ព័ត៌មានអន្ដរជាតិ

លោក បៃដិន ថា បទឈប់បាញ់នៅហ្គាហ្សាអាចទៅរួច មុនអាណត្តិរបស់លោកត្រូវបញ្ចប់

បានផុស

៣ ខែ មុន

នៅ

ថ្ងៃចន្ទ ១២ សីហា ២០២៤

ដោយ

Chheang

លោក ចូ បៃដិន បាននិយាយថា កិច្ចព្រមព្រៀងបទឈប់បាញ់នៅតំបន់ហ្គាហ្សាស្ទ្រីបនឹង «អាចធ្វើទៅបាន» មុនពេលបញ្ចប់អាណត្តិប្រធានាធិបតីរបស់លោក។

សូមចុច Subscribe Channel Telegram កម្ពុជាថ្មី ដើម្បីទទួលបានព័ត៌មានថ្មីៗទាន់ចិត្ត

លោក បៃដិន បាននិយាយនៅក្នុងការអត្ថាធិប្បាយដែលបានចាក់ផ្សាយកាលពីថ្ងៃអាទិត្យថា ទោះសល់ពេលប្រមាណជា៥ខែទៀតមុនបញ្ចប់អាណត្តិ លោកជឿជាក់ថា បទឈប់បាញ់នឹងនៅតែអាចធ្វើទៅបាន។ ប្រធានាធិបតីអាមេរិកវ័យ៨១ឆ្នាំ បានរៀបរាប់ថា៖ «ផែនការដែលខ្ញុំដាក់រួមគ្នា គាំទ្រដោយ G7 គាំទ្រដោយក្រុមប្រឹក្សាសន្តិសុខអង្គការសហប្រជាជាតិ ជាដើម នៅតែអាចដំណើរការបាន»។

លោក បៃដិន បានបន្តទៀតថា៖ «ខ្ញុំកំពុងធ្វើរឿងនោះជារៀងរាល់ថ្ងៃ ជាមួយក្រុមទាំងអស់របស់ខ្ញុំ ដើម្បីមើលវាថាវាមិនកើនឡើងទៅជាសង្រ្គាមនៅក្នុងតំបន់»។

គួររំឭកថា លោក បៃដិន ធ្លាប់បាននិយាយកាលពីថ្ងៃទី៣១ខែឧសភាថា អ៊ីស្រាអែលបានបង្ហាញកិច្ចព្រមព្រៀងបីដំណាក់កាល ដែលនឹងបញ្ចប់អរិភាពនៅក្នុងតំបន់ហ្គាហ្សា និងធានាការដោះលែងចំណាប់ខ្មាំងនៅក្នុងរង្វង់ដែលឡោមព័ទ្ធ។ ផែនការនេះរួមមានបទឈប់បាញ់ ការដោះដូរចំណាប់ខ្មាំង និងការកសាងតំបន់ហ្គាហ្សាឡើងវិញ។

អស់រយៈពេលជាច្រើនខែមកហើយ ដែលអេហ្ស៊ីប កាតា និងអាមេរិកបានដឹកនាំការចរចាដោយប្រយោលរវាងអ៊ីស្រាអែល និងក្រុមហាម៉ាស ប៉ុន្តែមិនទាន់មានកិច្ចព្រមព្រៀងណាមួយត្រូវសម្រេចបាននៅឡើយទេ ខណៈដែលអ៊ីស្រាអែលបានបដិសេធមិនបំពេញតាមការទាមទាររបស់ក្រុមប៉ាឡេស្ទីនក្នុងការបញ្ចប់សង្រ្គាម ដកទ័ពចេញពីតំបន់ហ្គាហ្សា និងអនុញ្ញាតឲ្យជនជាតិប៉ាឡេស្ទីនផ្លាស់ទីលំនៅត្រឡប់ទៅតំបន់ភាគខាងជើងវិញ។

អ៊ីស្រាអែលបានបន្តការវាយលុកយ៉ាងខ្លាំងក្លានៅតំបន់ហ្គាហ្សាស្ទ្រីប ចាប់តាំងពីការវាយប្រហាររបស់ក្រុមហាម៉ាសកាលពីថ្ងៃទី៧ខែតុលា បើទោះបីជាមានសំណើពីក្រុមប្រឹក្សាសន្តិសុខអង្គការសហប្រជាជាតិទាមទារឲ្យមានការឈប់បាញ់ជាបន្ទាន់ក៏ដោយ។

ចាប់តាំងពីផ្ទុះសង្គ្រាមឆ្នាំមុន ជនជាតិប៉ាឡេស្ទីនប្រហែល ៣៩ ៨០០នាក់ត្រូវបានសម្លាប់ ដែលភាគច្រើនជាស្ត្រី និងកុមារ ហើយជាង ៩២ ០០០នាក់បានរងរបួស៕

ដោយ៖ ឈាង