ព័ត៌មានអន្ដរជាតិ

វិមានក្រឹមឡាំង ចោទថា ណាតូ និងលោកខាងលិចជួយអ៊ុយក្រែនវាយចូលដីរុស្ស៊ី

បានផុស

២ ថ្ងៃ មុន

នៅ

ថ្ងៃសុក្រ ១៦ សីហា ២០២៤

ដោយ

លោក Nikolai Patrushev ជំនួយការដ៏មានឥទ្ធិពលរបស់ប្រធានាធិបតីរុស្ស៊ី បានលើកឡើងនៅថ្ងៃសុក្រនេះថា លោកខាងលិច និងសម្ព័ន្ធមិត្តអង្គការណាតូដឹកនាំដោយសហរដ្ឋអាមេរិក បានចូលរួមដោយផ្ទាល់នៅក្នុងការរៀបចំផែនការវាយប្រហារដ៏គួរឲ្យភ្ញាក់ផ្អើលរបស់អ៊ុយក្រែនក្នុងតំបន់ Kursk លើទឹកដីប្រទេសរុស្ស៊ីកាលពីថ្ងៃទី៦ខែសីហា។

លោក Nikolai Patrushev (ក្រោយ) និងលោក វ៉្លាឌឺមៀរ ពូទីន (មុខ)/ រូបភាព៖ Getty

សូមចុច Subscribe Channel Telegram កម្ពុជាថ្មី ដើម្បីទទួលបានព័ត៌មានថ្មីៗទាន់ចិត្ត

សហរដ្ឋអាមេរិក និងមហាអំណាចលោកខាងលិច ដែលចង់ជៀសវាងការប្រឈមមុខដាក់គ្នាដោយផ្ទាល់ជាមួយរុស្ស៊ី បាននិយាយថា អ៊ុយក្រែនមិនបានផ្តល់ការជូនដំណឹងជាមុនទេ ហើយថាទីក្រុងវ៉ាស៊ីនតោនក៏មិនជាប់ពាក់ព័ន្ធនឹងការវាយលុកនេះដែរ ទោះបីជាអាវុធដែលផ្តល់ដោយចក្រភពអង់គ្លេស និងសហរដ្ឋអាមេរិកត្រូវបានគេរាយការណ៍ថាបានរកឃើញនៅលើដីរុស្ស៊ីក៏ដោយ។

លោក Patrushev បានច្រានចោលការអះអាងរបស់លោកខាងលិចនៅក្នុងបទសម្ភាសន៍ជាមួយកាសែត Izvestia។ លោកថា៖ «ប្រតិបត្តិការនៅក្នុងតំបន់ Kursk ក៏ត្រូវបានគ្រោងទុកមុនផងដែរ ដោយមានការចូលរួមពីណាតូ និងទីភ្នាក់ងារពិសេសរបស់បស្ចិមប្រទេស។ បើគ្មានការចូលរួមនិងការគាំទ្រដោយផ្ទាល់ទេ ក្រុងកៀវនឹងមិនហ៊ានចូលទឹកដីរុស្ស៊ីឡើយ»។

ការប្រកាសរបស់លេខាធិការក្រុមប្រឹក្សាសន្តិសុខវិមានក្រឹមឡាំងរូបនេះ ធ្វើឡើងមួយថ្ងៃបន្ទាប់ពីមេបញ្ជាការកំពូលរបស់អ៊ុយក្រែន បានប្រកាសថា ទីក្រុងកៀវបានបង្កើតបន្ទាយយោធាមួយនៅក្នុងតំបន់ Kursk របស់រុស្ស៊ី ហើយកងទ័ពអ៊ុយក្រែនកំពុងសម្រុកទៅមុខបន្ថែមទៀត បើទោះជាក្រុងមូស្គូកំពុងបង្កើនការលុកលុយនៅភាគខាងកើតប្រទេសអ៊ុយក្រែនក៏ដោយ៕

ដោយ៖ ឈាង