ព័ត៌មានអន្ដរជាតិ

ហាម៉ាស ថា បទឈប់បាញ់ហ្គាហ្សាត្រូវតែដូចគម្រោងដើមរបស់លោក បៃដិន

បានផុស

១ ថ្ងៃ មុន

នៅ

ថ្ងៃចន្ទ ១២ សីហា ២០២៤

ដោយ

ក្រុមហាម៉ាស បាននិយាយថា ការបន្តកិច្ចចរចាបទឈប់បាញ់ឡើងវិញអំពីជម្លោះនៅតំបន់ហ្គាហ្សា គួរតែផ្អែកលើផែនការពីមុន ជាជាងរៀបចំកិច្ចចរចាថ្មី។

សូមចុច Subscribe Channel Telegram កម្ពុជាថ្មី ដើម្បីទទួលបានព័ត៌មានថ្មីៗទាន់ចិត្ត

កាលពីសប្តាហ៍មុន អ្នកសម្រុះសម្រួលអន្តរជាតិមកពីកាតា អេហ្ស៊ីប និងសហរដ្ឋអាមេរិក បានជំរុញឲ្យអ៊ីស្រាអែល និងក្រុមហាម៉ាសចូលរួមកិច្ចចរចាស្តីពីបទឈប់បាញ់ និងកិច្ចព្រមព្រៀងដោះលែងចំណាប់ខ្មាំងនៅថ្ងៃទី១៥ខែសីហា។ អ៊ីស្រាអែលបានឆ្លើយតបកាលពីថ្ងៃព្រហស្បតិ៍ដោយនិយាយថា ខ្លួននឹងបញ្ជូនក្រុមអ្នកចរចាទៅចូលរួមក្នុងកិច្ចប្រជុំ។

កិច្ចចរចាររវាងអ៊ីស្រាអែល និងក្រុមសកម្មប្រយុទ្ធដែលមានការគាំទ្រដោយអ៊ីរ៉ង់ បានបរាជ័យកាលពីខែកក្កដា បន្ទាប់ពីលក្ខខណ្ឌថ្មីត្រូវបានណែនាំទៅក្នុងក្របខ័ណ្ឌដែលបង្ហាញដោយប្រធានាធិបតីអាមេរិកលោក ចូ បៃដិន កាលពីខែឧសភា។

នៅក្នុងសេចក្តីថ្លែងការណ៍រួមមួយកាលពីសប្តាហ៍មុន ក្រុមអ្នកសម្រុះសម្រួល បាននិយាយថា កិច្ចពិភាក្សាអាចធ្វើឡើងនៅថ្ងៃទី១៥ខែសីហា នៅរដ្ឋធានី Doha ឬរដ្ឋធានី Cairo ដោយអំពាវនាវឲ្យអ៊ីស្រាអែល និងក្រុមហាម៉ាស «បិទចន្លោះប្រហោងដែលនៅសល់ទាំងអស់ ហើយចាប់ផ្តើមការអនុវត្តកិច្ចព្រមព្រៀងដោយគ្មានការពន្យារពេលបន្ថែមទៀត»។

សេចក្ដីថ្លែងការណ៍ដដែល បានបញ្ជាក់ទៀតថា «កិច្ចព្រមព្រៀងក្របខ័ណ្ឌ» ដោយផ្អែកលើ «គោលការណ៍» ដែលបានធ្វើឡើងពីមុនដោយលោក បៃដិន កាលពីថ្ងៃទី៣១ខែឧសភា បានបញ្ចប់រួចរាល់ហើយ ដែលមានដូចជាបទឈប់បាញ់ពេញលេញ និងការដោះលែងចំណាប់ខ្មាំងមួយចំនួន។

ក្រុមហាម៉ាស បានឆ្លើយតបទៅនឹងសម្ពាធពីអ្នកសម្រុះសម្រួលដោយអំពាវនាវឲ្យមានផែនការមួយបង្កើតឡើងដោយផ្អែកលើ «ចក្ខុវិស័យ» របស់លោក បៃដិន កាលពីខែឧសភា ហើយសំខាន់ត្រូវយល់ព្រមបន្តកិច្ចចរចាពីចំណុចដែលពួកគេបានផ្អាកជាជាងការផ្តួចផ្តើមគំនិតថ្មីដាក់បន្ថែមក្នុងកិច្ចចរចា។

សេចក្តីថ្លែងការណ៍របស់ហាម៉ាស បានប្រកាសថា៖ «អ្នកសម្របសម្រួលគួរតែអនុវត្តរឿងនេះលើការវាយលុករបស់អ៊ីស្រាអែល ជំនួសឲ្យការបន្តកិច្ចចរចាបន្ថែមទៀត ឬសំណើថ្មីដែលនឹងផ្តល់ការពង្រីកទំហំវាយលុក និងផ្តល់ពេលវេលាថែមទៀត ដើម្បី(ឲ្យអ៊ីស្រាអែល)បន្តការប្រល័យពូជសាសន៍ប្រឆាំងនឹងប្រជាជនរបស់យើង»។

កាលពីថ្ងៃអាទិត្យ យោធាអ៊ីស្រាអែលបានបញ្ជាឲ្យប្រជាជនប៉ាឡេស្ទីនរាប់ម៉ឺននាក់នៅតំបន់ Khan Younis ភាគខាងត្បូងហ្គាហ្សា ផ្លាស់ទីលំនៅទៅកន្លែងដែលខ្លួនបានកំណត់ឬហៅថាជា «តំបន់មនុស្សធម៌»។

ការបញ្ជាផ្លាស់ទីលំនៅនេះ បានធ្វើឡើងបន្ទាប់ពីការវាយប្រហារតាមអាកាសរបស់អ៊ីស្រាអែលទៅលើអគារសិក្សាមួយកន្លែងនៅតំបន់ហ្គាហ្សាកាលពីថ្ងៃសៅរ៍ដែលបានសម្លាប់មនុស្សជាង ៧០នាក់។

លោក Daniel Hagari អ្នកនាំពាក្យរបស់កងកម្លាំងការពារអ៊ីស្រាអែល បាននិយាយថា សាលារៀននោះ «បានបម្រើការជាកន្លែងសកម្មរបស់ពួកហាម៉ាស និងក្រុមជីហាតអ៊ីស្លាម»។ លោក Hagari បានសង្កត់ធ្ងន់ថា ដោយផ្អែកតាមការចង្អុលបង្ហាញពីភ្នាក់ងារសម្ងាត់ វាមានភាគរយខ្ពស់ដែលមេបញ្ជាការកងពលតូចម្នាក់របស់ក្រុមជីហាតអ៊ីស្លាម លោក Ashraf Juda ក៏ស្ថិតនៅក្នុងអគារសាលាដែលរងការវាយប្រហារកាលពីថ្ងៃសៅរ៍ផងដែរ។ ប៉ុន្តែ លោក Hagari បានប្រាប់ថា វាមិនទាន់ច្បាស់ទេថាមេបញ្ជាការរូបនោះត្រូវបានសម្លាប់ក្នុងការវាយប្រហារឬក៏យ៉ាងណានោះទេ។

ការវាយប្រហារតាមផ្លូវអាកាសរបស់អ៊ីស្រាអែល ត្រូវបានរិះគន់ដោយមហាអំណាចលោកខាងលិចនិងក្នុងតំបន់។ ប្រទេសអេហ្ស៊ីប បាននិយាយថា អ៊ីស្រាអែលគ្មានបំណងចង់ឈានដល់បទឈប់បាញ់ ឬបញ្ចប់សង្គ្រាមនៅតំបន់ហ្គាហ្សានោះឡើយ។

យ៉ាងណា អ៊ីស្រាអែល បានអះអាងថា ក្រុមហាម៉ាសកំពុងប្រើប្រាស់ហេដ្ឋារចនាសម្ព័ន្ធស៊ីវិល ដើម្បីរៀបចំផែនការ និងធ្វើការវាយប្រហារ ហើយនោះជាមូលហេតុដែលខ្លួនបាននិងកំពុងកំណត់គោលដៅលើមន្ទីរពេទ្យ និងសាលារៀន ដែលជាកន្លែងដែលត្រូវបានការពារក្រោមច្បាប់អន្តរជាតិ។ ពាក់ព័ន្ធនឹងការលើកឡើងដូច្នោះ ហាម៉ាសបានបដិសេធជានិច្ចចំពោះការចោទប្រកាន់នេះ។

សូមបញ្ជាក់សាជាថ្មីម្ដងទៀតថា ក្រុមហាម៉ាសបានសម្លាប់មនុស្សប្រហែល ១២០០នាក់នៅក្នុងការវាយប្រហារលើអ៊ីស្រាអែលកាលពីថ្ងៃទី៧ខែតុលា ហើយបានចាប់មនុស្ស ២៥១នាក់ផ្សេងទៀតទៅកាន់ហ្គាហ្សាធ្វើជាចំណាប់ខ្មាំង។ ចំណែកឯការវាយសងសឹករបស់អ៊ីស្រាអែលនៅតំបន់ហ្គាហ្សា បានឆក់យកជីវិតមនុស្សមិនតិចជាង ៣៩ ៧៩០នាក់ ដែលភាគច្រើនជាស្ត្រី និងកុមារ ហើយជាង ៩២ ០០០នាក់បានរងរបួស៕

ដោយ៖ ឈាង