កូនស្រីពៅលោកថាក់ស៊ីន បង្កើតប្រវត្តិសាស្រ្តថៃ ក្លាយជានាយករដ្ឋមន្ត្រីក្មេងជាងគេបំផុត

រដ្ឋសភាថៃ បានបោះឆ្នោតជ្រើសតាំងកូន​​ស្រី​ពៅ​របស់​លោក ថាក់ស៊ីន គឺ​លោកស្រី ផែថងថាន ស៊ីណា​វ៉ាត្រា (Paetongtarn Shinawatra) អាយុ៣៧ឆ្នាំ ឲ្យក្លាយជានាយករដ្ឋមន្ត្រីទី៣១ ហើយការឡើងកាន់តំណែងនេះ ធ្វើឲ្យលោកស្រីបង្កើតប្រវត្តិសាស្រ្តថៃ ក្នុងនាមជា នាយករដ្ឋមន្ត្រីមានវ័យក្មេងជាងគេបំផុតរបស់ប្រទេស។ 

ផែថងថាន ឬមានឈ្មោះហៅក្រៅថា Ung Ing គឺជាសមាជិកទី៣ខៃគ្រួសារត្រកូលថាក់ស៊ីន ដែលឡើងកាន់តំណែងកំពូលរបស់ប្រទេសថៃ។ លោកស្រីក្តាប់បានអំណាចនេះ ក្រោយពេលអតីតនាយករដ្ឋមន្ត្រីមកពីគណបក្សភឿថៃដូចគ្នាគឺលោក សេដ្ឋា ថាវីស៊ីន ត្រូវបានតុលាការធម្មនុញ្ញា ចេញសាលក្រមដកតំណែង ជុំវិញការតែងតាំងទណ្ឌិត ឲ្យចូលធ្វើការក្នុងគណៈរដ្ឋមន្ត្រី។

តាមការចុះផ្សាយរបស់ Bangkok Post នៅថ្ងៃសុក្រទី១៦ខែសីហាឆ្នាំ២០២៤ ក្នុងការបោះឆ្នោតរបស់រដ្ឋសភា លោកស្រីផែថងថាន ទទួលបានសំឡេងគាំទ្រ៣១៩ ប្រឆាំង១៤៥ និងអនុបវាទ២៧សំឡេង។

ក្រោយការបោះឆ្នោតនេះ ផែថងថាន នឹង​​ត្រូវ​រង់ចាំ​ការ​យល់​ស្រប​ពីព្រះមហាក្សត្រ​ថៃ Maha Vajiralongkorn មុនពេលលោកស្រី​អាចចូលកាន់តំណែងជាផ្លូវការ និងតែងតាំងគណៈរដ្ឋមន្ត្រី។

ខាងក្រោមនេះជាប្រវត្តិត្រួសៗរបស់លោកស្រី ផែថងថាន

លោកស្រីកើតនៅថ្ងៃទី២១ខែសីហាឆ្នាំ១៩៨៦ ហើយមានប្រវត្តិរៀន​សូត្រ​​ខាង​វិទ្យាសាស្រ្ត​នយោបាយ គ្រប់គ្រង​ធុរកិច្ច​និង​ជាអ្នក​ជំនួញ មុន​ប្រឡូក​​ចូល​ក្នុង​វិស័យ​នយោបាយ​ដ៏លេចធ្លោ​មុន​ការ​បោះឆ្នោត​សកល​ឆ្នាំ​២០២៣។

លោកស្រី ផែថងថាន ស៊ីណា​វ៉ាត្រា ​ធ្លាប់​​អមដំណើរ​ឪពុក​លោក​ ថាក់ស៊ីន ស៊ីណា​វ៉ាត្រា ជា​លក្ខណៈគ្រួសារ​ មកកាន់​​​កម្ពុជាកាលខែ​មីនា​​ឆ្នាំ២០២៤​ ដើម្បី​ជួប​ជុំ​សួរសុខទុក្ខ​​​ជា​លក្ខណៈមិត្តភាព​ផង និង​ជា​គ្រួសារ​​ផង ជាមួយ​​​សម្តេច​តេជោ ហ៊ុន សែន។​

​ការ​ប្រឡូក​ចូល​នយោបាយ​របស់​កូន​ស្រី​ពៅ លោក​ថាក់ស៊ី​ន បាន​ធ្វើឲ្យគណបក្ស​ភឿថៃ​កើន​ឡើង​ប្រជា​ប្រិយភាព​ក្រឺតៗ​កាល​ពី​អំឡុង​ខែ​មិថុនា​ឆ្នាំ​២០២៣ ពេល​ដែល​​គណបក្ស​នេះ​បាន​តែង​តាំង​លោកស្រី​ជា​​អ្នក​ដឹកនាំ​ និង​​​ឈាន​ទៅ​​​​កាន់តំណែង​​បេក្ខភាព​នាយករដ្ឋមន្ត្រី​​​របស់​គណបក្ស​នេះ​ផ្ទាល់។​

យោងតាម​គេហទំព័រ www.prestigeonline.com លោកស្រី ផែថង​​ថាន បានបញ្ចប់​ថា្នក់​បរិញ្ញាបត្រ​ផ្នែក​វិទ្យាសាស្ត្រ​នយោបាយ ដែល​ជំនាញ​ខាង​សង្គមវិទ្យា (Sociology) និង​នរវិទ្យា (Anthropology) ពី​សាកលវិទ្យាល័យ Chulalongkorn ក្នុងប្រទេស​ថៃ មុន​បន្ត​ការសិក្សា​ថ្នាក់​អនុបណ្ឌិត​ផ្នែក​គ្រប់គ្រង​សណ្ឋាគារ​អន្តរជាតិ នៅ​សាកលវិទ្យាល័យ Surrey ​អង់គ្លេស​។​

​ក្រៅពី​តួនាទី​គ្រប់គ្រង លោកស្រី ក៏​ជា​សមាជិក​ក្រុមប្រឹក្សាភិបាល សម្រាប់​ធុរកិច្ច​ផ្សេងៗ​ទៀត ក្នុង​ទ្រព្យសកម្ម​របស់​ក្រុមហ៊ុន ដូច​ជា​សណ្ឋាគារ Rosewood Bangkok និង​សណ្ឋាគារ Thames Valley Khao Yai Hotel ព្រមទាំង​កន្លែង​វាយ​កូន​គោល Alpine Golf Club​ ផងដែរ។​

​លោកស្រីបាន​រៀបការ​ជាមួយ​លោក Pidok Por Sooksawas (Por) ដែលជា​អាកាសយានិក នៅ​ក្រុមហ៊ុន​អាកាសចរណ៍ Thai Aviation Service ហើយ​ជាមួយគ្នានេះ លោកស្រី​និយាយ​ដោយ​ឥត​លាក់លៀម​ថា ខ្លួន​ចូលចិត្ត​ការដើរ​កម្សាន្ត ដើម្បី​នាំបទពិសោធន៍យកមក​អភិវឌ្ឍ​សណ្ឋាគារ​របស់​នាងឲ្យមាន​​ភាព​កាន់តែ​ប្រសើរឡើងៗ​ក្នុងប្រទេស​ថៃ​។

​បណ្តាញសារព័ត៌មាន The Nation ដែលមាន​មូលដ្ឋាន​នៅ​ប្រទេស​ថៃ បាន​ផ្សព្វផ្សាយ​មុន​ការ​បោះឆ្នោតខែ​ឧសភា​ឆ្នាំ​២០២៣ ថា លោកស្រីកើន​ប្រជា​ប្រិយភាព​យ៉ាង​ខ្លាំង​ ពេល​ធ្វើ​ដំណើរ​ទៅ​ភាគ​ឦសាន​ប្រទេស។

សូមបញ្ជាក់ថា ក្រៅពីបង្កើតប្រវត្តិសាស្រ្តជានាយករដ្ឋមន្ត្រីក្មេងជាងគេបំផុតរបស់ប្រទេសថៃ ផែថងថាន ​ក៏នឹង​ក្លាយ​ជា​នាយក​រដ្ឋមន្ត្រី​ស្ត្រី​ទី​ពីរ​របស់​ប្រទេស​នេះផងដែរ បន្ទាប់​ពី​ម្តាយ​មីង​គឺ​លោកស្រី យីងឡាក់ (Yingluck)៕

អត្ថបទ៖ សុខ សុវណ្ណ

ចុចអាន៖ កូនស្រី​ពៅ​លោក ថាក់ស៊ីន ក្លាយ​ជា​នាយករដ្ឋមន្ត្រី​ថៃ​ទី​៣១