ព័ត៌មានអន្ដរជាតិ

ចិននឹងរឹតបន្តឹងលើការនាំចេញសារធាតុរ៉ែដ៏សំខាន់ដែលប្រើក្នុងបន្ទះឈីប

បានផុស

៧ ខែ មុន

នៅ

ថ្ងៃសៅរ៍ ១៧ សីហា ២០២៤

ដោយ

ប្រទេសចិននឹងរឹតលើការនាំចេញរបស់របរដែលទាក់ទងនឹងសារធាតុរ៉ែដ៏សំខាន់មួយហៅថា antimony ចំពេលសហរដ្ឋអាមេរិករឹតបន្តឹងលើការនាំចេញបន្ទះឈីប និងផលិតផលពាក់ព័ន្ធពីប្រទេសចិន។ នេះបើយោងតាមការចេញផ្សាយរបស់ទូរទស្សន៍ជាតិជប៉ុននៅថ្ងៃទី១៦ខែសីហា។

សូមចុច Subscribe Channel Telegram កម្ពុជាថ្មី ដើម្បីទទួលបានព័ត៌មានថ្មីៗទាន់ចិត្ត

ប្រទេសចិនជាប្រទេសផលិតធាតុសំខាន់មួយដែលត្រូវបានប្រើក្នុងបន្ទះឈីបនិងសារធាតុការពារកម្ដៅភ្លើង។ ក្រសួងពាណិជ្ជកម្ម និងអគ្គនាយកដ្ឋានគយបាននិយាយកាលពីថ្ងៃព្រហស្បតិ៍ថា វិធានការនេះនឹងចូលជាធរមាននៅថ្ងៃទី១៥ខែកញ្ញាដោយផ្អែកលើច្បាប់ពាក់ព័ន្ធ។

ក្រសួងពាណិជ្ជកម្មចិននិយាយថា ការរៀបចំនេះមានគោលបំណងការពារសន្តិសុខ និងផលប្រយោជន៍ជាតិ ដែលនឹងតម្រូវឱ្យអ្នកនាំចេញទទួលបានការអនុញ្ញាតពីរដ្ឋាភិបាល ដោយរាយការណ៍ពីការផ្គត់ផ្កង់ និងព័ត៌មានផ្សេងទៀត។ អ្នកបំពាននឹងត្រូវប្រឈមមុខនឹងការពិន័យ។

គួរបញ្ជាក់ថា ការប្រកាសនេះធ្វើឡើងចំពេលដែលការរឹតបន្តឹងការនាំចេញបន្ទះឈីប និងផលិតផលពាក់ព័ន្ធពីប្រទេសចិនទៅសហរដ្ឋអាមេរិក។ ទោះយ៉ាងណា នេះមិនមែនជាលើកទីមួយទេ ខណៈប្រទេសចិនបានអនុវត្តការគ្រប់គ្រងឬរឹតបន្តឹងការនាំចេញលើលោហធាតុ ដែលទាក់ទងនឹង Gallium និង germanium កាលពីខែសីហាឆ្នាំមុន។ ធាតុទាំងនេះគឺជាសារធាតុរ៉ែដ៏សំខាន់ដែលប្រើនៅក្នុងបន្ទះឈីប និងផ្នែកអេឡិចត្រូនិចផ្សេងទៀត។ជាមួយគ្នានេះទីក្រុងប៉េកាំងក៏បានចាប់ផ្តើមរឹតបន្តឹងការនាំចេញរបស់របរដែលទាក់ទងនឹង graphite កាលពីខែធ្នូឆ្នាំមុនផងដែរដែលវាជាសមាសធាតុប្រើក្នុងថ្មលីចូមអ៊ីយ៉ុង៕