ព័ត៌មានអន្ដរជាតិ

ទីភ្នាក់ងារសន្តិសុខអាមេរិក ប្រាប់ពីអត្តសញ្ញាណអ្នកនៅពីក្រោយការវាយប្រហារយុទ្ធនាការបោះឆ្នោតលោក ត្រាំ

បានផុស

៧ ខែ មុន

នៅ

ថ្ងៃអង្គារ ២០ សីហា ២០២៤

ដោយ

Chheang

ទីភ្នាក់ងារសន្តិសុខអាមេរិក បាននិយាយនៅថ្ងៃទី២០ខែសីហាថា អ៊ីរ៉ង់ជាអ្នកនៅពីក្រោយការហេគ
(Hack) យុទ្ធនាការបោះឆ្នោតរបស់លោក ដូណាល់ ត្រាំ (Donald Trump) កាលពីពេលថ្មីៗកន្លងទៅ ក្នុងគោលបំណងជ្រៀតជ្រែកការបោះឆ្នោតសហរដ្ឋអាមេរិកនាខែវិច្ឆិកាខាងមុខ។

សូមចុច Subscribe Channel Telegram កម្ពុជាថ្មី ដើម្បីទទួលបានព័ត៌មានថ្មីៗទាន់ចិត្ត

យោងតាមសេចក្តីថ្លែងការណ៍របស់ការិយាល័យនាយកស៊ើបការណ៍សម្ងាត់ជាតិអាមេរិក (ODNI), ការិយាល័យសហព័ន្ធស៊ើបអង្កេត (FBI) និងទីភ្នាក់ងារសន្តិសុខតាមអ៊ីនធឺណិត និងហេដ្ឋារចនាសម្ព័ន្ធ (CISA) បានរកឃើញថា អ៊ីរ៉ង់បានកំណត់គោលដៅវាយប្រហារលើយុទ្ធនាការលោក ត្រាំ នៅដើមខែសីហានេះ។ ក្នុងសេចក្ដីថ្លែងការណ៍ បានរៀបរាប់ថា៖ «យើងបានសង្កេតឃើញសកម្មភាពរបស់អ៊ីរ៉ង់កាន់តែលុកលុយឡើង នៅក្នុងអំឡុងពេលបោះឆ្នោតលើកនេះ ជាពិសេសពាក់ព័ន្ធនឹងប្រតិបត្តិការជះឥទ្ធិពលសំដៅលើសាធារណៈជនអាមេរិក និងប្រតិបត្តិការតាមអ៊ីនធឺណិតដែលផ្តោតលើយុទ្ធនាការបេក្ខភាពប្រធានាធិបតី។ នេះរួមបញ្ចូលទាំងសកម្មភាពដែលត្រូវបានរាយការណ៍ថ្មីៗនេះដើម្បីធ្វើឲ្យខូចដល់យុទ្ធនាការរបស់អតីតប្រធានាធិបតី លោក ត្រាំ ដែល (សហគមន៍ស៊ើបការណ៍) សន្មតថាជាអ៊ីរ៉ង់»។

សហរដ្ឋអាមេរិក នឹងរៀបចំការបោះឆ្នោតនៅថ្ងៃទី៥ខែវិច្ឆិកា ដោយមានបេក្ខភាពពីររូបជាគូប្រជែងសំខាន់គឺ លោក ដូណាល់ ត្រាំ និងលោកស្រី កាម៉ាឡា ហារីស (Kamala Harris)។ បេក្ខភាពប្រធានាធិបតីទាំងពីរ សុទ្ធតែបាននិយាយថា ពួកគេបានរងការវាយប្រហារតាមអ៊ីនធឺណិតក្នុងរយៈពេលប៉ុន្មានសប្តាហ៍ថ្មីៗនេះ។ ចំណែកឯក្រុមហ៊ុនបច្ចេកវិទ្យាមួយចំនួននៅសហរដ្ឋអាមេរិក ក៏បានប្រកាសដែរថា ពួកគេពិតជាបានរកឃើញថាមានការវាយប្រហារបែបនេះពិតមែន។

ទីភ្នាក់ងារសម្ងាត់អាមេរិក ជឿថា អ៊ីរ៉ង់បានប្រើប្រាស់វិធីសាស្ត្រវាយប្រហារតាមរយៈវិស្វកម្មសង្គម ដែលគេហៅថា «Social Engineering» និងវិធីសាស្ត្រមួយចំនួនផ្សេងទៀត ដើម្បីវាយប្រហារលើបុគ្គលនយោបាយនៅក្នុងយុទ្ធនាការបោះឆ្នោត ហើយការប៉ុនប៉ងវាយប្រហារនេះ មានគោលបំណងជះឥទ្ធិពលលើដំណើរការបោះឆ្នោតរបស់អាមេរិក៕

ដោយ៖ ឈាង