ព័ត៌មានអន្ដរជាតិ

អាមេរិក អនុម័តការលក់ឧទ្ធម្ភាគចក្រយោធាតម្លៃ៣,៥ពាន់លានដុល្លារឲ្យកូរ៉េខាងត្បូង

បានផុស

១ ខែ មុន

នៅ

ថ្ងៃអង្គារ ២០ សីហា ២០២៤

ដោយ

Chheang

សហរដ្ឋអាមេរិក កាលពីថ្ងៃទី១៩ខែសីហាបានអនុម័តការលក់ឧទ្ធម្ភាគចក្រយោធាក្នុងតម្លៃ ៣,៥ពាន់លានដុល្លារទៅឲ្យកូរ៉េខាងត្បូង។ ការលក់នេះ មានប្រភេទឧទ្ធម្ភាគចក្រវាយប្រហារ AH-64E Apache ចំនួន ៣៦គ្រឿង និងឧបករណ៍ផ្សេងៗបំពាក់លើឧទ្ធម្ភាគចក្ររួមទាំងមីស៊ីលផងដែរ។

ឧទ្ធម្ភាគចក្រ AH-64E Apache (រូបភាព៖ Boeing)

សូមចុច Subscribe Channel Telegram កម្ពុជាថ្មី ដើម្បីទទួលបានព័ត៌មានថ្មីៗទាន់ចិត្ត

ទីភ្នាក់ងារសហប្រតិបត្តិការសន្តិសុខការពារជាតិ (DSCA) របស់អាមេរិក បាននិយាយនៅក្នុងសេចក្តីថ្លែងការណ៍មួយថា៖ «ការលក់ដែលបានស្នើឡើងនេះ នឹងធ្វើឲ្យប្រសើរឡើងនូវសមត្ថភាពរបស់សាធារណរដ្ឋកូរ៉េ ក្នុងការទប់ទល់នឹងការគំរាមកំហែងនាពេលបច្ចុប្បន្ន និងអនាគត ដោយផ្តល់នូវកម្លាំងដ៏គួរឲ្យទុកចិត្តដែលអាចរារាំងសត្រូវ និងចូលរួមក្នុងប្រតិបត្តិការក្នុងតំបន់»។

សេចក្តីថ្លែងការណ៍ដដែល បានរៀបរាប់ទៀតថា ការលក់នេះនឹងជួយពង្រឹង «សន្តិសុខនៃសម្ព័ន្ធមិត្តដ៏សំខាន់ ដែលជាកម្លាំងសម្រាប់ស្ថិរភាពនយោបាយ និងវឌ្ឍនភាពសេដ្ឋកិច្ចនៅក្នុងតំបន់ឥណ្ឌូប៉ាស៊ីហ្វិក»។

DSCA បានបញ្ជាក់ថា ក្រុមហ៊ុនដែលនឹងផលិតឧទ្ធម្ភាគចក្រយោធាក្នុងកិច្ចព្រមព្រៀងនេះ មានចំនួន២ គឺក្រុមហ៊ុន Boeing និងក្រុមហ៊ុន Lockheed Martin។

ជាការកត់សម្គាល់ ការប្រកាសស្ដីពីការអនុម័តការលក់ឧទ្ធម្ភាគចក្រយោធានេះ ធ្វើឡើងនៅថ្ងៃតែមួយដែលទីក្រុងវ៉ាស៊ីនតោន និងទីក្រុងសេអ៊ូលបានចាប់ផ្តើមសមយុទ្ធយោធារួមគ្នាប្រចាំឆ្នាំដ៏ធំមួយ ដោយមានគោលបំណងទប់ទល់នឹងការគំរាមកំហែងពីកម្មវិធីអាវុធនុយក្លេអ៊ែររបស់កូរ៉េខាងជើង។ សមយុទ្ធ Ulchi Freedom Shield នឹងប្រព្រឹត្តរហូតដល់ថ្ងៃទី២៩ខែសីហា ដែលមានការចូលរួមពីក្រុមយោធារាប់ម៉ឺននាក់រវាងប្រទេសសម្ព័ន្ធមិត្តទាំងពីរ៕

ដោយ៖ ឈាង