គ្រោះ​ធម្មជាតិ​បង្ក​មហន្តរាយ​​ធ្ងន់ធ្ងរ​នៅ​ទីក្រុង Zixing ប្រទេសចិន

មនុស្សចំនួន៥០នាក់ត្រូវបានបញ្ជាក់ថាបានស្លាប់ និង១៥នាក់ទៀតនៅតែបាត់ខ្លួន បន្ទាប់ពីភ្លៀងធ្លាក់ខ្លាំងបានវាយប្រហារទីក្រុង Zixing ក្នុងខេត្ត Hunan ភាគកណ្តាលប្រទេសចិន ចាប់តាំងពីចុងខែកក្កដាមក។​ នេះបើយោងតាមការចេញផ្សាយរបស់សារព័ត៌មាន CGTN នៅថ្ងៃទី២០ខែសីហានេះ។

ជំនន់ទឹកភ្លៀងដ៏ខ្លាំងក្លាដែលបំបែកកំណត់ត្រាបន្ទាប់ពីព្យុះទីហ្វុង Gaemi បានបំផ្លិចបំផ្លាញផ្ទះប្រជាពលរដ្ឋជាង ១៧០០គ្រួសារ និងបណ្តាលឱ្យមានការរអិលបាក់ដី និងបាក់រលំផ្ទះជាង៦៥០០០ខ្នងនៅទីក្រុង Zixing។ លើសពីនេះ មនុស្ស ២៣៤១៩ នាក់ត្រូវបានផ្ទេរទៅទីទួលសុវត្ថិភាពជាបន្ទាន់ ខណៈដែលភ្លៀងធ្លាក់ខ្លាំងបានបង្ក​មហន្តរាយខ្លាំង​នៅទូទាំងទីក្រុង។

ទីស្នាក់ការកណ្តាល Chenzhou សម្រាប់គាំទ្រការងារសង្គ្រោះបន្ទាន់ ការជួសជុល និងការកសាងឡើងវិញរបស់ទីក្រុង Zixing បានឲ្យដឹងថា មនុស្សចំនួន ១២៨ពាន់​នាក់ បានរងផលប៉ះពាល់ ហើយផ្ទះនិងអគារចំនួន ១១៨៦៩ ខ្នងបានបាក់រលំ។

អាជ្ញាធរបានបន្ថែមថា រហូតមកដល់ពេលនេះ ផ្លូវថ្នល់ បណ្តាញ​ថាមពលអគ្គិសនី សេវាទំនាក់ទំនង និងទឹកស្អាតត្រូវបានស្ដារឡើងវិញនៅក្នុងតំបន់ដែលរងផលប៉ះពាល់ទាំងអស់នៅក្នុងតីក្រុង Zixing ហើយការងារសង្គ្រោះគ្រោះមហន្តរាយកំពុងដំណើរការនៅឡើយ។

គួរបញ្ជាក់ថា ប្រទេសចិនមួយរយៈចុងក្រោយនេះបានទទួលរងនូវគ្រោះមហន្តរាយយ៉ាងធ្ងន់ធ្ងរ ដូចជាភ្លៀងធ្លាក់ខ្លាំងបណ្ដាលឲ្យមានទឹកជំនន់ បំណាក់ដី ការ​ជម្លៀសមនុស្សរាប់ម៉ឺននាក់និងការ​ខូចខាតហេដ្ឋារចនាសម្ព័ន្ធយ៉ាងធ្ងន់ធ្ងរ៕

អត្ថបទ៖ ប៊ុន សុភាព