ព័ត៌មានអន្ដរជាតិ

លោក បៃដិន ព្រមានថា លោក ត្រាំ គឺជាគ្រោះថ្នាក់ពិតប្រាកដចំពោះសន្តិសុខអាមេរិក

បានផុស

៨ ខែ មុន

នៅ

ថ្ងៃចន្ទ ១២ សីហា ២០២៤

ដោយ

Chheang

ប្រធានាធិបតីអាមេរិក លោក ចូ បៃដិន នៅក្នុងបទសម្ភាសន៍តាមទូរទស្សន៍ជាលើកដំបូងក្រោយប្រកាសមិនឈរឈ្មោះសម្រាប់ការបោះឆ្នោតអាណត្តិថ្មី បានព្រមានថា បេក្ខភាពមកពីគណបក្សសាធារណរដ្ឋលោក ដូណាល់ ត្រាំ គឺជា «គ្រោះថ្នាក់ពិតប្រាកដចំពោះសន្តិសុខអាមេរិក»។

លោក ចូ បៃដិន និងលោក ដូណាល់ ត្រាំ (រូបភាព៖ CNN)

សូមចុច Subscribe Channel Telegram កម្ពុជាថ្មី ដើម្បីទទួលបានព័ត៌មានថ្មីៗទាន់ចិត្ត

លោក បៃដិន បានប្រាប់ទូរទស្សន៍ CBS News កាលពីថ្ងៃអាទិត្យថា៖ «ចាំពាក្យខ្ញុំទុក ប្រសិនបើគាត់ឈ្នះការបោះឆ្នោតនេះ រង់ចាំមើលអ្វីដែលនឹងកើតឡើង។ គាត់គឺជាគ្រោះថ្នាក់ពិតប្រាកដចំពោះសន្តិសុខអាមេរិក។ មើល៍ យើងកំពុងស្ថិតនៅចំណុចនៃការផ្លាស់ប្ដូរសំខាន់ក្នុងប្រវត្តិសាស្ត្រពិភពលោក… ហើយលទ្ធិប្រជាធិបតេយ្យគឺជាគន្លឹះ»។

ក្នុងបទសម្ភាសន៍ដដែលនេះ លោក បៃដិន បានគូសបញ្ជាក់ថា លោកទទួលស្គាល់ពីភាពបរាជ័យក្រោយចាញ់ការជជែកដេញដោលលើកដំបូងជាមួយលោក ត្រាំ តែប្រធានាធិបតីវ័យ៨១ឆ្នាំរូបនេះ បានសង្កត់ធ្ងន់ថា សុខភាពរបស់លោកបច្ចុប្បន្នមិនមែនជាបញ្ហាចោទនោះទេ។ លោក បៃដិន បានពន្យល់ថា ការចាកចេញរបស់លោកពីការឈរឈ្មោះជាបេក្ខភាពប្រធានាធិបតីម្ដងទៀត ក៏ដោយសារលោកបារម្ភពីការកើតមានជម្លោះផ្ទៃក្នុងគណបក្សរបស់លោក ហើយគោលបំណងធំបំផុតរបស់លោកគឺរារាំងលោក ត្រាំ ឡើងកាន់អំណាចម្ដងទៀតនាខែវិច្ឆិកាខាងមុខ។ លោក បៃដិន បាននិយាយថា៖ «ខ្ញុំមានកាតព្វកិច្ចចំពោះប្រទេស ធ្វើអ្វីដែលជារឿងសំខាន់បំផុតដែលយើងអាចធ្វើបាន ហើយនោះគឺ យើងត្រូវតែកម្ចាត់លោក ត្រាំ»។

គួររំឭកថា ក្នុងភាពចលាចលម្ដងជាពីរដងក្នុងឆាកនយោបាយអាមេរិក លោកប្រធានាធិបតី ចូ បៃដិន បានប្រកាសថា លោកមិនឈរឈ្មោះសម្រាប់ការបោះឆ្នោតឡើងវិញនៅថ្ងៃទី៥ខែវិច្ឆិកាខាងមុខនោះទេ ដោយជំនួសវិញនូវការគាំទ្រអនុប្រធានាធិបតី កាម៉ាឡា ហារីស ជាអ្នកបន្តវេន។ ការជជែកដេញដោលលើកទី១រវាងលោកស្រី ហារីស និងលោក ត្រាំ នឹងធ្វើឡើងនៅថ្ងៃទី១០ខែកញ្ញា ដោយមានការរៀបចំឡើងដោយទូរទស្សន៍ ABC News៕

ដោយ៖ ឈាង