ព័ត៌មានអន្ដរជាតិ

អ៊ីស្រាអែល អំពាវនាវឲ្យអ្នកសម្របសម្រួលដាក់សម្ពាធក្រុមហាម៉ាសលើបទឈប់បាញ់

បានផុស

៦ ខែ មុន

នៅ

ថ្ងៃសៅរ៍ ១៧ សីហា ២០២៤

ដោយ

Chheang

នាយករដ្ឋមន្ត្រីអ៊ីស្រាអែល លោក Benjamin Netanyahu កាលពីថ្ងៃសុក្រទី១៦ខែសីហា បានអំពាវនាវឲ្យក្រុមប្រទេសអ្នកសម្របសម្រួល ដែលមានដូចជា សហរដ្ឋអាមេរិក កាតា និងអេហ្ស៊ីប ជួយ «ដាក់សម្ពាធ» ក្រុមហាម៉ាសឲ្យទទួលយកកិច្ចព្រមព្រៀងបទឈប់បាញ់នៅតំបន់ហ្គាហ្សា។

នាយករដ្ឋមន្ត្រីអ៊ីស្រាអែល លោក Benjamin Netanyahu (រូបភាព៖ AP)

សូមចុច Subscribe Channel Telegram កម្ពុជាថ្មី ដើម្បីទទួលបានព័ត៌មានថ្មីៗទាន់ចិត្ត

សេចក្តីថ្លែងការណ៍មួយពីការិយាល័យរបស់អ៊ីស្រាអែលពាក់ព័ន្ធនឹងបទឈប់បាញ់បីដំណាក់កាល ដែលបានផ្ញើទៅកាន់ប្រធានាធិបតីអាមេរិក លោក ចូ បៃដិន បានរៀបរាប់ថា៖ «អ៊ីស្រាអែលសង្ឃឹមថា សម្ពាធរបស់ពួកគេនឹងនាំឲ្យក្រុមហាម៉ាសទទួលយកគោលការណ៍ថ្ងៃទី២៧ខែឧសភា ដើម្បីឲ្យព័ត៌មានលម្អិតនៃកិច្ចព្រមព្រៀងត្រូវបានអនុវត្ត»។

កិច្ចចរចាបទឈប់បាញ់នៅតំបន់ហ្គាហ្សានៅរដ្ឋធានី Doha ប្រទេសកាតា ត្រូវបានផ្អាកកាលពីថ្ងៃសុក្រ ប៉ុន្តែក្រុមអ្នកចរចានឹងជួបប្រជុំគ្នាម្តងទៀតនៅសប្តាហ៍ក្រោយ ដើម្បីស្វែងរកកិច្ចព្រមព្រៀងមួយដើម្បីបញ្ចប់សង្គ្រាមរវាងអ៊ីស្រាអែល និងក្រុមហាម៉ាស ក៏ដូចជាការដោះលែងចំណាប់ខ្មាំងដែលនៅសេសសល់ ខណៈដែលប្រធានាធិបតីអាមេរិក លោក បៃដិន បាននិយាយថា៖ «យើងមិនទាន់សម្រេចវាបាននៅឡើយទេ»។

នៅក្នុងសេចក្តីថ្លែងការណ៍រួមរបស់សហរដ្ឋអាមេរិក កាតា និងអេហ្ស៊ីប បានប្រកាសថា ទីក្រុងវ៉ាស៊ីនតោន បានបង្ហាញសំណើថ្មីនៅក្នុងកិច្ចព្រមព្រៀងបទឈប់បាញ់កាលពីសប្តាហ៍មុន ដើម្បីបិទចន្លោះប្រហោងមួយចំនួន ដែលអាចជួយឲ្យបទឈប់បាញ់ត្រូវបានអនុវត្តយ៉ាងឆាប់រហ័ស។ ក្រុមអ្នកសម្របសម្រួលនឹងបន្តធ្វើការលើសំណើនោះបន្ថែមទៀត មុនកិច្ចប្រជុំម្ដងទៀតនៅសប្ដាហ៍ក្រោយ។

សេចក្តីថ្លែងការណ៍ដដែល បានរៀបរាប់ទៀតថា កិច្ចចរចាផ្ដោតសំខាន់លើលទ្ធផល ដូចជា «ការសង្គ្រោះជីវិត ការនាំមកនូវជំនួយដល់ប្រជាជននៅតំបន់ហ្គាហ្សា និងការកាត់បន្ថយភាពតានតឹងក្នុងតំបន់»។

កាលពីថ្ងៃព្រហស្បតិ៍ អ៊ីស្រាអែល និងក្រុមអ្នកសម្របសម្រួល បានចាប់ផ្តើមកិច្ចចរចាចុងក្រោយបំផុត ដើម្បីបញ្ចប់សង្រ្គាមនៅតំបន់ហ្គាហ្សា ដែលបានសម្លាប់ប្រជាជនប៉ាឡេស្ទីនរាប់ម៉ឺននាក់។ យ៉ាងណាមិញ ក្រុមហាម៉ាសមិនបានចូលរួមដោយផ្ទាល់នោះទេ តែទទួលបានការផ្ដល់ព័ត៌មានសង្ខេបអំពីកិច្ចចរចាពីក្រុមអ្នកសម្របសម្រួល។

មេបញ្ជាការជាន់ខ្ពស់ក្រុមហាម៉ាស លោក Izzat al-Raishq បានប្រាប់ថា បើតាមព័ត៌មានទទួលបានពីក្រុមអ្នកសម្របសម្រួលកាលពីថ្ងៃទី១៥ខែសីហា អ៊ីស្រាអែលមិនបានគោរតាមអ្វីដែលធ្លាប់ព្រមព្រៀងនឹងគ្នាពីមុននោះទេ៕

ដោយ៖ ឈាង