ព័ត៌មានអន្ដរជាតិ

គីម ជុងអ៊ុន ប្តេជ្ញានាំជនរងគ្រោះដោយទឹកជំនន់ជាង ១៥ ០០០នាក់ ទៅទីក្រុងព្យុងយ៉ាង

បានផុស

៤ ខែ មុន

នៅ

ថ្ងៃអាទិត្យ ១១ សីហា ២០២៤

ដោយ

តាមការចុះផ្សាយរបស់កាសែត Rodong Sinmun កាលពីថ្ងៃសៅរ៍ទី១០ខែសីហាឆ្នាំ២០២៤, មេដឹកនាំកូរ៉េខាងជើង លោក គីម ជុងអ៊ុន បានបង្ហាញផែនការនាំយកមនុស្សដែលរងផលប៉ះពាល់ដោយភ្លៀងធ្លាក់ខ្លាំងនាពេលថ្មីៗនេះ ជាង ១៥ ០០០នាក់ ទៅកាន់រដ្ឋធានីព្យុងយ៉ាង។

សូមចុច Subscribe Channel Telegram កម្ពុជាថ្មី ដើម្បីទទួលបានព័ត៌មានថ្មីៗទាន់ចិត្ត

លោក គីម បានចុះទៅខេត្ត North Phyongan ភាគពាយព្យប្រទេសកាលពីថ្ងៃព្រហស្បតិ៍ និងថ្ងៃសុក្រ ដើម្បីពិនិត្យមើលតំបន់ ដែលរងការវាយប្រហារយ៉ាងដំណំ ដោយភ្លៀងធ្លាក់ខ្លាំងកាលពីចុងខែកក្កដា កន្លងទៅ។

ជាមួយការបង្ហាញក្តីអាណិតអាសូរចំពោះជនរងគ្រោះដោយទឹកជំនន់ លោកគីម បានថ្លែងប្រាប់ប្រជាជនក្នុងតំបន់ថា ពួកគេត្រូវរងទុក្ខវេទនា លោកពិតជាសោកស្ដាយណាស់ចំពោះរឿងនេះ។

លោកក៏និយាយដែរថា ទាហាននិងក្រុមការងារសរុប ១៣០ ០០០នាក់ នឹងត្រូវបញ្ជូនទៅកាន់តំបន់រងផលប៉ះពាល់ ដើម្បីពន្លឿនកិច្ចខិតខំប្រឹងប្រែងស្តារនិងកសាងឡើងវិញ។

តាមការប៉ាន់ស្មានរបស់លោកគីម, ជនរងគ្រោះដោយទឹកជំនន់ ប្រហែលត្រូវការពេលពី២ទៅ៣ខែ ដើម្បីស្តារជីវភាពឡើងវិញ បន្ទាប់ពីបញ្ចប់ការសាងសង់ផ្ទះ និងការងារជួសជុល ហើយមនុស្សជាង ១៥ ០០០នាក់ រួមទាំងមនុស្សចាស់និងកុមារផងនោះ នឹងត្រូវជម្លៀសទៅកាន់ទីក្រុងព្យុងយ៉ាងសិន រហូតដល់ដំណើរការនេះបញ្ចប់។

សូមបញ្ជាក់ថា ក្រៅពីខេត្ត North Phyongan, ខេត្ត២ផ្សេងទៀតរបស់កូរ៉េខាងជើង ក៏រងគ្រោះព្រោះទឹកជំនន់ផងដែរដូចជា Jagang និង Ryanggang។ កាលពីថ្ងៃទី២៧ខែកក្កដា លោក គីម បានបញ្ជូនក្រុមយោធាទៅជួយ តែមិនមែនជាក្រុមយុវជនវ័យក្មេងនោះទេ ដោយហេតុថា នៅក្នុងខេត្ត Jagang សម្បូរទៅដោយរោងចក្រផលិតសព្វាវុធសំខាន់ៗរបស់កូរ៉េខាងជើង៕

អត្ថបទ៖ សុខ សុវណ្ណ

ចុចអាន៖ មេដឹកនាំកូរ៉េខាងជើង បញ្ជូនយុវជន៣០ម៉ឺននាក់ទៅជួយក្នុងតំបន់ទឹកជំនន់