លោក Yoon Suk Yeol បន្ទន់​ជំហរខ្លួន​ជាមួយ​របប​កូរ៉េខាងជើង​​

បងប្អូន​គូសត្រូវ​កូរ៉េខាងត្បូង​និង​កូរ៉េខាង​ជើង​​​​​ដែល​រង​ការ​ប្រេះ​ឆា​យ៉ាង​ខ្លាំង​ក្នុង​រយៈពេល​ប៉ុន្មានឆ្នាំ​ចុង​ក្រោយ អាច​​បន្ធូរ​ភាព​​តាន​តឹង​​​​នឹងគ្នា​​​ បន្ទាប់​ពី​ប្រធានាធិបតីកូរ៉េខាងត្បូង លោក Yoon Suk Yeol បានផ្តល់អនុសាសន៍បង្កើតស្ថាប័នពិគ្រោះយោបល់ការងារជាមួយកូរ៉េខាងជើង។

​ក្រោយ​​ការ​ឈ្នះឆ្នោ​​​តនិង​ចូលកាន់​តំណែង​ប្រធានាធិបតី​ក្នុងឆ្នាំ​២០២២​ លោក Yoon Suk Yeol ដែល​ជា​អ្នក​ប្រកាន់​គោល​នយោបាយ​​​តឹង​រឹង​មួយ​រូប​ចំពោះ​របប​ទីក្រុង​ព្យុងយ៉ាង​​ បាន​បង្ហាញ​ជំហរទន់​ភ្លន់​ឡើង​វិញះ​ដើម្បីពិភាក្សារក​វិធីបន្ធូរបន្ថយភាពតានតឹង និងបន្តកិច្ចសហប្រតិបត្តិការសេដ្ឋកិច្ច ខណៈដែលលោកបានដាក់ចេញនូវចក្ខុវិស័យលើការបង្រួបបង្រួមជាមួយប្រទេសជិតខាង។ នេះបើយោងតាមការចេញផ្សាយរបស់សារព័ត៌មាន CNAនៅថ្ងៃទី១៥ខែសីហានេះ។

នៅក្នុងសុន្ទរកថាថ្ងៃរំដោះជាតិដែលប្រារព្ធខួបលើកទី៧៩នៃឯករាជ្យភាពពីការគ្រប់គ្រងអាណានិគមរបស់ប្រទេសជប៉ុនឆ្នាំ ១៩១០-១៩៤៥ បន្ទាប់ពីសង្គ្រាមលោកលើកទី២ លោក Yoon បាននិយាយថា លោកបានត្រៀមខ្លួនរួចជាស្រេចដើម្បីចាប់ផ្តើមកិច្ចសហប្រតិបត្តិការនយោបាយ និងសេដ្ឋកិច្ច ប្រសិនបើកូរ៉េខាងជើង «បោះជំហានមួយជំហាន» ឆ្ពោះទៅរកការរំសាយអាវុធនុយក្លេអ៊ែរ។

ជាមួយគ្នានេះលោក Yoon ថាការបើកដំណើរការក្រុមការងារអន្តរកូរ៉េនេះ អាចជួយបន្ធូរបន្ថយភាពតានតឹង និងដោះស្រាយបញ្ហានានា ចាប់ពីកិច្ចសហប្រតិបត្តិការសេដ្ឋកិច្ច ដល់ការផ្លាស់ប្តូររវាងប្រជាជន និងប្រជាជន និងជួយដល់ការជួបជុំគ្រួសារដែលបែកបាក់ដោយសង្រ្គាមកូរ៉េឆ្នាំ ១៩៥០-៥៣។

លោកYoon បានប្រើសុន្ទរកថានេះជាឱកាសមួយដើម្បីបង្ហាញគម្រោងសម្រាប់ការបង្រួបបង្រួម និងធ្វើការផ្សព្វផ្សាយជាថ្មីទៅកាន់ទីក្រុងព្យុងយ៉ាង បន្ទាប់ពីការផ្តល់ជូនថ្មីៗរបស់រដ្ឋាភិបាលកូរ៉េខាងត្បូងក្នុងការផ្តល់ជំនួយសង្គ្រោះសម្រាប់ការខូចខាតដោយទឹកជំនន់នៅភាគខាងជើងដែលត្រូវបានច្រានចោល។ទោះយ៉ាងណាក្ដី​​រំពឹង​ទុកពីការបង្រួបបង្រួមហាក់នៅឆ្ងាយ ខណៈទំនាក់ទំនងរវាងប្រទេសទាំងពីរមានកម្រិតទាបបំផុតក្នុងរយៈពេលជាច្រើនទស្សវត្សរ៍ ស្របពេលដែលកូរ៉េខាងជើងកំពុងជំរុញសមត្ថភាពនុយក្លេអ៊ែរ និងម៉ីស៊ីលរបស់ខ្លួន ហើយចាត់វិធានការដើម្បីកាត់ផ្តាច់ទំនាក់ទំនងជាមួយកូរ៉េខាងត្បូង ដោយចាត់ទុកកូរ៉េខាងត្បូងជាសត្រូវចម្បង។

គួរបញ្ជាក់ថាសុន្ទរកថានេះបានកើតឡើងចំពេលមានជម្លោះជាមួយសមាជិកសភាបក្សប្រឆាំងជុំវិញការតែងតាំងលោក Yoon ដែលពួកគេចាត់ទុកថាជាអ្នកគាំទ្រប្រទេសជប៉ុនជាអ្នកត្រួតពិនិត្យឡើងវិញដើម្បីមើលការខុសត្រូវលើសារមន្ទីរឯករាជ្យជាតិ ដែលជាសញ្ញាមួយផ្សេងទៀតនៃការបែងចែកនយោបាយ និងមតិផ្សេងគ្នាជុំវិញកិច្ចខិតខំប្រឹងប្រែងរបស់លោក Yoon ក្នុងការពង្រឹងទំនាក់ទំនងសន្តិសុខជាមួយទីក្រុងតូក្យូ។យ៉ាងណាការិយាល័យរបស់លោក Yoon បាននិយាយថាមានការយល់ច្រឡំអំពីការតែងតាំងនេះ ហើយកំពុងស្វែងរកវិធីដើម្បីដោះស្រាយ។

នៅក្នុងសុន្ទរកថានោះលោក Yoon ក៏បានលើកឡើងពីគំនិតនៃផែនការបើកសន្និសីទអន្តរជាតិស្តីពីសិទ្ធិមនុស្សរបស់ប្រទេសកូរ៉េខាងជើង និងមូលនិធិមួយដើម្បីលើកកម្ពស់ការយល់ដឹងជាសកលអំពីបញ្ហានេះ គាំទ្រក្រុមសកម្មជន និងពង្រីកលទ្ធភាពទទួលបានព័ត៌មានពីខាងក្រៅរបស់ប្រជាជនកូរ៉េខាងជើងឲ្យបានយល់អំពីតម្លៃនៃសេរីភាព៕

អត្ថបទ៖ ប៊ុន សុភាព