ព័ត៌មានអន្ដរជាតិ

នាយករដ្ឋមន្ត្រីជប៉ុន ប្រកាសមិនឈរឈ្មោះទៀតទេ ដោយសារតែរឿងអាស្រូវ

បានផុស

៦ ខែ មុន

នៅ

ថ្ងៃពុធ ១៤ សីហា ២០២៤

ដោយ

Chheang

នាយករដ្ឋមន្ត្រីជប៉ុន លោក Fumio Kishida បាននិយាយថា លោកនឹងចុះចេញពីតំណែងនៅខែកញ្ញាខាងមុខ បន្ទាប់កាន់អំណាចបានរយៈពេល៣ឆ្នាំតាំងពីឆ្នាំ២០២១។ ការលាលែងនេះ ត្រូវគេដឹងថាដោយសាររឿងអាស្រូវនយោបាយ និងបញ្ហាសេដ្ឋកិច្ចនៃការធ្លាក់ចុះលុយយ៉េនយ៉ាងគំហុក។

នាយករដ្ឋមន្ត្រីជប៉ុន លោក Fumio Kishida (រូបភាព៖ AP)

សូមចុច Subscribe Channel Telegram កម្ពុជាថ្មី ដើម្បីទទួលបានព័ត៌មានថ្មីៗទាន់ចិត្ត

លោក Kishida បានប្រកាសនៅក្នុងសន្និសីទសារព័ត៌មានតាមទូរទស្សន៍នៅថ្ងៃពុធនេះថា លោកនឹងមិនឈរឈ្មោះជាប្រធានគណបក្សប្រជាធិបតេយ្យសេរី (LDP) ដែលបានន័យថា លោកក៏នឹងត្រូវចុះចេញពីតំណែងជានាយករដ្ឋមន្ត្រីផងដែរ ខណៈគណបក្ស LDP គ្រោងរៀបចំការបោះឆ្នោតបក្សជ្រើសតាំងប្រធានថ្មីនាខែកញ្ញាខាងមុខ។ គណបក្ស LDP ជាបក្សកាន់អំណាចស្ទើរតែគ្រប់អាណត្តិនៅជប៉ុន គិតចាប់តាំងពីការបង្កើតបក្សតាំងឆ្នាំ១៩៥៥មកម៉្លេះ។ លោក Kishida បាននិយាយថា៖ «ខ្ញុំនឹងបន្តធ្វើអ្វីគ្រប់យ៉ាងដែលខ្ញុំអាចធ្វើបានជានាយករដ្ឋមន្ត្រីរហូតដល់ចុងបញ្ចប់នៃអាណត្តិរបស់ខ្ញុំនៅក្នុងខែកញ្ញា»។

ការសម្រេចចិត្តលាលែងពីតំណែងរបស់លោក Kishida ធ្វើឡើងបន្ទាប់ពីបែកធ្លាយរឿងអាស្រូវជាច្រើនពាក់ព័ន្ធនឹងអំពើពុករលួយនៅក្នុងគណបក្ស LDP ទាក់ទិននឹងការកឹបកេងលុយដែលរៃអង្គាសបានរបស់បក្ស ហើយឈានដល់ការចាប់ខ្លួនមន្ត្រីជាប់ពាក់ព័ន្ធប៉ុន្មាននាក់ កាលពីខែមករាកន្លងទៅ។ លោក Kishida បានរៀបរាប់ថា លោកពុំស្ទាក់ស្ទើរក្នុងការទទួលខុសត្រូវឡើយក្នុងនាមជាប្រធានបក្ស LDP ចំពោះបញ្ហាបង្កឡើងដោយសមាជិកបក្សរបស់លោក។

ប្រធានថ្មីនៃបក្ស LDP នឹងត្រូវបង្រួបបង្រួមការបែកបាក់នៅក្នុងបក្ស ហើយដោះស្រាយបញ្ហាដែលទំនងជាកើនឡើងបន្ថែមទៀតដោយសារវិបត្តិសេដ្ឋកិច្ចជប៉ុនសព្វថ្ងៃ ព្រោះការធ្លាក់នៃលុយយ៉េន ក៏ដូចជាការកើនឡើងភាពតានតឹងភូមិសាស្ត្រនយោបាយជាមួយប្រទេសចិន៕

ដោយ៖ ឈាង

Related Topics:ប្រទេសជប៉ុន