មន្ត្រីកំពូលៗបង់ក្លាដែស ចុះចេញពីតំណែងបណ្តាក់គ្នា ចំពេលផ្ទុះបាតុកម្ម

តាមការចុះផ្សាយរបស់ CNA កាលពីសៅរ៍ទី១០ខែសីហាឆ្នាំ២០២៤, មន្ត្រីកំពូលៗរបស់ប្រទេសបង់ក្លាដែស បានចុះចេញពីតំណែងជាបន្តបន្ទាប់ ដោយចុងក្រោយបំផុតគឺប្រធានតុលាការកំពូលនិងប្រធានធនាគារកណ្តាល ព្រោះតែក្រុមនិស្សិតដែលធ្វើបាតុកម្ម ដាក់សម្ពាធខ្លាំងពេក។

សូមចុច Subscribe Channel Telegram កម្ពុជាថ្មី ដើម្បីទទួលបានព័ត៌មានថ្មីៗទាន់ចិត្ត

លោក Asif Nazrul ទីប្រឹក្សាក្រសួងច្បាប់ បានបង្ហោះ Facebook ថា ការសម្រេចចិត្តរបស់ប្រធានតុលាការកំពូលនិងប្រធានធនាគារកណ្តាល គឺធ្វើឡើងបន្ទាប់ពីក្រុមនិស្សិតព្រមានថា បើមិនព្រមចុះចេញទេនោះ អ្នកទាំងពីរនឹងជួបផលវិបាកធ្ងន់ធ្ងរជាក់ជាមិនខាន។

ស្របពេលជាមួយគ្នានោះ ទីប្រឹក្សាក្រសួងហិរញ្ញវត្ថុលោក Salehuddin Ahmed បានប្រាប់អ្នកយកព័ត៌មានថា ទេសាភិបាលធនាគារបង់ក្លាដែសលោក Abdur Rouf Talukder ក៏ប្រកាសលាលែងពីតំណែងផងដែរ ប៉ុន្តែសំណើចុះចេញនោះ មិនត្រូវទទួលយកឡើយព្រោះតែមុខតំណែងនេះ សំខាន់ខ្លាំងពេក។

លើសពីនេះ អភិបាលរងចំនួន៤រូប ត្រូវបានបង្ខំឲ្យលាលែងពីតំណែងដូចគ្នា ក្រោយពេលមន្ត្រីធនាគារប្រហែល៣០០ទៅ៤០០នាក់ នាំគ្នាតវ៉ាប្រឆាំង អំពើពុករលួយរបស់មន្ត្រីកំពូលៗ។

មិនត្រឹមប៉ុណ្ណឹង សាកលវិទ្យាធិការរងនៃសាកលវិទ្យាល័យ Dhaka លោក ASM Maksud Kamal ក៏បានលាលែងពីតំណែងផងដែរ។

សាកលវិទ្យាល័យនេះ គឺជាចំណុចស្នូលនៃបាតុកម្មដ៏សាហាវ ដែលផ្ទុះឡើងក្នុងខែកក្កដាប្រឆាំងនឹងប្រព័ន្ធកូតាការងាររបស់រដ្ឋាភិបាល រហូតប្រែក្លាយទៅជាយុទ្ធនាការទម្លាក់លោកស្រី Hasina ពីតំណែង។

លោកស្រី Hasina បានទៅជ្រកកោនក្នុងទីក្រុង ញូវដែលី បន្ទាប់ពីការបះបោរដែលសម្លាប់មនុស្សប្រហែល៣០០នាក់ភាគច្រើនជានិស្សិត បញ្ចប់ការគ្រប់គ្រងរយៈពេល១៥ឆ្នាំក្នុងប្រជាជាតិអាស៊ីខាងត្បូងដែលមានប្រជាជនចំនួន១៧០លាននាក់៕

អត្ថបទ៖ សុខ សុវណ្ណ

ចុចអាន៖ លោកស្រី Hasina នឹង​ត្រឡប់​ទៅ​បង់ក្លាដែស ឈរ​ឈ្មោះ​ក្នុង​ការ​បោះឆ្នោត​ថ្មី