លោក បៃដិន ប្រាប់លក្ខខណ្ឌតែមួយគត់ ដែលអាចរារាំងអ៊ីរ៉ង់ មិនឲ្យសងសឹកអ៊ីស្រាអែល

ប្រធានាធិបតីអាមេរិក លោក ចូ បៃដិន និយាយកាលពីថ្ងៃអង្គារទី១៣ខែសីហាថា កិច្ចព្រមព្រៀងបទឈប់បាញ់នៅហ្គាហ្សា គឺជាលក្ខខណ្ឌតែមួយគត់ ដែលអាចរារាំងអ៊ីរ៉ង់មិនឲ្យវាយប្រហារសងសឹកអ៊ីស្រាអែល ចំពោះការសម្លាប់មេដឹកនាំក្រុមហាម៉ាសបាន។ នេះបើតាមការចុះផ្សាយរបស់ CNA។

សូមចុច Subscribe Channel Telegram កម្ពុជាថ្មី ដើម្បីទទួលបានព័ត៌មានថ្មីៗទាន់ចិត្ត

សម្តីរបស់លោក បៃដិន កើត​ឡើង​បន្ទាប់​ពី​​អ៊ីរ៉ង់​ ​ច្រាន​ចោល​ការ​អំពាវនាវ​របស់​លោក​ខាង​លិច​ដែលសុំកុំឲ្យខ្លួនបើកការវាយប្រហារសងសឹកលើអ៊ីស្រាអែល។

សាធារណរដ្ឋឥស្លាមនិងសម្ព័ន្ធមិត្ត បានស្តីបន្ទោសអ៊ីស្រាអែលចំពោះការសម្លាប់លោក Ismail Haniyeh កាលពីថ្ងៃទី៣១ខែកក្កដា ក្នុងអំឡុងដំណើរទស្សនកិច្ចទៅកាន់ទីក្រុង តេហេរ៉ង់ សម្រាប់ការស្បថចូលកាន់តំណែងរបស់ប្រធានាធិបតីអ៊ីរ៉ង់លោក Masoud Pezeshkian ​ហើយការប្តេជ្ញាសងសឹកនោះ កើតឡើងត្រឹមប៉ុន្មានម៉ោងប៉ុណ្ណោះ បន្ទាប់ពីអ៊ីស្រាអែលបាញ់មីស៊ីលដាក់ទីក្រុង បេរូត នៃប្រទេសលីបង់ ដោយសម្លាប់មេបញ្ជាការជាន់ខ្ពស់ក្រុមហេសបូឡា។

នៅពេលសួរថាតើបទឈប់បាញ់រវាងអ៊ីស្រាអែល និងក្រុមហាម៉ាស អាចទប់ទល់នឹងការវាយលុករបស់អ៊ីរ៉ង់បានដែរឬទេ លោក បៃដិន ក៏ឆ្លើយប្រាប់អ្នកសារព័ត៌មានក្នុងទីក្រុង New Orleans ថា នោះគឺជាការរំពឹងទុករបស់លោក ហើយនោះជាលក្ខខណ្ឌតែមួយគត់។

ការអះអាងរបស់ប្រធានាធិបតីអាមេរិក កើតឡើងមួយថ្ងៃប៉ុណ្ណោះ បន្ទាប់ពីសេតវិមានបានព្រមានអំពីលទ្ធភាពវាយប្រហារសងសឹកអ៊ីស្រាអែល ពីសំណាក់ភាគីអ៊ីរ៉ង់ឬក្រុមប្រដាប់អាវុធគាំទ្រក្រុងតេហេរ៉ង់ នៅសប្តាហ៍នេះតែម្តង។

អ្នកនាំពាក្យក្រុមប្រឹក្សាសន្តិសុខជាតិសេតវិមានលោក John Kirby និយាយថា «យើងសូមចែករំលែកក្តីបារម្ភ និងពេលវេលា ដែលអ៊ីរ៉ង់និងចលនាប្រដាប់អាវុធគាំទ្រពួកគេ អាចបើកការវាយប្រហារសងសឹកអ៊ីស្រាអែលនៅសប្តាហ៍នេះ ដូច្នេះសូមត្រៀមខ្លួននិងប្រុងប្រយ័ត្ន»៕

អត្ថបទ៖ សុខ សុវណ្ណ

ចុចអាន៖ អាមេរិក ព្រមានឲ្យអ៊ីស្រាអែល ត្រៀមខ្លួន ព្រោះអ៊ីរ៉ង់ នឹងសងសឹកនៅសប្តាហ៍នេះ