ប្រជាជននៅ Donbas សល់ពេលត្រឹមពីរសប្តាហ៍ប៉ុណ្ណោះ ដើម្បីរត់គេចពីការវាយលុករបស់ រុស្ស៊ី 

ត្បិតកងទ័ពលោក Zelensky កំពុងបន្តលុកលុយចូលក្នុងតំបន់ Kursk របស់រុស្ស៊ីក៏ដោយ ក៏អាជ្ញាធរអ៊ុយក្រែន បានចេញបញ្ជាឲ្យប្រជាជននៅទីក្រុង Pokrovsk ក្នុងតំបន់ Donbas និងភូមិជុំវិញនោះ ត្រូវជម្លៀសចេញ ខណៈកងកម្លាំងរុស្ស៊ីនៅតែបន្តវាយប្រហារភាគខាងជើង ខណៈប្រមុខរដ្ឋាភិបាលយោធារបស់ទីក្រុង Pokrovsk លោក Serhii Dobriak និយាយថា ប្រជាពលរដ្ឋមានពេលយូរបំផុតត្រឹមពីរសប្តាហ៍ប៉ុណ្ណោះ ដើម្បីគេចខ្លួនពីការវាយលុករបស់រុស្ស៊ី។

សូមចុច Subscribe Channel Telegram កម្ពុជាថ្មី ដើម្បីទទួលបានព័ត៌មានថ្មីៗទាន់ចិត្ត

ទីក្រុងយុទ្ធសាស្ត្រមួយនេះ គឺជាបន្ទាយការពាររបស់អ៊ុយក្រែន និងជាមជ្ឈមណ្ឌលដឹកជញ្ជូនដ៏សំខាន់សម្រាប់កងទ័ពរបស់ទីក្រុងកៀវ ខណៈប្រមុខតំបន់ Donetsk លោក Vadym Filashkin និយាយថា មានមនុស្សជាង ៥៣ ០០០នាក់ រួមទាំងកុមារជិត ៤ ០០០នាក់ផងដែរ នៅតែស្ថិតក្នុងទីក្រុងនោះ។

លោកសង្កត់ធ្ងន់ថា «អាជ្ញាធរ​បាន​សម្រេច​ចិត្ត​ជម្លៀស​កុមារនិង​ឪពុក​ម្តាយ ឬ​អាណាព្យាបាល​ដោយ​បង្ខំ។ នៅពេលយើងដឹងថា គ្រប់អាវុធរបស់សត្រូវ សុទ្ធតែអាចបាញ់ដល់ទីក្រុងរបស់យើងនោះ យើងចាំបាច់ត្រូវសម្រេចចិត្តចេញបញ្ជាជម្លៀសនេះតែម្តង»។

បញ្ជា​ជម្លៀស​នេះ​​កើត​ឡើង ​ចំពេល​ប្រធានាធិបតី​អ៊ុយក្រែន Zelensky អះអាង​ថា កងកម្លាំង​របស់​លោក ​កំពុង​បន្ត​ទទួល​បានលទ្ធផលសមប្រកប ​ក្នុងការ​លុកលុយ​នៅ​តំបន់ Kursk។

កាលពីថ្ងៃចន្ទ លោក Zelensky ក៏និយាយដែរថា អ៊ុយក្រែនវាយយកបានផ្ទៃដីនៃតំបន់ Kursk ជាង ១ ២៥០គីឡូម៉ែត្រការ៉េ ព្រមទាំងទីតាំងចំនួន៩២កន្លែងផងដែរ។

សូមបញ្ជាក់ថា គិតត្រឹមពេលនេះ គឺមានរយៈពេល​ជិត​ពីរ​សប្តាហ៍​ហើយ ដែលកងកម្លាំងរបស់លោក Zelensky បើកការ​វាយ​ប្រហារ​ទ្រង់ទ្រាយ​ធំ​បំផុតឆ្លងដែនចូលលើ​ទឹកដី​រុស្ស៊ី​ ចាប់​តាំង​ពី​ទីក្រុងមូស្គូ​ បើកប្រតិបត្តិការសឹកពេញទំហឹងលើប្រទេស​អ៊ុយក្រែន​ក្នុង​ឆ្នាំ២០២២។

ទោះបីជាយ៉ាងណាក៏ដោយ ទីក្រុងមូស្គូ ចាត់ទុកការវាយលុកឆ្លងដែននោះថា ជាការបង្ករឿងដ៏ធំ ហើយប្តេជ្ញាសងសឹកដោយឥតប្រណីដៃ៕

អត្ថបទ៖ សុខ សុវណ្ណ

ចុចអាន៖ អ៊ុយក្រែន កម្ទេចស្ពានយុទ្ធសាស្រ្តទី២ ក្នុងដីរុស្ស៊ី