក្រុមគ្រួសារធ្វើអន្តោប្រវេសន៍ទៅសហរដ្ឋអាមេរិក ដោយសង្ឃឹមថាកូនប្រុសនឹងទទួលបានការអប់រំខ្ពស់។ មូលហេតុដែលគាត់ធ្វើការសម្រេចចិត្តនេះ មួយផ្នែកគឺមកពីការរំពឹងទុករបស់ឪពុកម្តាយចំពោះកូន ហើយមួយផ្នែកគឺគាត់ចង់ធ្វើតាមគំរូរបស់គ្រួសារ។

បុរសចំណាស់រូបនេះបាននិយាយថា គាត់គឺជាចៅទួតរបស់ Chen Qubing ដែលជាកវីដ៏ល្បីល្បាញនៅក្នុងប្រទេសចិនសម័យទំនើប។ ក្នុងអំឡុងពេលនៃភាពចលាចលជាច្រើនឆ្នាំ ដើម្បីជួយដល់លោក Chen Qubing គ្រួសារនេះ ថែមទាំងបានលក់ផ្លូវទាំងមូលក្នុងទីក្រុង Suzhou ទៀតផង។

យ៉ាងណាក៏ដោយ ដោយសារឥទ្ធិពលនៃប្រពៃណីគ្រួសារកាលនៅក្មេង លោក Chen ក៏មានមហិច្ឆតាធំដែរ។ លោក កើតនៅទីក្រុងសៀងហៃ ហើយបានរៀបការនៅអាយុ ២៥ ឆ្នាំ។ ដោយសារតែការជួយរបស់ឪពុកម្តាយ ទើបរូបគាត់ទទួលបានការងារដែលមានស្ថេរភាព បន្ទាប់ពី ១០ ឆ្នាំអ្វីគ្រប់យ៉ាងគឺល្អឥតខ្ចោះបំផុត។

នៅឆ្នាំ ១៩៩៣ លោកបានចាប់ផ្តើមអាជីវកម្មផ្ទាល់ខ្លួន ដោយទទួលបានប្រាក់ចំណេញចំនួន ៤០០,០០០ Yuan ក្នុងរយៈពេល ២៥ថ្ងៃ។ នេះគឺជាចំនួនទឹកប្រាក់ដ៏ច្រើននៅពេលនោះ ក្រោយលោកបានបង្កើតក្រុមហ៊ុនសំណង់មួយ ហើយបានទិញផ្ទះ២ខ្នងជាប់គ្នាក្នុងទីក្រុងសៀងហៃ។

ទោះបីជាយ៉ាងនេះក្ដី បុរសវ័យ៧០ឆ្នាំរូបនេះបានធ្វើការសម្រេចចិត្តខុស។ ជាច្រើនឆ្នាំកន្លងទៅ ជីតារបស់លោក Chen បានធ្វើអន្តោប្រវេសន៍ទៅអាមេរិក។ បន្ទាប់មក អ្នករាល់គ្នាក្នុងគ្រួសារឪពុកម្តាយក៏ប្តូរវេនគ្នាទៅអាមេរិក។ លោកនៅពេលនោះជាមនុស្សតែម្នាក់គត់ក្នុងគ្រួសារដែលស្ទាក់ស្ទើរមិនចង់ចាកចេញពីស្រុកកំណើត។ ប៉ុន្តែនៅទីបញ្ចប់ គាត់មិនអាចទប់ទល់នឹងការបញ្ចុះបញ្ចូលរបស់គ្រួសារ និងជឿជាក់លើការអប់រំរបស់អាមេរិកដែលមានគុណភាពខ្ពស់នោះទេ។ ដើម្បីឲ្យកូនប្រុសរបស់គាត់ចូលរៀននៅសកលវិទ្យាល័យកំពូល គាត់បានធ្វើការសម្រេចចិត្តផ្លាស់ប្តូរជីវិត។

ដើម្បីទៅសហរដ្ឋអាមេរិក អតីតចៅហ្វាយដ៏ល្បីម្នាក់នេះបានបង្ខំបំផ្លាញឯកសារទាំងអស់របស់គាត់ ដែលមានន័យថាបោះបង់សិទ្ធិទាំងអស់របស់ខ្លួននៅក្នុងប្រទេសចិន។ ពេលនោះលោកហាក់មិនស្ទាក់ស្ទើរទាល់តែសោះ ដើម្បីអនាគតកូន គាត់នាំលុយទាំងអស់និងគ្រួសារផ្លាស់ទៅអាមេរិក។

១១ឆ្នាំបានកន្លងផុតទៅ គាត់នៅតែមិនអាចសម្របខ្លួនទៅនឹងជីវិតនៅអាមេរិកបាន មិនមានអារម្មណ៍ថាខ្លួនបាននៅទីនេះទេ។ នៅពេលដែលគាត់បានឃើញមនុស្សចាស់នៅអាមេរិកដែលរស់នៅតែម្នាក់ឯង គាត់ខ្លាចខ្លួនឯងនឹងដូចគ្នាដែរ។

ក្រោយមក ក្នុងឆ្នាំ ២០១២ លោក Chen ដែលពេលនោះមានអាយុ ៥៨ ឆ្នាំបានត្រឡប់ទៅប្រទេសចិនយ៉ាងស្ងាត់ស្ងៀមតែម្នាក់ឯង ដោយមិនបានប្រាប់សមាជិកគ្រួសារណាមួយឡើយ។ គាត់បានព្យាយាមស្វែងរកមកវិញនូវរបស់ដែលគាត់បានបាត់បង់អស់រយៈពេល ១០ឆ្នាំ។ ប៉ុន្តែ ការត្រលប់មកវិញមិនងាយស្រួលទេ នៅពេលដែលគាត់ធ្វើអន្តោប្រវេសន៍ទៅអាមេរិកគាត់បានបំផ្លាញឯកសារពាក់ព័ន្ធទាំងអស់។ ដោយសារគាត់មិនមានការចុះបញ្ជីគ្រួសារ គាត់មិនទទួលបានសិទ្ធិដូចពលរដ្ឋចិនស្របច្បាប់។

បន្ទាប់ពីចាយលុយអស់ហើយ គាត់ត្រូវរស់នៅវង្វេងដេកតាមផ្លូវ ប្រកបរបរចិញ្ចឹមជីវិតដោយរើសសំរាម និងលក់អេតចាយ។ នៅថ្ងៃខ្លះក៏មានសំណាងរកបាន២០Yuan បើមិនដូច្នេះទេ លុយនោះគ្រប់គ្រាន់ដើម្បីញ៉ាំនំប៉ាវចំហុយមួយប៉ុណ្ណោះ។ អំឡុងពេលកន្លងមក លោកបានគេងក្នុងសួនឧទ្យានក្នុងរដូវក្តៅ ហើយបានទៅស្ថានីយរថភ្លើងដើម្បីស្នាក់នៅក្នុងរដូវរងា។

ក្នុងជីវិតបច្ចុប្បន្ននាឆ្នាំនេះ លោក Chen មានអាយុជាង ៧០ឆ្នាំ ស្គមស្គាំង ខ្វះអាហារូបត្ថម្ភ បាត់ធ្មេញ រូបរាងស្រវាំង ភ្នែកជ្រៅ។ តែគាត់មិនដែលសុំជំនួយពីគ្រួសារគាត់នៅអាមេរិកទេ។

លោកបានបង្ហើបថា ភរិយាលោកមិនទទួលយកភាពអសមត្ថភាពរបស់លោកទេ ក្រោយមកដល់អាមេរិក ដូច្នេះពួកគេបានលែងលះគ្នាជាយូរមកហើយ។ អំពីកូនប្រុសរបស់គាត់ គាត់បានចែករំលែកថា៖ «គាត់បានសិក្សាផ្នែកគំនូរជីវចល រៀបការ និងចាប់ផ្តើមអាជីវកម្មនៅអាមេរិក។ ជីវិតរបស់គាត់ល្អណាស់ ប៉ុន្តែគាត់មិនទាក់ទងខ្ញុំឥឡូវនេះទេ។ ខ្ញុំក៏មិនរកដែរ»។

គេមិនដឹងថាមានជម្លោះអ្វីកើតឡើងរវាងឪពុកនិងកូន ប៉ុន្តែពួកគេមិនបានទាក់ទងគ្នាអស់រយៈពេលជាងមួយទសវត្សរ៍មកហើយ។ កូនប្រុសក៏មិនដែលលូកដៃចូលក្នុងជីវិតឪពុកដែរ ហើយក៏មិនបានផ្តល់ប្រាក់ផងដែរ។

យ៉ាងណាមិញ លោក Chen បានមានប្រសាសន៍ថា បំណងប្រាថ្នាដ៏ធំបំផុតរបស់គាត់នៅពេលនេះ គឺដើម្បីស្ដារការចុះបញ្ជីគ្រួសាររបស់គាត់នៅក្នុងប្រទេសចិន។ គាត់បានស្វែងរកជំនួយគ្រប់ទីកន្លែង ប៉ុន្តែជួបប្រទះនឹងឧបសគ្គ ហើយកន្លែងខ្លះថែមទាំងបដិសេធគាត់ដោយហេតុផលស្នាក់នៅខុសច្បាប់៕