លោក ថាក់ស៊ីន ចាំឈរនៅពីក្រោយ ផ្តល់ដំបូន្មានដល់ កូនស្រីពៅ

បន្ទាប់ពីព្រះមហាក្សត្រថៃ ចេញព្រះរាជក្រឹត្យតែងតាំងលោកស្រី ផែថងថាន ស៊ីណា​វ៉ាត្រា ក្លាយជានាយករដ្ឋមន្ត្រីផ្លូវការ, លោក ថាក់ស៊ីន ស៊ីណាវ៉ាត្រា បាននិយាយថា លោកនៅឈរពីក្រោយចាំផ្តល់ដំបូន្មានដល់កូនស្រីជានិច្ច។ 

សូមចុច Subscribe Channel Telegram កម្ពុជាថ្មី ដើម្បីទទួលបានព័ត៌មានថ្មីៗទាន់ចិត្ត

តាមការចុះផ្សាយរបស់កាសែត Bangkok Post កាលពីថ្ងៃអាទិត្យទី១៨ខែសីហាឆ្នាំ២០២៤, លោក ថាក់ស៊ីន អាយុ៧៥ឆ្នាំបាននិយាយថា «នាងដឹងថា នាងនឹងនឿយហត់ ប៉ុន្តែត្រូវតែលះបង់ ហើយត្រូវតែមានកិច្ចសហការពីគ្រប់ភាគី។ កាលពីមុន ខ្ញុំឈរនៅមុខនាង ហើយនាងនៅពីក្រោយខ្ញុំ ប៉ុន្តែថ្ងៃនេះ នាងឈរនៅពីមុខខ្ញុំ ហើយខ្ញុំនៅខាងក្រោយវិញម្តង»។

លោកលើកឡើងថា កូនស្រីអាចទូរស័ព្ទមកគ្រប់ពេល ដើម្បីសុំយោបល់លើបញ្ហាទាំងឡាយ ប៉ុន្តែឪពុកនឹងមិនផ្តល់ការគាំទ្រផ្នែកនយោបាយឡើយ ព្រោះឪពុកចាស់ហើយ។ លោកថែមទាំងបញ្ជាក់ថា លោកមិនពាក់ព័ន្ធជាមួយការបង្កើតគណៈរដ្ឋមន្ត្រីថ្មីទេ! បញ្ហានេះគឺជាទំនួលខុសត្រូវរបស់នាយករដ្ឋមន្ត្រី។

សូមបញ្ជាក់ជាថ្មី កាលពីថ្ងៃសុក្រទី១៦ខែសីហាឆ្នាំ២០២៤ រដ្ឋសភាថៃ បានបោះឆ្នោតជ្រើសតាំងកូន​​ស្រី​ពៅ​របស់​លោក ថាក់ស៊ីន គឺ​លោកស្រី ផែថងថាន ស៊ីណា​វ៉ាត្រា អាយុ៣៧ឆ្នាំ ឲ្យក្លាយជានាយករដ្ឋមន្ត្រីទី៣១ ហើយការឡើងកាន់តំណែងនេះ ធ្វើឲ្យលោកស្រីបង្កើតប្រវត្តិសាស្រ្តថៃ ក្នុងនាមជា នាយករដ្ឋមន្ត្រីមានវ័យក្មេងជាងគេបំផុតរបស់ប្រទេស។ 

ក្នុងការបោះឆ្នោតរបស់រដ្ឋសភា លោកស្រីផែថងថាន ទទួលបានសំឡេងគាំទ្រ៣១៩ ប្រឆាំង១៤៥ និងអនុបវាទ២៧សំឡេង។

ផែថងថាន ឬមានឈ្មោះហៅក្រៅថា Ung Ing គឺជាសមាជិកទី៣ខៃគ្រួសារត្រកូលថាក់ស៊ីន ដែលឡើងកាន់តំណែងកំពូលរបស់ប្រទេសថៃ។ លោកស្រីក្តាប់បានអំណាចនេះ ក្រោយពេលអតីតនាយករដ្ឋមន្ត្រីមកពីគណបក្សភឿថៃដូចគ្នាគឺលោក សេដ្ឋា ថាវីស៊ីន ត្រូវបានតុលាការធម្មនុញ្ញា ចេញសាលក្រមដកតំណែង ជុំវិញការតែងតាំងទណ្ឌិត ឲ្យចូលធ្វើការក្នុងគណៈរដ្ឋមន្ត្រី៕

អត្ថបទ៖ សុខ សុវណ្ណ

ចុចអាន៖ កូនស្រីពៅលោកថាក់ស៊ីន បង្កើតប្រវត្តិសាស្រ្តថៃ ក្លាយជានាយករដ្ឋមន្ត្រីក្មេងជាងគេបំផុត