មហាសេដ្ឋីបច្ចេកវិទ្យាអង់គ្លេសបាត់​ខ្លួន​ក្នុងហេតុការណ៍​លិច​កប៉ាល់​​

មហាសេដ្ឋីបច្ចេកវិទ្យាអង់គ្លេស លោក Mike Lynch និងកូនស្រីអាយុ១៨ឆ្នាំ និងមនុស្ស៤នាក់ផ្សេងទៀតបានបាត់ខ្លួនបន្ទាប់ពីកប៉ាល់ដ៏ទំនើបប្រណីតរបស់ពួកគេ បានលិច​ពេល​ជួប​ព្យុះនៅឯទីក្រុង Sicily ប្រទេសអ៊ីតាលីកាលពីព្រឹកថ្ងៃចន្ទ ខណៈប្រពន្ធរបស់ លោក​ Lynch និងមនុស្ស១៤នាក់ផ្សេងទៀតបានរួចជីវិត។ នេះបើយោងតាមការចេញផ្សាយរបស់ទីភ្នាក់ងារព័ត៌មាន AP នៅថ្ងៃតី២០ខែសីហានេះ។

របាយការណ៍ បានឱ្យដឹងថា មហាសេដ្ឋីបច្ចេកវិទ្យាចក្រភពអង់គ្លេសលោក Mike Lynch ស្ថិតក្នុងចំណោមអ្នកបាត់ខ្លួន បន្ទាប់ពីកប៉ាល់របស់លោក បាន​ចាក​ចេញពីកំពង់ផែ Porticello និងត្រូវបានក្រឡាប់ បន្ទាប់ពីខ្យល់ព្យុះកំបុតត្បូងបានវាយប្រហារតំបន់នោះ។ ក្រុមអ្នកជួយសង្គ្រោះរកឃើញសាកសពមនុស្សម្នាក់ ខណៈអ្នកមុជទឹកបានចំណាយពេលមួយថ្ងៃដើម្បីទៅដល់កប៉ាល់ដែលកំពុងលិចនៅជម្រៅ៥០ម៉ែត្រ ស្របពេលដែលលក្ខខណ្ឌអាកាសធាតុកាន់តែអាក្រក់ទៅៗ។

ឆ្មាំឆ្នេរសមុទ្រអ៊ីតាលី បានឲ្យដឹងថា កប៉ាល់នេះមាននាវិកចំនួន១០នាក់ និងអ្នកដំណើរ១២នាក់។ វាបានក្រឡាប់ចំពេលដែលខ្យល់ព្យុះដ៏មាន​ឥទ្ធិពល​មួយបានវាយលុកតំបន់នោះពេញមួយយប់ និងចំកន្លែងដែលកប៉ាល់ Bayesian ដែលមានទង់ជាតិអង់គ្លេសប្រវែង៥៦ម៉ែត្រ ចតនៅទីនោះ ខណៈកប៉ាល់ធំមួយទៀតនៅក្បែរនោះគឺ Sir Robert Baden Powell មិនមានការខូចខាតធ្ងន់ធ្ងរនោះទេ ដោយមនុស្ស១៥នាក់ត្រូវបានជួយសង្គ្រោះរួមទាំងភរិយារបស់ Lynch គឺលោកស្រី Angela Bacares ។

គួរបញ្ជាក់ថា កប៉ាល់ Bayesian មានភាពល្បីល្បាញដែលមានដងក្ដោងប្រវែង ៧៥ ម៉ែត្រ ដែលខ្ពស់បំផុតមួយរបស់ពិភពលោកធ្វើពីអាលុយមីញ៉ូមដែលមានពន្លឺនៅពេលយប់ កប៉ាល់នេះជួលក្នុងតម្លៃរហូតដល់ ១៩៥​​០០០អឺរ៉ូ (ប្រហែល ២១៥០០០ដុល្លារ) ក្នុងមួយសប្តាហ៍។

កប៉ាល់នេះបានសាងសង់ក្នុងឆ្នាំ២០០៨ ដោយក្រុមហ៊ុនអ៊ីតាលី Perini Navi អាចផ្ទុកអ្នកដំណើរបាន១២នាក់នៅក្នុងកាប៊ីនពីរជាន់ បូករួមទាំងកន្លែងស្នាក់នៅរបស់​នាវិក។ នេះ​យោងតាមក្រុមហ៊ុន Charter World និង Yacht Charters។

កប៉ាល់នេះពីមុនត្រូវបានគេដាក់ឈ្មោះថា Salute នៅបំពាក់ទង់ជាតិហូឡង់ មានលក្ខណៈពិសេសដោយមានឈើរលោងនៅផ្នែកខាងក្នុង ជាមួយនឹងការបញ្ចេញសំឡេងជប៉ុន ដែលរចនាដោយអ្នករចនាជនជាតិបារាំង Remi Tessier។

អ្នក​ដែល​ត្រូវ​បាន​គេ​ជួយ​សង្គ្រោះ​ចំនួន៨នាក់​ត្រូវ​បាន​គេ​បញ្ជូន​ទៅ​មន្ទីរពេទ្យ ខណៈ​អ្នក​ផ្សេង​ទៀត​ត្រូវ​បាន​គេ​យក​ទៅ​សណ្ឋាគារ​មួយ ចំណែកសាកសពម្នាក់ដែលបានរកឃើញនៅជិតបំណែកកប៉ាល់ជាចុងភៅ ប៉ុន្តែមនុស្សប្រាំមួយនាក់ផ្សេងទៀតមិនទាន់ត្រូវបានរកឃើញនោះទេ។ នាវិក និងអ្នកដំណើរដែលជិះលើកប៉ាល់បានមកពីប្រទេសផ្សេងៗគ្នា ក្រៅពីចក្រភពអង់គ្លេស និងសហរដ្ឋអាមេរិក មានអ្នកដំណើរ និងនាវិកមកពី Antigua បារាំង អាល្លឺម៉ង់ អៀរឡង់ មីយ៉ាន់ម៉ា ហូឡង់ នូវែលសេឡង់ និងអេស្ប៉ាញ។

ជាមួយគ្នានេះអង្គភាពស៊ើបអង្កេតគ្រោះថ្នាក់ដែនសមុទ្ររបស់ចក្រភពអង់គ្លេស កំពុងដាក់ពង្រាយក្រុមអធិការចំនួនបួននាក់ទៅកាន់ប្រទេសអ៊ីតាលី ដើម្បីធ្វើការវាយតម្លៃបឋម។ ចំណែកការិយាល័យបរទេស និងអភិវឌ្ឍន៍ Commonwealth ក៏កំពុងផ្តល់ការគាំទ្រផ្នែកកុងស៊ុលដល់ជនជាតិអង់គ្លេសមួយចំនួន និងក្រុមគ្រួសាររបស់ពួកគេ។

គួររំឭកថាលោកLynch ដែលធ្លាប់ត្រូវបានគេឲ្យរហស្សនាមថាជាស្តេចបច្ចេកវិទ្យារបស់ចក្រភពអង់គ្លេស និងត្រូវបានកាត់ទោសឱ្យរួចពីទោសកាលពីខែមិថុនាដោយគណៈវិនិច្ឆ័យពីបទក្លែងបន្លំនៅSan Franciscoដែលទាក់ទងនឹងការលក់ក្រុមហ៊ុនសូហ្វវែររបស់គាត់ឈ្មោះ Autonomy ទៅ Hewlett-Packard ក្នុងតម្លៃ១១ ពាន់លានដុល្លារក្នុងឆ្នាំ ២០១១៕

អត្ថបទ៖ ប៊ុន សុភាព